Read Kuranko Yaburi 143 Bible Online

Yaburi 143 - Kuranko bible

Yaburi 143

¹Mari, i wɔlɔ matɔlɔ nta madiyalɛ la. N di-kɛ-kan lamɔɛn bawo i lanaya-tigi. N yabi telenbagayɛ la.

² I kana nde, ila wɔli-kɛlɛ kiti bawo mɔgɔ-wo-mɔgɔ sa, sɔn sa min na i yala.

³N yogenu bara n sagaran ka n niyi ragbɛrɛn n ma. Anu bara n to pinpi-makilanni-bɛ rɔ iko mɔgɛ min bara mɛ kanbɛ rɔ.

⁴N yigi ara tɛgɛ son! N kun ma ara kɔ yisi-tinya bolo.

⁵N bi n mirila ko-kɔrɔmɛnu ma. N hɛnkili ye i kɛ-nya-kɔrɛnu ma fɔlɔn. N yili tonɛ ila ko-ladan-bolenu ko.

⁶N bi n bole sigila i ye ka i madiya bawo i sɔgɛ ara n tabɔ kosɛbɛ, iko yi-sɔgɛ si dugu-ragbalanɛ bira nya min!

⁷E, Mari, n denkun tiriya bawo n yigi ara tɛgɛ. I kana i dogon n kɔrɔ. Ni i ya wo ma, n si taran mɔgɔ-faganɛnu tɛma lakira.

⁸Sɔgɔma-wo-sɔgɔma, i ni to n hɛnkili labilala ila keninteya-yɛlɛmabɛlɛla ko la bawo n bara n yigi sa ile le tɔ. N bi madiyali kɛla alako n si ta kilɛ min fɛ, i ni wo yira n na.

⁹Mari, n si ta ile le wara n natanka-koe rɔ. I ni n kunyɛ bɔ gbaran rɔ n yogenu bolo.

¹⁰N ni min ma, wo fɔ n ye bawo nta Alla le ile la. Ila nyimayɛ ni n bila kila-nyimɛ fɛ.

¹¹Mari, n niyi latanka iko i wara lanyiri kiri n ye nya min. N kisi nna tɔrɔyɛnu ma ila nyimayɛ la.

¹²N yogenu faga n ye ka a tɛgɛ ila keninteya-wɛla ko ma. N niyi-ragbɛrɛnnɛnu kasara n ye bawo ila wɔli-kɛlɛ le nde la.