Read Kuranko Yaburi 147 Bible Online

Yaburi 147 - Kuranko bible

Yaburi 147

¹Ma ni Mari tanto. A kin ko ma ni bɛti bɔ mata Alla ye, ado wo telenta, a bɛnnɛ.

²Mari ye Yerusalɛm sɔla a kurɛ la ka ala mɔgɔ-birani-kɔrɛnu nana a rɔ.

³A si yisi-kimɛ di mɔgɔ-yisi-tinyanɛnu ma ka anuna tɛlɛnu makiri.

⁴Alla le ya lole bɛɛ yatɛ yirika latɛgɛ ka anu kelen-kelennamɛ-bɛɛ kele anu tɔgɛ la.

⁵Ma tigi-makawanɛ, ado a fanka kolo. Ala hɛnkilimayɛ nya ti ban yenna.

⁶A ye mɔgɔ-famayiginɛnu sɔla yiri! Kɔnɔ a si karagbɛlɛnu fɛrɛn dugi la ka anu bunden korr!

⁷Ma ni matɔgɔ-bɛtinu bɔ Mari ye. Ma ni bɔlɔn kɛ a rɔ mata Alla ye.

⁸A ye banda-finyɛ rafulenna san ma tala. A ye yi kɛla dugi ma. A ye binyɛ lafɛrɛnna kɔnkɛnu ma.

⁹A ye sogenuna de-nyini-fan dila anu ma. Koni-dannu ba di a dala, a si wonu de-nyini fanan.

¹⁰Ale Mari kolan ti bɔ soeenu na minnu tagbɛlɛ. A mako sa kɛlɛ-kurugbɛnu na.

¹¹Kɔnɔ a kolan si bɔ a gbiliyalɛnu denu na. Minnu yigi bɛnnɛ ala hinɛ ma, a makoe ye wonu denu na.

¹²Ile Yerusalɛm soe nyɛrɛ ni Mari tanto. I ni Alla tanto.

¹³A si ila tarɛ-don-dɛnu tagbɛlɛya gbon! A ye duwala ila mɔgɛnu ye.

¹⁴Dan minnu bi ila nyamanɛla foolɛ rɔ, a si wo kandan i ye ka i hɛnɛ dɔn-fen-hakikɛnu na.

¹⁵Yanni Alla ni ban kumala duninya ye, tiriyante wo rɔ, wo ara ma.

¹⁶Mari ye duri burunna binyɛ ma iko birinkan. A si kunbi pusen binyɛ la iko bugurɛ.

¹⁷A si banda-kole layigi iko mɔgɔ wa wasakɔrɛ fui. A ye kimɛ min nanala, wo ti kun mɔgɔ rɔ.

¹⁸Yanni a ni ban a fɔla duri ma ko, “Gbala,” a ara gbala todo! A tenbi fɔnyɔ lanala, banda ye wo sagaranna.

¹⁹A ye ala sarakanɛnu natala ala mɔgɛnu ma. A ye ala tɔnnu anubɛ ala sereyanu dila Isirɛla mɔgɛnu ma.

²⁰A ma wonu fenfen di sibolo-gbɛrɛnu ma. Wonu ma ala sereya do-wo-do lɔn. Ma ni Mari tanto!