Read Kuranko Yaburi 148 Bible Online

Yaburi 148 - Kuranko bible

Yaburi 148

¹Bɛɛ ni Mari tanto. Arinyɛnitɔ-nima-fan bɛɛ ni Mari tanto.

²Wole melikanu wo, wole Arinyɛnitɔ-kɛlɛ-dannu wo, wo ni Mari tanto.

³Tele anubɛ karɛ ni a tanto. Lolo-malanni-wɛnu ni a tanto.

⁴Fan minnu bi san-kole kɔma pon, wo ni Mari tanto. Yi min bi san-kole rɔ fanan, wo ni Mari tanto.

⁵Kɛ bɛɛ ni Mari tanto bawo ata kumɛ le taranta wonu danna.

⁶Ata kumɛ fɛ, a ya wonu sigi anu gbɛnu tɔ, ado wonu ti maga anu gbɛ rɔ ni!

⁷Fan minnu bi kɔgɔ-yi dumɛ rɔ, wonubɛ dugu-kolo-fannu ni Mari tanto.

⁸A banda-nyin-masɔgɔ wo, a banda-kolo wo, a banda wo, a duru wo, a fɔn-digidigi-wa wo, wo bɛɛ ye Mari kuman-kan birala ka a tanto.

⁹Kɔnkɛnu anubɛ gburukulinu wo, gbɔ-fannu anubɛ gbɔngbɔn-kɔnnu wo,

¹⁰a firarɔ-sogo wo, a so-burɔ-sogo wo, a sagan-fen wo, a koni wo, wo bɛɛ ni Mari tanto.

¹¹Mansɛ anubɛ ala mɔgɛnu wo, a kandɛ anubɛ a mɔgɔ-ba-toenu wo,

¹²a sunkurun-mɛsɛ wo, a kemini-mɛsɛ wo, a denni wo, a kina wo, wonu damasi ni Mari tanto.

¹³Wonu damasi ni Mari tanto. A tɔgɛ kolo tɔgɛ bɛɛ ko. Ala gbiliyɛ kolo fan bɛɛ ko minnu bi san-kole anubɛ dugu-kole ma.

¹⁴A ara ata mɔgɛnu tagbɛlɛya gbon! Woletɔ anu bi a tantola, ado ala Isirɛla mɔgɛnu di a ye kati! Bɛɛ ni Mari tanto!