Read Kuranko Yaburi 25 Bible Online

Yaburi 25 - Kuranko bible

Yaburi 25

¹Mari, n bi i madiyala.

²Nde lanɛ ile, nta Alla le la. I kana sɔn, n yogenu ni n nɔ. N kana miliya anu ye.

³Min lanɛ i la a nya-bɛrɛbɛrɛ ma, i ti wo tigi baya mumɛ! Kɔnɔ minnu bi murutiyala ile ma, wonu bolo-labiranɛ si to.

⁴Mari, n karan alako n ni i kɛ-nyanu lɔn iko i ye nyinina n ma nya min.

⁵N karan alako n ni i sako lɔn ka a bira bawo ile le nta Alla la min si n kisi. N lanɛ i la tumɛ bɛɛ.

⁶E, Mari, i wara ila keninteyɛ anubɛ ila kinikinɛ min kɛ ma ye nun kebi fɔlɔ, i ni i hɛnkili to wo ko.

⁷N bara hakɛ anubɛ ko-yogomɛ minnu kɛ nun nna denniya-wati rɔ, i ni n makoto wonu na. I ni i hɛnkili to n ko bawo ila mɔgɛnu di i ye, ado a di i ye, i ni ko-nyimɛnu kɛ anu ye.

⁸Mari ye hakɛ-tiginu karanna ka anu natelen bawo Mari telennɛ, ado a sɔn kin.

⁹Mari ye kila-nyimɛ yirala mɔgɔ-famayiginɛnu na. A si anu karan alako anu ni a sako lɔn.

¹⁰Minnu bi ata sarama-kan birala, a si ala telenbagayɛ anubɛ keninteyɛ yira wonu na.

¹¹E, Mari, n makoto n hakɛ-siyamɛ la iko i wara lanyiri kiri n ye nya min.

¹²Minnu bi ile Marita tɔnnu birala, a si to wonu makaranna alako anu ni ita kilɛ tagama.

¹³Wonu si ma fen-tiginu na, ado nyamanɛ si to anuna dannu ye.

¹⁴Ile Mari diyana-mɔgɛ le tɔn-biralɛnu na. I ye ita sarama-kan yirala anu na.

¹⁵N yɛ bɛnnɛ Mari ma dɛnbɛnɛ wara-koe rɔ tuma-wo-tuma. A ye n tankala masibɛ ma.

¹⁶A ni a ya-lamunun n na ka kinikini n ma bawo n kelen pe le, ado n tafaganɛ.

¹⁷A ni n bɔ n hɔnya-koenu tɔ ka n kisi nna tɔrɔyɛ bɛɛ ma.

¹⁸A ni a fonde lamiri nta yakɔrɔ-mamɔɛ ma ka n makoto n hakɛ bɛɛ la.

¹⁹Mari, i ni n yogenu siyaya-bole mafɛlɛn. A mafɛlɛn, n gboyanɛ anu ye nya min.

²⁰I ni n natanka ka n nakisi. A ma, anu kana n nɔ. N bara na alako i ni n nakisi.

²¹A ma, nna nyimayɛ anubɛ nna telenbagayɛ ni n namara bawo n yigi sanɛ i kuma.

²²E, Alla, i yandi, ila Isirɛla mɔgɛ bɛɛ kisi ka anu bɔ anuta tɔrɔyɛ bɛɛ rɔ.