Read Kuranko Yaburi 27 Bible Online

Yaburi 27 - Kuranko bible

Yaburi 27

¹Mari le si waan raka n ye ka n kisi. N ti kilan mɔgɔ-wo-mɔgɔ la. Mari le ye n natankala masiba-koe bɛɛ ma woletɔ n ti kilan fenfen na.

²Karagbɛlɛnu ba wuli n kan ma ko anu ni n faga, anu si anu kiannu natugu ka bui.

³Hali kɛlɛ-dan mumɛ ya n nafoo, n ti kilan anu na. Hali kɛlɛ buira n ma, n yigi sanɛ Alla rɔ.

⁴N bara Mari manyinika ko kelen pe lela ko ma. N bi nyinina wo le ma a bolo, wo le, ka n siyi-tele mumɛ bɛɛ dunu Mari Bato-Bɔn la. Wo si a ma, n ni to kawala ata nyimayɛ ma nyɔ rɔ ka to hɛnkili sɔrɔnna a bolo.

⁵N tenbi tɔrɔyɛ rɔ, a si n nakanan. A si n nakanan ata Bato-Bɔn la. A si n sigi fara-kolo-wɛ kuma n si kisi kan min.

⁶N yoge min bɛɛsi ye nna foolɛ rɔ, n si nɔ-ko sɔrɔn wonu ma. N ba sarakɛ bɔ Mari Bato-Bɔn la tumɛ min, n sewanɛ si n kuli mayɛlɛ. N si Mari-tanto-sigi sa.

⁷Mari, i yandi, n ba i rakele, i ni a lamɔɛn. I ni kinikini n ma ka a labira.

⁸Mari, i ya a fɔ n ma wati min ko n ni i bato, n ma n kun tadu. N nara le.

⁹I kana i nyɛrɛ dogon n ma. I kana diminya n ma ka n gben. Kebi fɔlɔ, n dɛnbɛnɛ le ile la woletɔ i kana n boloka. E, Alla, nna kisilɛ le ile la.

¹⁰Hali n fa anubɛ n na wa n boloka, ile Mari si n kumafɛlɛn.

¹¹Mari, a sɔgɛ ye i la, n ni min ma, i ni n karan wo la. N kunyɛ sɔ kan-tina-latankanɛ la bawo n yogenu siya pɔ!

¹²I kana n gbala n yogenu bolo la minnu bi n tagbɛrɛnna foninyɛ la.

¹³N ya a lɔn serr, ko fɔ n ba to n niyi la ha n ni Marita kɛ-nya-nyimɛ yen n yɛ la.

¹⁴Ma ni la Mari la. Ma kana bandan. Ma ni to Mari makɔnɔna tolon!