Read Kuranko Yaburi 28 Bible Online

Yaburi 28 - Kuranko bible

Yaburi 28

¹E, n natankalɛ Mari, n bi dila i dala n dɛnbɛn-koe la. I wɔlɔ matɔlɔ n di-kɛ-kan la. Ni ile ma n yabi, n basantoe le lakira-mɔgɛnu na.

²N tenbi dila i dala n dɛnbɛn-koe rɔ, i ni a lamɔɛn. N ba n bole rasagan san ma i madiya tinɛ ita Bato-Bon-sɛnimɛ wara la, i ni nna madiyali-kan lamɔɛn.

³I kana i ban n na ka mabɛ karagbɛlɛnu to da kelen tɔ. Mɔgɛ le wonu na, anu da radi kɔnɔ gboyanayɛ ye anu yisi rɔ.

⁴ Anu tɔrɔ anuna ko-yogomɛnuna ko la. Anu tɔrɔ anuna kɛwɔli-yogomɛnuna ko la. Anu tɔrɔ iko a bɛnta, anu ni tɔrɔ nya min.

⁵Anu ma anu miri ile Marita wɔli-nyimɛ ma, ni wo ma, ka anu miri ita ko-ladannɛ ma. Wola ko la, i si anu tɔrɔ ka anu kasara pɔɔ! Anu ti sɔ a kurɛ la tun!

⁶Ma ni Mari tanto wona bawo a ara nna madiyali-kan lamɔɛn n dɛnbɛn-koe rɔ.

⁷N natankalɛ anubɛ n nakanannɛ le ale Mari la bawo n lanɛ a la. A ye n dɛnbɛna ka n nanyagalen woletɔ n si sewa-bɛtinu bɔ a ye.

⁸Ile Mari si ila mɔgɛnu nakanan. I si ita mansa-yabɔnɛ kumafunfan ka a lakisi.

⁹E, Mari, ila mɔgɛnu nakisi. I ni ita duwɛ layigi anu kuma. I ni ma anu makandannɛ la iko saga-kandanna-nyimɛ si sagɛnu makandan nya min. I ni to anu fɛ-birala tɛban!