Read Kuranko Yaburi 30 Bible Online

Yaburi 30 - Kuranko bible

Yaburi 30

¹Mari, n si i tanto bawo i wara n nakisi. I ya a ma, n yogenu ma yɛlɛn n ma.

²Nta Mari Alla, n ya i rakele n dɛnbɛn-koe ma, ado i ya n nakɛndɛya.

³Mari, i ya n niyi lasɛgi n tɔ. I ma sɔn n ni ta lakira. A ara to nun se, n ni ta kolo-gbɛ-dugu kɔnɔ ile ya n niyi lasɛgi n ma.

⁴Wole Allata mɔgɛnu, wo ni bɛti bɔ ka a matɔgɔ. Wo ni wo miri ata kabana-koenu ma ale Mari-sɛnimɛ ara minnu ma ka baraka bira a ye wonuna ko la.

⁵Ala fondo-bɔɛ mani de iko ya-makeri kelan kɔnɔ dan sa ala nyimayɛ wo la. Ya-yi si to yigila suyi rɔ kɔnɔ sɔgɔma, diyi wo si a laban a bolo nyagalan ma.

⁶N bara-koe tara a kilɛ fɛ min kɛ, n ya a lɔn wo le ma ko laa-wo-laa ti taran n na.

⁷Mari, i ye n fɛ wati min, n tagbɛlɛ iko kɔnkɛ. Kɔnɔ i ya i kan-kɔ sɔ n na wati min, n yisi tinyanta.

⁸Mari, n ya i rakele ka i madiya n dɛnbɛn-koe la.

⁹N ya a fɔ i ye ko ni n fagara, tɔnɔ-nyamintan bi wo la i ma? Ni n sanɛ kanbɛ le tɔ nun, wo si nfen nyinya i ma? Furi si ke i matɔgɔla, wa? Furi si ke ila telenbagayɛ wara-koe rakaranna mɔgɛnu ye, wa?

¹⁰Mari, n kan lamɔɛn ka kinikini n ma. I yandi, Mari, n dɛnbɛ.

¹¹I wara nna diyi yɛlɛma n ye sewɛ la. I wara di-kɛ-bɔrɛ bɔ n kan na ka sewa-bɔrɛ don n kan na wo gbɛ rɔ.

¹²Wo le ya a ma, n tora tantoli-sigi sala i ye. N ma n made muk! Nta Mari Alla, n si to baraka birala i ye burubukai!