Read Kuranko Yaburi 38 Bible Online

Yaburi 38 - Kuranko bible

Yaburi 38

¹E, Mari, ni i kɔrɔtɔnɛ wati min, i kana n tɔrɔ.

²I wara n madumɛ ila kalabɛnnu na nun. I kɔɛn ara n gbesi dugi la.

³Ka a tɛgɛ ila diminyɛ wo ma, dumɛ ara tagbaya n ma. Ka a tɛgɛ nna hakɛ ma, n fɛrɛ kɛ bira-tina sa kirayɛ bolo.

⁴N buinɛ nna hakɛ tɛma iko mɔgɔ si to bɛ rɔ nya min. Nna hakɛ wonu gbili iko mɔgɔ ti ke dunɛ min na.

⁵N bara kun-takolonyɛ ma min kɛ, nna tɛlɛnu sumɛ ye bɔla.

⁶N yisi tinyanta dɔgɔma-ma-de! N ti ke n nasɔla tun. Telen-gbɛn, n bi dila.

⁷Kimɛ donta n kun na. A tora sɛ, n ni faga.

⁸N sɛnbɛ ara tɛgɛ yisi-tinya bolo yadi! N tora kurunna yisi-tinya bolo.

⁹E, Mari, i ya a lɔn serr, ko n bi nyinina nna kɛndɛya-koe le ma. I ye n kurun-kan bɛɛ lamɔɛnna.

¹⁰N yisi ye tugula biubiu! N sɛnbɛ ara ban. N yɛ bɛɛ ara ma dɔɔlɛ!

¹¹N diyana-mɔgɔ-bɛrɛnu anubɛ n sigi-nyɔgɛnu sa anu gbɛrɛnna n ma ka a tɛgɛ nna tɛlɛnuna ko ma. Hali n na-kelen-nyɔgɔ-bɛrɛnu, anu sa anu gbɛrɛnna n ma.

¹²N faga-sɔgɛ ye minnu na, wonu bi yili lasigila n ye. N madumɛ-sɔgɛ ye minnu na, wonu bi yanfɛ kirila n ma n tinya-koe la. Anu sa anu farala yanfɛ kirila n ma.

¹³N sɔnɛ iko tolo-gbere. N manɛ iko bobe.

¹⁴N manɛ iko mɔgɛ min ti mɔgɛ yabi bawo a sa ko lamɔɛnna.

¹⁵Kɔnɔ n lara ile Mari la. Ile n tigi Alla si n yabi.

¹⁶I kana sɔn, n yogenu ni yɛlɛn n ma nna tɔrɔyɛla ko la. Anu kana nyagalen bawo n bara bui.

¹⁷Ka a tɛgɛ nna dumɛ kɛ ma, a ara to doni, n ni mɔlɔkɔn.

¹⁸N ya n sɔ nna hakɛ la. Nna hakɛ ara n yisi gbala n tɔ don!

¹⁹N yogenu kɛndɛ, ado anu tagbɛlɛ. N ma n sɔgɔ-labɔ-kunya yen n yoge siyamɛnu na.

²⁰Minnu bi ko-nyimɛ sarala ko-yoge la, wonu bi n kan ma bawo n bi n tayala ko-latelennɛ kɛ tinɛ.

²¹E, Mari, i kana n boloka. Nta Alla, i kana i masɛgi n na!

²²Nna kisilɛ anubɛ n tigi Mari, n madɛnbɛ tiriya!