Read Kuranko Yaburi 39 Bible Online

Yaburi 39 - Kuranko bible

Yaburi 39

¹N ya a fɔ ko, “N tenbi koe min mala, n ni a ma n fɛrɛma. N ti sɔn, n dɛ ni n bila hakɛ rɔ. Karagbɛlɛnu tenbi n dafɛ, n si n tade don!”

²Hali ko-nyimɛ wara-koe rɔ, n ma fenfen fɔ. N ya a sigi-a-la yen! Kɔnɔ hali wo, nna tɔrɔyɛ kuma-sara.

³N kɔndɔfilita pirikali! N bi tola n mirila nya min, nna tɔrɔyɛ ma ye tola kofula wo nya na le. Wo le ya a ma, n ya nyinikalɛ sa, n ko,

⁴“Mari, n si to n niyi la ha wati nyamintan gbɛ? N bi fagala min tuma? N niyi ye bɔla wati min, wo fɔ n ye.”

⁵I wara n siyi-fɛ wuruya. Fenfen ma nde niyi la i yala. Hadama-dan bɛɛ niyi mani de iko ni-lafɛ kelan i yala.

⁶A si sama iko ninɛ. Hadama-dan ye koe min bɛɛsi mala, fu le wo la ile yala. Hali a ya nɔnfuli ladɛn bui, mɔgɔ-wo-mɔgɔ ma a lɔn wo ye a labanna min bolo.

⁷Mari, yigi-mintan bi n bolo gbɛ? N yigi bɛnnɛ ile le ma gbɛ!

⁸N kisi nna hakɛ dama ma. I kana sɔn, kun-takolɔnnu ni yɛlɛn n ma.

⁹N si n tade don. N ti fenfen fɔ bawo ile nyɛrɛ le ya a ma, n ya tɔrɔya-sufa kɛ sɔrɔn.

¹⁰I yandi! I kana n tɔrɔ tun! Ka a tɛgɛ i ye n tagbesi min kɛla, a ara to sɛ, n niyi ni bɔ.

¹¹I ye mɔgɔ makumala ala hakɛla ko la. Alla si mɔgɛ diyana-koe ban iko tunbinu si kɔn-gbɔɛ dɔn nya min. Hadama-dan bɛɛ niyi mani de iko ni-lafɛ kelan i yala.

¹²Mari, nta madiyali-kan lamɔɛn. I ni i wɔlɔ matɔlɔ n di-kɛ-kan la. N tenbi dila, i ni na n dɛnbɛ. Sundan le nde la i bolo wati-kundu-ni kɔrɔ iko n benbanu bi nya min nun.

¹³I masɛgi n na alako n ni sewa tun. A ti mɛ tun, n si a fesakɔrɔ ka faga.