Read Kuranko Yaburi 41 Bible Online

Yaburi 41 - Kuranko bible

Yaburi 41

¹Mɔgɔ-sewanɛ le wo tigi la min si kinikini bolo-kolɔnnu ma bawo anu denu fanan tenbi yakɔrɔ-mamɔɛ rɔ, Mari si anu dɛnbɛ.

²Mari si anu nakanan ka anu niyi lakisi. A si a ma, anu ni taran anu diya anuna nyamanɛ rɔ. Mari ti sɔn anu don-koe ma anu yogenu bolo.

³Anu tenbi kirayɛ rɔ, Mari si anu dɛnbɛ. A si anu nakɛndɛya tun.

⁴N ya a fɔ ko, “N bara hakɛ kɛ ile Mari la nun. I ni kinikini n ma ka n nakɛndɛya.”

⁵N yogenu bi kuma-yogomɛnu fɔla nna ko rɔ. A sɔgɛ ye anu na, n ni faga alako mɔgɛnu ni nyina n ko salon!

⁶Minnu bi nala n kɔndɔn tinɛ, nagan-fila-tigi le wonu na. Wonu bi nala n bara ko-yogomɛ-lɔn-koe rɔ ka ta wo rakaran mɔgɛnu ye.

⁷N gboyana-mɔgɛnu bi wɛwɛ sala anu nyɔgɔn ye n bara-koe rɔ. Anu bi anu mirila ko-yogomɛ ma n tɔgɔ rɔ.

⁸Anu bi a fɔla n ma ko, “Kɛ fagamatoe le kɛ la. Kɛ ti a lasɔ tun.”

⁹ Hali n lara n kenite-bɛrɛbɛrɛ min na, ma ye ma bole layigila miran kelen tɔ, wo fanan bara a kan-kɔ sɔ n na.

¹⁰E, Mari, i yandi, kinikini n ma ka n nakɛndɛya alako n ni n tayili sara n yogenu na.

¹¹Anu ti n nɔ wo rɔ. N si a lɔn wo le ma ko n bara-koe ara ile Mari hɛnɛ.

¹²Bawo n bi ko-latelennɛ kɛla, woletɔ i ye n dɛnbɛna. I si a ma, n ni to i fɛ tɛban!

¹³ Ma ni baraka bira Isirɛlata Mari Alla ye. Ma ni a tanto bi ha habadan! Amina! Amina!