Read Kuranko Yaburi 51 Bible Online

Yaburi 51 - Kuranko bible

Yaburi 51

¹E, Alla, i yandi, kinikini n ma ka a tɛgɛ ita hinɛ ma. N hakɛ firan n ma ka a tɛgɛ ita kinikinɛla ko ma.

²I ni n yisi ku alako a ni gbɛ. I ni n yesi ka n hakɛ bɔ n ma.

³N ya nta yulumunu lɔn. N hakɛ ye n yakɔrɔ tolon!

⁴ N bara hakɛ min kɛ, n bara bila ile Alla le fɔlɔfɔlɔn na. N bara karagbɛlɛya-siyaman kɛ i yala. Woletɔ n tɔrɛ i bolo, wo bɛnta, ado n yilikiyi i bolo, wo telenta le, yɔ!

⁵Kebi n na ya n buyi bi tumɛ min, n bi nta sɔn-yogoyɛ kɛ la n bolo.

⁶Kɔnɔ ile ye nyinina min ma n yisi rɔ fɔ ko-latelennɛ anubɛ tonyɛ dɔrɔn. I ni n sɔndɔmɛ lafa ita hɛnkilimayɛ la.

⁷N hakɛ bɔ n ma alako n ni gbɛ. N mayesi. N ni gbɛ ka tenbi bɛgi-gbɛ la.

⁸Nyagalan anubɛ sewɛ lana n yisi rɔ tun. Hali i wara n tatɛrɛgbɛn, n si sewa i bolo tun, yɔ!

⁹I kolan bɔ n hakɛ la. N sɔn-yogomɛ bɛɛ firan n na feu!

¹⁰E, Alla, n yisi kurakuraya. I ni sɔndɔma-kurɛ ladon n burɔ.

¹¹I kana n gben i fɛ. I kana ita niyi bɔ n tɔ.

¹²A ma, n ni ita kisi-ko-sewɛ sɔrɔn tun. I sako-kɛ-yisi ladon n burɔ.

¹³Woletɔ n si hakɛ-tiginu karan ita tɔnnu ma alako anu ni sɛgi i ma.

¹⁴E, Alla, n bara niyi min bɔ, n makoto wola ko la. Wo kɔma, i wara n nakisi nya min, n si sigi sa ila telenbagayɛ wola ko la.

¹⁵E, n tigi, ni i ya n dɛ fulen, n si i matɔgɔ ka i tanto.

¹⁶Ni i ye nyinina sarakɛ le ma nun, n si wo bɔ le kɔnɔ saraka-mintantɛ ti i hɛnɛ.

¹⁷E, Alla, ndeta sarakɛ ye min na, wo le famayigi la. Ile Alla ye nyinina min ma bɛrɛbɛrɛkɛ, wo le mɔgɛ yisi wa tinya a sɔn-yogomɛla ko la.

¹⁸E, Alla, i ni ko-nyimɛ kɛ mata so-karantan ye, Yerusalɛm, kɔni. I ni a tarɛ sɔ kura kɛ tun.

¹⁹Wo kɔma, i ni na to sewala saraka-mabɛnnɛnu na. Mata saraka-mintan-sumɛ si a diya don i rɔ tun. Ma si turɛnu mintan ila saraka-mintan-tinɛ kuma gburr!