Read Kuranko Yaburi 59 Bible Online

Yaburi 59 - Kuranko bible

Yaburi 59

¹E, nta Alla, n tanka n yogenu masibɛ ma. N tanka n yogenu ma minnu bi tugula n kan ma.

²N kanan masiba-mɔgɛnu ma. N bɔ mɔgɔ-fagalɛnu bolo.

³I ma a yen, anu bi n makɔnɔna n ni-bɔ-koe ma. Wunduyogenu bi anu kundɛnna n kan ma hali n ma ko tinya anu ma.

⁴Bɛɛ burumatoe ye tala anu sɔ tinɛ rabɛnna n kan ma hali fɛɛ sa n na.

⁵E, Mari Alla Sɛnbɛ-Bɛɛ-Tigi, i lakɔɛnma, i ni na n dɛnbɛ. E, Isirɛlata Alla, na a yen i nyɛrɛ kolan la. I ni kunden ka mɔgɛ kɛnu tɔrɔ min ma i lɔn. I kana kinikini ma madɔnnɛ kɛnu ma.

⁶Wura-wo-wura, anu si sɛgi soe. Anu bi belenna kurunna anu nyɔgɔn ma iko wulu-feremɛnu tenbi basanni soe la.

⁷I wɔlɔ matɔlɔ n tasɛ-kumɛ la anu bolo. Anu nagan mani de iko faan-damɛ. Anu miri ko mɔgɔ-wo-mɔgɔ sa anu kan lamɔɛnna.

⁸Kɔnɔ ile, Mari ye yɛlɛnna anu ma dɛɛ! Ado nfan, Alla-lɔnbɛlɛ-sibolenu lafɛyɛ bɛnta ile le ma.

⁹N lara ileta sɛnbɛ la dɔgɔma-ma-de! E, Alla, n natankalɛ le ile la.

¹⁰N di nta Alla ye tɛban! A si n nabɛn. Lunyɛ do, i si n yogenu nɔ nya min, n ni wo yen n yɛ la.

¹¹E, Alla, i kana anu faga nya-kun-kelen. I ni a ma, nna mɔgɛnu kana nyina, i si i yogenu tɔrɔ nya min. Anu tanyɛnsɛn ita sɛnbɛ la ka anu nɔ feu! E, Mari, ma latankalɛ le ile la.

¹²Anu bi kumɛ min nabɔla anu da rɔ, wo ye a yirala ko hakɛ-tigi le anu na. Alamɛ anuna wasinteyɛ mara anu bira-fan la. I ni anu kasara wola ko la bawo anu bi dankali-kɛla ka foninyɛ fɔ. I ni anu nato dogbe ita fondo-labɔɛ rɔ! Wo si a ma, bɛɛ ni a lɔn ko ile letan Isirɛla mɔgɛnu na, ado ila mansayɛ ye duninya mumɛ bɛɛ kun na.

¹⁴Wura-wo-wura, n yogenu si sɛgi soe, anu bi belenna kurunna anu nyɔgɔn ma iko wulu-feremɛnu tenbi basanni soe la.

¹⁵Anu bi iko wuli min bi soe yɛnyɛnna dɔnta-nyinɛ la. Ni a ma a bɔ anu bolo, anu ni to kurunna.

¹⁶Kɔnɔ nde si ita fankalamaya-sigi sa. Ka a tɛgɛ ila hinɛ ma, n si n kuli mayɛlɛ sigi sa tinɛ sɔgɔma-wo-sɔgɔma. N natanka tinɛ le ile la. I mara n kisi tinɛ la n tɔrɔya-wati rɔ.

¹⁷N si i matɔgɔ-sigi sa ko, “Sɛnbɛ-tigi le ile la.” N si a fɔ fanan ko, “E, Alla, ile le kelen pe si n nakanan.” Ile le kelen pe si n keni bɛrɛbɛrɛkɛ!