Read Kuranko Yaburi 68 Bible Online

Yaburi 68 - Kuranko bible

Yaburi 68

¹Alla si a lakɔɛnma ka a yogenu tanyɛnsɛn. A gbo minnu ye, wonu si anu buri a kɔrɔ.

²A si anu gben iko fɔnyɔ si ta-sisi gben nya min. Karagbɛlɛnu si taran Alla tontɛ kɔrɔ, iko tɛ si kɛɛn lalee nya min.

³Kɔnɔ telenbagɛnu si sewa a yakɔrɔ. Anu si nyagalen ka a lawɔyɔ sewɛ bolo.

⁴Wo ni sigi sa Alla ye ka a tɔgɛ tanto. Wo ni kilɛ laka a ye, ale min siginɛ banda-fin-gbɛ[11] rɔ. A bɛnnɛ, wo ni sewa a yala bawo Mari le ale la.

⁵Alla min siginɛ a Bato-Bon-sɛnimɛ la, a kolan sanɛ kelennɛnu anubɛ kɛɛ-musinu fɛ.

⁶Ni mɔgɔ sa min bolo, a si mɔgɛ di wo ma. A si mɔgɔ-biranɛnu boloka ka anu nasewa. Kɔnɔ mɔgɔ-murutiyanɛnu si sigi nyamani-takolɔn rɔ.

⁷E, Alla, i sɔnɛ ila mɔgɛnu yarɔ tumɛ min, ka anu nayilan-yilan wulɛ rɔ,

⁸ dugi yɛrɛyɛrɛnta, bandɛ ya a dɛ bɔ a kɔrɔ bawo ile Isirɛlata Alla ya i nyɛrɛ yira anu na Sinayi kɔnkɛ kuma.

⁹Dugi magbalata tumɛ min, i ya banda-yi-siyaman nana a kuma

¹⁰wo kɔma, ila mɔgɛnu sigira nyɔ rɔ. Ila kinikini le ya a ma, bolo-kolɔnnu ya anu beli-fannu sɔrɔn.

¹¹Mari kumara nya min wo, mɔgɔ-siyaman tara kilayɛ wonu na anu bolo.

¹²Anu bi tala a fɔla ko, “Mansɛnu anubɛ anuna kɛlɛ-dannu bi anu burila.” Mɔgɔ-burinɛ wonu ya miran minnu to, musinu bi wonu farala anu nyɔgɔn na.

¹³Hali wole minnu tora saga-wɔrɛ makandan tinɛ, wole si kura-kangbɔɛla muninyɛnu sɔrɔn nun wodi-gbɛ sanɛ minnu kanban ma, ado anu tiyi ye malan-malanna iko sɛnɛ.

¹⁴Mari Sɛnbɛ-Bɛɛ-Tigi ya a yogenu anubɛ anuna mansɛnu tanyɛnsɛn iko fɔnyɔ ya bandan-fuyi ranyɛnsɛn nya min Salamona kɔnkɛ kuma.

¹⁵Basan kɔnkɛ, kɔnkɔ-kinama-wɛ le wo la min bolɔn siya a ma.

¹⁶Wole min bi bɛsi-kɔɛ kun na Basan kɔnkɛ ma, nfenna wo ye Allata mɔgɛnu makeliyala minnu bi a bato tinɛ a nyɛrɛta kɔnkɔ-yabɔnɛ ma? Ado nfan, Mari mayiginɛ nyɔ le habadan!

¹⁷N tigi ye bɔla Sinayi wulɛ rɔ ka ta a Bato-Bɔn la. A si na kirindi waga-yirika-siyaman na a bolo.

¹⁸ A ara yɛlɛ ala kɔnkɛ kuma mɔgɔ-biranɛnu na a bolo. A ye kɔ-fannu birala hali mɔgɔ-murutiyanɛnu bolo. Mari Alla si a mayigi nyɔ.

¹⁹Ma ni ma tigi tanto min bi mala tɔrɔyɛ bila tuma-wo-tuma. Alla le wo la min si ma kisi.

²⁰Mata Alla le ma kisilɛ la. Ale ma tigi, wo le si ma latanka sayɛ ma.

²¹Fɔ Alla wa a yogenu kunyɛ ratii minnu bara anu to anuna karagbɛlɛyɛ ma, kɔni.

²²Ma tigi ara a fɔ nun ko a si na ma yogenu na ka bɔ Basan nyamanɛ rɔ. A ko a si na anu na ka bɔ kɔgɔ-yi fanan kɔrɔ

²³alako ma ni to tagama-tagamana yele rɔ. Wo kɔma, a ko wulinu ni to anu yele manɛla ha a ni anu tabɔ.

²⁴E, Alla, bɛɛ ara ila nɔli-tolon yen. Ile Alla min bi mata mansɛ la, i ye tala i Bato-Bɔn la.

²⁵Sigi-salɛnu bi yarɔ, fɔli-kɛlɛnu bi i kɔma. Sunkurɔn minnu bi wasanbɛ lamagala, wonu bi anu tɛma.

²⁶Anu bi a fɔla ko, “Wole ata mɔgɛ minnu bi ladɛn rɔ, wo ni tabarakala bira Alla ma. Wole Yakoba kegeyɛnu ni Mari tanto.”

²⁷Bɛnyamɛ bɔnsɔn fɔlɔfɔlɔn bi nala min dɔgɔ bɔnsɔn bɛɛ ko. Yuda bɔnsɔn-kun-tiginu tugunnɛ wonu na. Sɛbulɔn bɔnsɔn anubɛ Nafatali bɔnsɔn-kun-tiginu tugunnɛ kɛnu fanan na.

²⁸E, Alla, i sɛnbɛ yira ma la. I ya ma kunka sɛnbɛ min na, wo yira ma la.

²⁹Mansɛnu bi nala i kɔ-fannu na ka a tɛgɛ i Bato-Bɔn ma Yerusalɛm soe burɔ.

³⁰I ni Iyipiti makuma min nyɛɛnɛ iko yi-mɛlɛ tenbi sɔnfɔn-kurinu tɛma. I ni sibole doinu makuma minnu nyɛɛnɛ iko turɛnu bi mɔgɛnu tɛma nya min. Anu makuma ha anu ni anu sa i kɔrɔ ka wodi-gbɛ ma anu madiyali-kɛ-fan la. Kɛlɛ di minnu ye, i ni wonu tanyɛnsɛn.

³¹Kun-tiginu si bɔ Iyipiti nyamanɛ rɔ. Sudan kɛnu si anu bole sigi Alla ye ka madiyali kɛ.

³²Wole sibolo-kurɔnnu, wo ni bɛtinu bɔ Alla ye. Wo ni tantoli-bɛtinu bɔ ma tigi ye.

³³Alla min bi san-kole rɔ kebi fɔlɔ, wo ni siginu sa a ye. Wo ni wo tole masɔ. A si a labira a kulu-mayɛlɛnɛ la.

³⁴Wo ni a fɔ ko Alla, sɛnbɛ-bɛɛ-tigi le. A ye Isirɛla mɔgɛnu kun na mansayɛ la. Hali Arinyɛni tɔ, sɛnbɛ ye a bolo.

³⁵Isirɛlata Alla tenbi bɔla ala kan-tina-sɛnimɛ rɔ, a makilannɛ. A si sɛnbɛ di ala mɔgɛnu ma. Alla tanto!