Read Kuranko Yaburi 7 Bible Online

Yaburi 7 - Kuranko bible

Yaburi 7

¹E, nta Mari Alla, n bara na i wara n natanka-koe la. N yoge minnu bi n sagaranna, n tanka wonu masibɛ ma.

²Ni wo ma, anu si ta n kɔrɔn-kɔrɔnna iko yarɛ si ta a dɔntɛ kɔrɔn-kɔrɔnna nya min. Anu si n tafarafara, ado wo wati rɔ, mɔgɔ-wo-mɔgɔ ti ke n nakisila.

³E, nta Mari Alla, ni n bara mɔgɛ do kensun wo, ni n bara n diyana-mɔgɛ don a yogenu bolo wo, ni n bara bui n yoge do ma wo, ado a ma ko ma n na, ni nde ara kɛ do-wo-do ma,

⁵alamɛ n yogenu ya n sagaran ka n bira. Alamɛ n yogenu ya n tatɛntɛn ka n fofo-rakolɔn to sani dugi ma.

⁶Mari, i lakɔɛnma. Ila fondo-labɔɛ yira n yogenu na. N yogenuna yisi-bɔɛ min kɛnɛ n kan ma, i ni tɔn sigi wo la. I ni tonyɛ di tonya-tigi ma.

⁷I ni sibole bɛɛsi kundɛn ila foolɛ rɔ. I ni ma anuna mansɛ la san-kole rɔ.

⁸Mɔgɛ bɛɛta kiti-tɛgɛlɛ le ile la. E, Mari min bi fan bɛɛ kun na, i si yo di nde ma bawo i ya a lɔn ko fɛɛ sa nde la.

⁹ Telenbagɛ le ile Alla la. I ya ma miriya anubɛ ma diyana-koe bɛɛ lɔn. I ni tɔn sigi karagbɛlɛnuna karagbɛlɛyɛ la. I ni mɔgɔ-nyimɛnu sara.

¹⁰Ile Alla min bi fan bɛɛ kun na, n natankalɛ le ile la. Minnu bi ila kumɛ birala, i kɛnɛna wonu nakisila.

¹¹Kiti-tɛgɛla-telenbagɛ le ile la. I ye karagbɛlɛyɛ yilikila le burubukai!

¹²Ni mɔgɔ ma fara hakɛ kɛla, ile Alla ye ila faan dɛ lasala wo tigi tɔgɔ rɔ. I ye ila kalɛ rasaganna ka a bɛn wo tigi ma.

¹³I ye ila kalabɛn birala i kɔɛn la ka tɛ tugu wo sungban la.

¹⁴Wo ara a yen, mɔgɔ-yogomɛnu si buyi bi karagbɛlɛyɛ la, ko-yogomɛ ni to koloyala a burɔ, a si muin tɔrɔyɛ anubɛ yanfanteyɛ la mɔgɛnu ye.

¹⁵Kɔnɔ anu bi gbɛrɛ min nasigila mɔgɛnu ye, anu denu denu bi birala wo la.

¹⁶Anu bi tɔrɔyɛ min saganna anu ta-nyɔgɛnu tɔgɔ rɔ, wo ye sigila anu nyɛrɛ le ma. Anuta karagbɛlɛyɛ wo ye yigila anu denu denu kun-kole ma.

¹⁷N si baraka bira ile Mari ye ka a tɛgɛ ila telenbagayɛla ko ma. Ile Mari min bi fan bɛɛ kun na, n bi matɔgɔ-bɛti bɔla ile ye.