Read Kuranko Yaburi 71 Bible Online

Yaburi 71 - Kuranko bible

Yaburi 71

¹Mari, n bara na i wara n natanka-koe la. I ni a ma, n yogenu kana n namiliya.

²N dɛnbɛ ka n nakisi bawo i telenta. I wɔlɔ matɔlɔ n na ka n nakanan.

³I ni ma nta lakisi-bɔn la min si n tanka n yogenu masibɛ ma. Nta bon-gbɛlɛmɛ anubɛ nna kɛlɛ-kɛlɛ le ile la. N si n buri tala ile wara tuma-wo-tuma.

⁴Nta Alla, n bɔ karagbɛlɛnu bolo. N bɔ wunduyogenu sɛnbɛ kɔrɔ.

⁵Ma tigi Mari Alla, n yigi sanɛ ile le tɔ, ado kebi n dennɛ, n ya nna lanayɛ sa ile le tɔ.

⁶N ya n to ile le ma n siyi-tele-bɛɛ kɔrɔ. I ya n natanka kebi n sɔrɔnta lunyɛ min. Tumɛ bɛɛ, fɔ ka i tanto.

⁷N kɛ-nya manɛ misalɛ la mɔgɛnu ye bawo i wara ma n natanka-tina-gbɛlɛmɛ la.

⁸Tuma-wo-tuma, n bi i tantola ka ila gbiliyɛ rakaran mɔgɛnu ye.

⁹I kana i ban n na bawo n bara kinaya. I kana n boloka bawo n ta ara faga.

¹⁰N faga-sɔgɛ ye n yogenu na. Anu bi n tasɛla ka yanfɛ rabɛn n kan ma.

¹¹Anu bi a fɔla ko, “Alla ara ban a bolokala. Ma ni a sagaran ka a bira bawo ala tankala sa.”

¹²E, Alla, i kana ta n ma wula la. Nta Alla, na n dɛnbɛ tiriya!

¹³Minnu bara wuli n kan ma, alamɛ wonu kasarata ka tunu yen! Min tayanɛ n tanban-koe la, alamɛ wonu yarabira n ye.

¹⁴Tumɛ bɛɛ, n yigi sanɛ ile le tɔ. N si i tanto dɛɛ!

¹⁵N si ila wɔli-nyimɛ rakaran. Telen-gbɛn, n bi kumala ila kisi-koela ko la hali a tenbinɛ nna lɔnnɛ la.

¹⁶Ma tigi Mari Alla, n si ila sɛnbɛ matɔgɔ. N si i kelen pela wɔli-nyimɛ fɔ.

¹⁷I ya n nabila kebi n dennɛ, ado ha bi, n bi ila kabana-koe rakaranna.

¹⁸Kaka, n bara kinaya, n kunyɛ ara gbɛ. E, Alla, i kana i ban n na. N tenbi i sɛnbɛ wara-koe rakaranna n mamanɛnu ye, i ni taran n fɛ.

¹⁹E, Alla, ila telenbagayɛ kenɛ fɔɔ san-kole ma. I wara kabana-ko-siyaman kɛ, ado i nyɔgɔn sa.

²⁰I ya tɔrɔyɛ anubɛ dumɛ lana n ma, hali wo, i si na n sɛnbɛ kuraya. I si a ma, n ti yigi kanbɛ rɔ tun.

²¹I si n tɔgɛ makofu ka tenbi a fɔlɔtɛ la. I si a ma, n ni taran n fanbolo tun.

²²N si sɔrɔn fɔ i matɔgɔ tinɛ. Nta Alla, n si i tanto ita lanayɛla ko la. Ile min sɛnima Isirɛla nyamanɛ mumɛ rɔ, n si nna sɔrɔn fɔ ka bɛtinu bɔ i ye.

²³N tenbi tolonna, n bi n kuli mayɛlɛla sewɛ rɔ. N si n sɛnbɛ mumɛ labɔ bawo i wara n kisi.

²⁴Telen-gbɛn, n bi ila telenbagayɛ rakaranna bawo minnu bi ko-yogomɛ sigila n ma, i wara wonu nabui kɔndɔfili rɔ yarabiyi bolo.