Read Kuranko Yaburi 72 Bible Online

Yaburi 72 - Kuranko bible

Yaburi 72

¹E, Alla, mansɛ karan alako a kana lafisayalɛ kɛ kiti tɛgɛ tinɛ. I ni ita telenbagayɛ di a ma.

²Ni i ya wo ma, a ti lafisayalɛ kɛ ila mɔgɛnu kun na. A si bolo-kolɔnnu bira telenbagayɛ rɔ.

³Alamɛ ala nyamanɛ sabatira. Alamɛ ala mɔgɛnu mara mɔgɔ-latelennɛnu na.

⁴Alamɛ mansɛ ya bolo-kolɔnnu kiti telenbagayɛ la. Alamɛ a ya fugarɛnu hayu kasa ka anu yogenu kasara.

⁵Fananta tele anubɛ karɛ ye nyɔ, alamɛ ita mɔgɛnu tora ile Alla batola.

⁶Alamɛ mansɛla mansayɛ ya ala mɔgɛnu munanfaga iko banda-yi ye ki-fannu nasabatila nya min.

⁷Alamɛ telenbagayɛ tora koloyala a siyi-tele-bɛɛ kɔrɔ. Fananta karɛ ye gbɛla, alamɛ ala mɔgɛnu tora ko-nyimɛ sɔrɔnna.

⁸ Ala mansayɛ si a bi kɔgɔ-yi-tonke doi ma ha ka ta ke kɔgɔ-yi-tonke doi la. A si a bi Yufereti bɛ ma ha ka ta ke duninya-dan ma.

⁹Sibolo-gbɛrɛ minnu bi wula-da-rakolɔn rɔ, wonu si anu madu a ye ka a bato. A yogenu fanan si anu nyɛrɛ gbesi dugi la ka bɔnkɛ dɔn.

¹⁰Mansɛ minnu bi Sipeni nyamanɛ pon anubɛ yi-tɛma-duginu tɔ, wonu si kɔ-fannu di a ma. Mansɛ minnu bi Siba nyamanɛ anubɛ Seba nyamanɛnu tɔ, wonu si sanbɛnu di a ma.

¹¹Mansɛ bɛɛ si anu madu a kɔrɔ. Sibole bɛɛ si wɔlɛ kɛ a ye.

¹²Bolo-kolɔnnu ba a rakele, a si wonu nakanan. A ye wo nya na fanan fɛlɛtenɛnu anubɛ mɔgɔ-tɔrɔnɛnu ye.

¹³Sɛnbɛ sa minnu na, a ye kinikinina wonubɛ bolo-kolɔnnu ma. A ye mɔgɔ-tɔrɔnɛnu niyi lakisila.

¹⁴Minnu bi bolo-kolɔn bira boloko-yogomɛ-kɛla ka anu tɔrɔ, ale mansɛ si wonu tɔrɔ bawo bolo-kolɔn wonu niyi-sɔnkɔ sa.

¹⁵Alamɛ mansɛ siyi-fɛ yanyara! I ni a ma, anu ni sɛnɛ di a ma ka bɔ Arabu nyamanɛ rɔ. I ni a ma, anu ni to Alla matarala a ye tuma-wo-tuma. Alamɛ Allata duwɛ tora a kuma habadan!

¹⁶Alamɛ fui-fan siyayara ala nyamanɛ rɔ duk! Alamɛ ki-fan raboroko-barakara kɔnkɛnu tɔ iko a ye Lɛbanan nyamanɛ rɔ nya min. I ni a ma, soenu na ni fa mɔgɛnu na penpen iko binyɛ waranɛ gbɛkolenu ma nya min.

¹⁷I ni a ma, mansɛ tɔgɛ kana tunu mumɛ! I ni a ma, a mankan ni to warala iko tele. Alamɛ sibole bɛɛ ya Alla madiya ko a ni ata duwɛ layigi anu kuma iko a ya duwɛ di mansɛ wo ma nya min. I ni a ma, anu ni to Alla matarala alako mansɛ wo sewanɛ ni to.

¹⁸Ma si Isirɛlata Mari Alla tanto. Ale le kelen pe ye kabana-koe kɛ dama mala.

¹⁹Ma ni to a tɔgɔ-gbiliyanɛ tantola tolon! Alamɛ ata gbiliyɛ ya duninya lafa pen! Amina! Amina!

²⁰Yɛsila den Mansa Dawudata madiyalɛnu kundon le kɛ la.