Read Kuranko Yaburi 77 Bible Online

Yaburi 77 - Kuranko bible

Yaburi 77

¹N bi dila Alla dala. N ba di a dala, a si a lamɔɛn.

²N tenbi tɔrɔyɛ rɔ, n bi n tigi matarala. Ki-kudu, n bole siginɛ Alla ye ka a madiya kɔnɔ n sa yisi-kima sɔrɔnna.

³N ba n miri Alla ma, fɔ di-kɛ-sumɛ si sigi n ma. N ba n miri a ma wɛ kɛ, fɔ n si ma kɔrɔn!

⁴A ye a mala, kinɔgɔ ti sa n yɛ ma. Yisi-tinya ara n tade don!

⁵N sa n mirila tele-tenbinɛnu dɔrɔn ma de kɔnɔ n bi n mirila san-tenbinɛnu fanan ma.

⁶N bi kila n mirila kudu! N tenbi miri kɛ kun na, n bi n nyɛrɛ manyinikala.

⁷N ko, “N tigi si to a banna le ma la, wa? Ma wara-koe ti a hɛnɛ tun, ba?

⁸A ara a ban keninteyɛ yirala ma la le, wa? A sa ala lanyiri kanbalila ma ye tun, ba?

⁹Alla ara a ban kinikinina ma ma le, wa? Ala fondo-bɔɛ ara ala hinanteyɛ-gbɛ bi ma bolo le, wa?”

¹⁰Wo kɔma, n ya a fɔ ko, “Alla Min Bi Fan Bɛɛ Kun Na, wo ya ata fanka mayira kɔrɔma la nya min, a sa a mala wo nya tun, ado wo ye n yisi tɔrɔla.”

¹¹Mari, n yili ye ila wɔli-nyimɛnu ko. I wara ko-makawanɛ minnu kɛ kɔrɔma la, n hɛnkili ye wonu dama ko.

¹²I wara min bɛɛ kɛ, n bi n mirila wonu ma. N bi n hɛnkili lamirila ila kabana-koenu ma.

¹³E, Alla, i wara min bɛɛ kɛ, wo bɛɛ sɛnima. Ile Alla makawara ka tenbi bɛsɛ bɛɛ la.

¹⁴Ile le ye Alla wo la min si kabana-koenu kɛ. I ya i nyɛrɛta sɛnbɛ yira sibolo-gbɛrɛnu na.

¹⁵I ya ila mɔgɛnu kisi ila sɛnbɛ-wɛ la, Yakoba anubɛ Yusufu kegeyɛnu, kɔni.

¹⁶E, Alla, kɔgɔ-yi wa i yen, wo fanan si kilan i la. Kɔgɔ-yi-tungban si yɛrɛyɛrɛn iko mɔgɛ si yɛrɛyɛrɛn kilan bolo i kɔrɔ nya min.

¹⁷Banda-finyɛ ya a dɛ bɔ a kɔrɔ. San sɛrɛnta iko kalabɛn. Banda-nyin-masɔgɛ ya waan raka belenna.

¹⁸Ila san-sɛrɛn-kan ye bɔla iko mɔgɛ tenbi durɔmu-takolɔn makuru-kurunna. Ila banda-nyin-masɔgɛ ye malanna duninya kuma. Dugi nyɛrɛ ye yɛrɛyɛrɛnna.

¹⁹Kilɛ sanɛ i bolo kɔgɔ-yi-dumɛ tɛma kɔnɔ mɔgɔ-wo-mɔgɔ ti i kin-gbɛ yen.

²⁰I ye ila mɔgɛnu yarɔ iko saga-kandannɛ. Musa anubɛ Aruna ye anu kun na.