Read Kuranko Yaburi 78 Bible Online

Yaburi 78 - Kuranko bible

Yaburi 78

¹Wole nta Isirɛla mɔgɛnu, wo ni wo tole masɔ nna karan la. Wo ni wo tole masɔ yiri!

² N bi nala hɛnkilimaya-kumɛnu fɔla minnu bi ko-dogonni-kɔrɛnu takaranna wo ye.

³Ma ara ko-dogonnɛ wonu namɔɛn nun, ado ma ara anu lɔn bawo ma benbanu ya wonu bara-koe fɔ ma ye.

⁴Ma ti Marita ko-makawanɛnu dogon mala dannu ma, ado ma si ala kabana-koenu takaran ma mamanɛnu fanan ye.

⁵Alla ya tɔnnu anubɛ sereyanu di Isirɛla mɔgɛnu ma, Yakoba kegeyɛnu, kɔni. A ya a fɔ ma benbanu ye ko anu ni ala sereya kɛnu takaran anuna dannu ye

⁶alako anu kegeyɛnu fanan ni ata tɔnnu lɔn. Wonu fanan si a fɔ anuta dannu ye.

⁷Wo si a ma, wonu fanan ni la Alla la. Alla ara minnu ma, anu ti nyina wonu ko. Anu si to ata tɔnnu birala tolon!

⁸Anu denu ti lanayabɛlitayɛ kɛ iko anu benbanu, murutinu anubɛ kuma-birabɛlɛ wonu, kɔni. Lanayɛ min bi anu bolo Alla wara la, wo dɔgɔ, ado anu telenni ma a ye.

⁹Ifɛrɛm-bɔnsɔn-kurugbɛnu ya anu buri anuna kalabɛnnu na anu bolo kɛlɛ kɔrɔ.

¹⁰Sarama-kan min bi anubɛ Alla tɛma, anu denu ma anutɛ latɔnbagaya. Anu ya anu ban ata tɔn-bira-koe ma.

¹¹Alla ara kabana-koe min bɛɛsi kɛ anu yala, anu nyinara wonu ko salon!

¹² Ma benbanu yɛ bɛnnɛ Alla ma tumɛ min, a ya ata kabana-koenu ma. A ya wonu ma Sowan gbɛkole rɔ Iyipiti nyamanɛ rɔ.

¹³ A ya kɔgɔ-yi fara fila la ka anu natenbi nyɔ rɔ. A ya a ma, yi wonu sɔra anu gbɛ rɔ iko dandan.

¹⁴ Wo kɔma, a ya banda-fin-gbɛ sɔ anu yarɔ tele rɔ. Suyi rɔ, a ya ta-waan sɔ anu yarɔ.

¹⁵A ya farɛnu tafara wula-da-rakolɔn tɔ alako anu ni yi sɔrɔn iko a siya nya min yi-worɔn la.

¹⁶ A ya a ma, yi tugura farɛ rɔ. A ya a ma, yi yigira beyabeyɛ iko bɛ.

¹⁷Kɔnɔ hali wo, anu tora hakɛ kɛla Alla la. Anu ya murutiyɛ ladan wulɛ rɔ Mari kan ma, Mari Min Bi Fan Bɛɛ Kun Na, kɔni.

¹⁸ Anu ya a lawuli a ma ka Alla kɔrɔbɔ alako anu si anu nyɛrɛ diyana-dɔn-fan sɔrɔn nya min.

¹⁹Anu kumara Alla ma, anu ko, “Alla si ke ma de-nyinina wula-da-rakolɔn kɛ rɔ yan, ba?

²⁰A ya yi labɔ farɛ rɔ, yi tugura-a-rɔ, tonyɛ le wo la kɔnɔ a si ke dɔn-fan anubɛ soge fanan dila ma ma, wa?”

²¹Mari ya wo lamɔɛn min kɛ, a diminyara. A ya ala mɔgɛnu kɛlɛ tɛ la, ado ala fondo-bɔɛ ma sɛgi kɔma

²²bawo anu ma la a la. Anu ma la a la ko a si ke anu kisila le.

²³Kɔnɔ hali wo, a kumara san-kole ye wo ya a dɛ bɔ dɔn-fan kɔrɔ.

²⁴ A ya Arinyɛnɛta biredi[13] labɔ san-kole rɔ iko bandɛ. Ale dɔn-fan wo min tɔgɛ mana, a ya wo le ma anuna dɔn-fan la.

²⁵Nba, anu ya melikanuna dɔn-fan wo dɔn, ado anu nyinita min bɛɛ ma, Alla ya wo bɛɛ di anu ma le.

²⁶Wo kɔma, a ya fɔnyɔ labɔ tele-bɔɛ wara la. A ya dugula-fɔnyɔ fanan nawuli ata sɛnbɛ la

²⁷ka konanu tatii ala mɔgɛnu kun na pu! A ya anu nasiyaya iko ba-kɛnkɛn.

²⁸Anu buira dagɛ tɛma fani-bɔnnuna foolɛ rɔ.

²⁹Bɛɛ ya wo dɔn furr, ha anu fara pen! Anu bi nyinina min ma, Alla ya wo di anu ma.

³⁰Kɔnɔ hali wo, anu ma wasa. Anu bi sogo-dɔn wo kun na tumɛ min,

³¹Alla diminyara anu ma. Kei minnu tagbɛlɛ anu tɔ, a ya wonu faga, Isirɛla kemini-mɛsɛ minnu bi fonikeyɛ la wo wati rɔ, kɔni.

³²Kɛ damasi rɔ, a mɔgɛ toenu tora hakɛ kɛla tolon! Hali Mari ara ala kabana-koe bɛɛ ma, anu ma la a la.

³³Woletɔ a ya anu natunu yen, iko ni-lafɛ kelan. A ya anu nato kasara-boloko-yogomɛ la.

³⁴A wa donu faga anu tɔ wati min, a toenu ni sɛgi a ma. Anu si tubi ka madiyali kɛ anu sɛbɛ-kuna-wɛ la.

³⁵Anu ya anu miri a ma tun ko anuna kanannɛ le ale Alla la. Anu ya anu miri ko Alla Sɛnbɛ-Bɛɛ-Tigi le wara na anu dɛnbɛ.

³⁶Kɔnɔ anuna kumɛ bɛɛsi foninya. Fenfen sa anu da rɔ fɔ kuma-teleka-teleka-fɔɛ.

³⁷Anu natelenni ma a ye. Sarama-kan min bi anubɛ Alla tɛma, anu ma anutɛ latɔnbagaya.

³⁸Kɔnɔ hali wo, Alla kinikinita ala mɔgɛnu ma. A ya anu hakɛ makoto. A ma anu nato. A mɛra a fonde birala a rɔ. A tora a munyuna anu kɔrɔ.

³⁹A ya a miri anu ma ko, “Hadama-dan le kɛnu na dɔrɔn! Anu bara-koe mani de iko fɔnyɔ-tenbimatoe.”

⁴⁰Anu murutiyara a ma wula-da-rakolɔn rɔ iko yili! Anu ya a ma, a fonde bɔra iko siyaman.

⁴¹Anu tora a kɔrɔbɔla le tolon! Anu ya Isirɛlata Alla-sɛnimɛ fonde kɔrɔtɔ a ma.

⁴²Anu nyinara Allata sɛnbɛ-makawanɛ ko salon! A ya anu nakanan anu yogenu bolo nya min, anu ma anu hɛnkili lamiri wo ma.

⁴³A ya kabana-koe anubɛ kɛwɔli-makawanɛnu kɛ Sowan gbɛkole ma Iyipiti nyamanɛ rɔ.

⁴⁴ A ya ba-yinu yɛlɛma yele la ha Iyipiti kɛnu ma ke anu min-kɛ-yi sɔrɔnna.

⁴⁵ A ya yɔlɛnu nana anu yakɔrɔ-mamɔ tinɛ. A ya turukɔɔkɔnu natuntun anu ma min ya a ma, anuna nyamanɛ tinyanta.

⁴⁶ A ya kondɔnnu natugu anuna dɔn-fannu kun na. Wonu ya anuna dugi makolonya filili!

⁴⁷A ya anuna ki-fannu tinya banda-kole la ka anuna toro-kurinu nasorondo.

⁴⁸ A ya anuna ninkinu faga banda-kole wo la ka anuna sagɛnu faga san-sɛran la.

⁴⁹A fonde bɔra anu kuma min kɛ, a ya anu tɔrɔ dɔgɔma-ma-de! Ala diminyɛ nara le iko sayɛla kilayɛnu.

⁵⁰A ma ala fondo-bɔɛ fenfen to kɔma. A ma anu do-wo-do to anu niyi la. A ya anu nato kiraya-fitinɛ la.

⁵¹ A ya Iyipiti kɛnuna den-kei-sarɛ bɛɛ faga.

⁵² Wo kɔma, a sɔra ala mɔgɛnu yarɔ iko saga-fɛ-biralɛ. A ya anu kandan wula-da-rakolɔn rɔ.

⁵³ A sɔra anu yarɔ a kin na! Anu ma kilan fenfen na. Kɔgɔ-yi tugura anu yogenu kun na.

⁵⁴ A tara anu na ata nyamani-sɛnimɛ rɔ. A tara anu na kɔnkɛnu tɔ, ale nyɛrɛ-nyɛrɛ ya anu yogenu nɔ kan min.

⁵⁵ Iko ala mɔgɛnu bi tala nya min, a tora nyɔ-sigila-kɔrɛnu gbenna wo nya na le. A ya nyamanɛ ratala Isirɛla bɔnsɔnnu na. A ya anu yogenuna bɔnnu natenbi anu ma.

⁵⁶ Hali wo, anu murutiyara Alla Sɛnbɛ-Bɛɛ-Tigi ma ka don a kɔrɔbɔɛ rɔ. Anu ma ata tɔnnu bira mumɛ!

⁵⁷Anu mara telenbɛlɛnu anubɛ murutinu na iko anu fanu. Ni mɔgɛ si la kalabɛn-tadunɛ la, mani mɔgɛ si la mɔgɛ kɛnu na.

⁵⁸Anu ya Alla-lɔnbɛlɛnuna bɛsi-kɔ-tinɛnu ma anuna batoli-kɛ-tinɛnu na min kɛ, Mari kɔrɔtɔra anu ma kan-tina-mayɛlɛnɛ wonuna ko la. Anu ya a ma, a diminyara bɛsɛ wonuna ko la.

⁵⁹A ya wo yen min kɛ, a diminyara dɔgɔma-ma-de! Wo le ya a ma, a ya a ban ala mɔgɛnu na feufeu!

⁶⁰ A ya a ban ata fani-bɔn la Sailo soe burɔ a mayiginɛ mɔgɛnu tɛma kan min nun.

⁶¹ A ya a ma, anu yogenu ya tɔn-kenkirɛ bi ala mɔgɛnu bolo, ata sɛnbɛ anubɛ ata gbiliya tamasere, kɔni.

⁶²A gbunyara ala mɔgɛnu kɔrɔ, ha a ya anu kunyɛ don anu yogenu bolo ka anu faga.

⁶³Kemini-mɛsɛnu-kunyɛ tora kɛlɛ rɔ. Sunkurun-mɛsɛnu kun-nakanɛ ye tala, anu furula sa.

⁶⁴Saraka-masɔlɛnu faga boloko-yogomɛ-kɛra, ado anuna musinu ma ke anu dila.

⁶⁵Kɔnɔ tɔ-a-la, Mari kundenta iko a ye kinɔgɛ le tɔ nun. A manɛ iko kei-ragbɛlɛ wa baan min, wo ye kerinteyala nya min.

⁶⁶Alla ya a yogenu gben woletɔ wonu miliyara dɔgɔma-ma-de! Anu ma anu kɔgɔ raka a la tun.

⁶⁷Alla ya a ban Ifɛrɛm bɔnsɔn-mɔgɛnu na. A ma sɔn sigila Yusufu kegeyɛnu tɛma tun.

⁶⁸A ya Yuda bɔnsɔn yabɔ, a diyana-so Yerusalɛm ye kan min, kɔni.

⁶⁹Ala Bato-Bɔn min sɔnɛ sɛnbɛ rɔ iko a warɛ Arinyɛnɛ, a ya wo sɔ nyɔ le. A ya a sɔ fanka rɔ iko dugu-kole. A latankani de dɛɛ! Ko-wo-ko ti ma a la.

⁷⁰Alla ya ata wɔli-kɛla Dawuda yabɔ, saga-fɛ-biralɛ, kɔni.

⁷¹ A ya a bɔ saga fɛ bira tinɛ alako a ni ala mɔgɛnu kumafunfan. Alla ya a ma mansɛ la Isirɛla mɔgɛnu kun na.

⁷²Ale Dawuda ya anu fɛ-bira telenbagayɛ la. A mara mansa-hɛnkilimɛ la anu kun na.