Read Kuranko Yaburi 81 Bible Online

Yaburi 81 - Kuranko bible

Yaburi 81

¹Ma ni a lawɔyɔ sewɛ la Alla ye, ma kumafunfannɛ, kɔni. Ma ni Yakobata Alla matɔgɔ.

²Wo ni fɔli-kɛ dabira ka wasanbɛnu kɛ-a-rɔ. Wo ni sigi-diyamɛnu fɔ bɔlɔn anubɛ seremanu tɔ.

³ Buru-fɛ ni a yira ko karɛ-kura-ladiya-wati ara ke. Karɛ wa kɔgɔ, ma si ladiyɛ kɛ tun.

⁴Sereya le kɛ la Isirɛla nyamanɛ rɔ. Yakobata Alla le ya kɛ fɔ.

⁵Alla tanɛ Iyipiti kɛnu fitina tinɛ, a ya sereya kɛ fɔ male, ata mɔgɛnu ye, ado ma taranta Iyipiti kɛ minnu tɛma, ma sa wonu kannu nagbɛla.

⁶Alla ko, “N bara yɔɔnya-ko-dunɛ bɔ wo kuma ka wo kunyɛ bɔ tɔrɔ-mansayɛ anubɛ yigi-tɛgɛ kɔrɔ.

⁷ Wo ye kɔndɔfili rɔ tumɛ min, wo ya n takele. N ya wo lakisi.” Alla ko, “N dogonnɛ ya a labira banda-fin-gbɛ rɔ. N ya wo kɔrɔbɔ wulɔn kan tinɛ do rɔ anu bi min kelela Sɔnkɔ-Sɔnkɔ tenke.”

⁸Alla ko, “Nta mɔgɛnu, wo ni wo tole masɔ nta kawandili-kan la. E, Isirɛla, alako wo ya wo tole masɔ n na nun, wo si diya n ye.

⁹Wo kana bɛsi-wo-bɛsi kɔ nde, Alla kɔma. Mɔgɔ-gbɛrɛnuta bɛsɛ, wo kana wo madu wonu kɔrɔ.

¹⁰ Wota Mari Alla le nde la min nara wo la ka bɔ Iyipiti nyamanɛ rɔ. Wo ni wo dɛnu naka wɛ kɛ. N si wo de-nyini.

¹¹“Kɔnɔ wole, nta mɔgɛnu ma wo tole masɔ n na. Wo ma nta kumɛ bira mumɛ!

¹²Woletɔ n sɔnta, bɛɛ tora ala tolo-gbɛlɛyɛ la. Bɛɛ ya a ma iko a di a ye nya min.

¹³E, nta mɔgɛnu Isirɛla, alako nun wo ya wo tole masɔ n na, wo si diya n ye. Alako nun wo ya nna kumɛnu bira nun.

¹⁴Ni wo ya n kuman-kan to a gbɛ rɔ, n si wo yogenu nɔ tiriya! N si wo yoge bɛɛ gbesi wo ye nun.

¹⁵Nde, Mari gbo minnu ye, wonu kun ma si kɔ n yarɔ kilan bolo, ado dan sa anuna tɔrɔyɛ la.

¹⁶N si wo de-nyini fui-fen-hakikɛ la. N si faratɔ-liyi di wo ma, min si wo wasa.”