Read Kuranko Yaburi 83 Bible Online

Yaburi 83 - Kuranko bible

Yaburi 83

¹E, Alla, i radenɛ kana to. I mayiginɛ kana to dɔi! I sɛbɛ don.

²I kolan lata i yogo-murutiyanɛnu ma. I ma di minnu ye, wonu wulinɛ i kan ma.

³Anu bi yanfɛ kirila ita mɔgɛnu ma. I wara minnu natanka, anu bi anu kɔnkɔnna wonu ma.

⁴Anu bi a fɔla ko, “Wo na, ma ni mɔgɛ kɛnu nato alako Isirɛla wara-koe ni tuni yen!”

⁵Anu bi kan kelen tɔ anuna gbundi wo rɔ. Anu bi dunbɛ kirila wo kan ma.

⁶Minnu ya dunbɛ wo kiri, wo fɔlɔn de Idɔm mɔgɛnu wo, Sumanyila kɛnu wo, Mohabunu wo, Hagiranu wo,

⁷Kibali kɛnu wo, Amonnu wo, Amalɛkinu wo, Filisitinu wo, anubɛ Taya kɛnu.

⁸Asiriyanu fanan kofura Amonnu anubɛ Mohabu kɛnu ma, Lɔti kegeyɛnu, kɔni.

⁹ I ni anu tɔrɔ iko i wara a ma Midiya kɛnu na nya min. I ni a ma anu na iko i wara a ma Sisara anubɛ Yebin na nya min Kisɔn bɛ dala.

¹⁰I ya anu nɔ Ɛndɔ soe burɔ. Anu furi tulunta dugi ma nyɔ.

¹¹ A ma anuna kun-tiginu na iko i ya a ma Ɔrɛbu anubɛ Sibi la nya min. I ni anuna kun-tigi bɛɛ nɔ iko i ya a ma Siba anubɛ Salamuna na nya min.

¹²Allata dugu-hakikɛ ye min na, kun-tigi mɔgɔ nanɛ kɛnu ko anu si wo ma anu halalɛ la nun.

¹³E, Alla, anu tanyɛnsɛn iko dugu-gbangban. Anu ni ma iko fɔnyɔ ye tala bin-gbalɛ min na.

¹⁴Iko fira-mintan-tɛ si firɛ bunden nya min kɔnkɛnu ma,

¹⁵i ni anu gben ita tɔnkɔlɔn la wo nya na ita fondo-bɔɛ la ka anu miran bɔ anu ma ita fɔn-belebele la.

¹⁶E, Mari, i ni a ma, anu ni anu bole burun anu yɛ la miliyɛ bolo. I ni a ma, anu ni ile bato ka a lɔn yati, ko sɛnbɛ ye ile le bolo.

¹⁷Alamɛ nɔ-ko sɔrɔnta anu ma, anu kumakɔnɛ ni to tolon! Alamɛ yarabi-yili sɔra anu na ka anu kasara pɔ!

¹⁸Alamɛ anu ya a lɔn ko ile le kelen pe le Mari la. Ile le ye duninya fan bɛɛ kun na.