Read Kuranko Yaburi 86 Bible Online

Yaburi 86 - Kuranko bible

Yaburi 86

¹E, Mari, i ni i wɔlɔ matɔlɔ n na ka n yabi bawo n makoe ye dɛnbɛnɛ la, ado n tafaganɛ.

²N nakanan sayɛ ma bawo n telennɛ i ye. N sɔndɔmɛ lakanan bawo ita wɔli-kɛlɛ le nde la, ado n yigi bɛɛ bɛnnɛ ile le ma.

³E, Mari, i ni kinikini nde ma. Telen-gbɛn, n bi i madiyala.

⁴E, n tigi, sewɛ di nde, ila wɔli-kɛlɛ ma bawo nta madiyalɛ ye kela i ma.

⁵E, n tigi, i nyimayanɛ ma ye, ado i ye ma makotola. Minnu bi i madiyala, ila hinɛ ye wonuna ko la.

⁶E, Mari, i wɔlɔ matɔlɔ nta madiyalɛ la. N bi dila i dala n dɛnbɛn-koe rɔ.

⁷N bi yakɔrɔ-mamɔɛ rɔ tumɛ min, n ya i rakele bawo i ye nna madiyali-kan lamɔɛnna.

⁸E, n tigi, i rakɛn sa, ado i kolo bɛsɛ bɛɛ ko. Ha bi, mɔgɔ ma ko ma wɛ iko ile.

⁹ I ya sibole min bɛɛ labɔ duninya rɔ, wonu dama si na anu madu i kɔrɔ. Anu si i tɔgɔ-makawanɛ gbiliya.

¹⁰I makawara, ado i ye kabana-koenu nadanna fanan. Ile le kelen pe ye Alla la.

¹¹Mari, a sɔgɛ ye i la, n ni min ma, n karan wo la. Wo kɔma, n si a bira lanayɛ rɔ. N si ila wɔlɛ kɛ n yisi bɛɛ la nya min, i ni n nabila wo la.

¹²E, nta Mari Alla, n si i matɔgɔ n yisi bɛɛ la. N si to i tɔgɔ-makawanɛ gbiliyala burubukai!

¹³Ila keninteya-dannatɛgɛbɛlɛ kolo n ye. I wara n nakanan lakira-masibɛ ma.

¹⁴E, Alla, mɔgɔ-wasinɛnu bi nala n kan ma. N faga-sɔgɛ ye karagbɛlɛ kurɔn kɛnu denu na, ado anuna ko sa ila ko rɔ.

¹⁵Kɔnɔ ile n tigi, ila keninteyɛ kolo, ado i kinikinite. I munyara, i nyimayanɛ, ado i lanaya-tigi.

¹⁶I ya-lamunun n na ka kinikini n ma. Sɛnbɛ di n ma ka n nakisi bawo nde ye wɔlila i ye iko n na wɔlita i ye nya min nun.

¹⁷Mari, ila nyimayɛ-misalɛ yira n na alako n gbo minnu ye, wonu ni miliya bawo anu bi a yenna i wara n dɛnbɛ kosɛbɛ!