Read Kuranko Yaburi 89 Bible Online

Yaburi 89 - Kuranko bible

Yaburi 89

¹E, Mari, n si to ila hinɛ-sigi sala tolon! N si to ila telenbagayɛ wara-koe rakaranna dɛɛ!

²N ya a lɔn ko ila keninteyɛ si a laban de! Ila lanayɛ ye gbɛ le tɔ iko san-kole!

³I wara sarama-kan kiri ita mɔgɔ-yabɔnɛ Dawuda ye. I wara ale, ita wɔli-kɛla yili-madiya ko

⁴ mansayɛ ti bɔ ala bɔn la. Mansayɛ si to ala bɔn la burubukai!

⁵E, Mari, hali fan min bɛɛ ye san-kole rɔ, anu si sigi sa ka a tɛgɛ ita kabana-koenu ma. Ita mɔgɔ-sɛnimɛnu si ila lanaya-sigi sa.

⁶Mari, i rakɛn fenfen sa Arinyɛni tɔ. I nyɔgɔn-takɛn sa nyɔ nima-fannu tɔ.

⁷Arinyɛnɛ kun-tiginu-nadɛnnɛ si kawa i ma. Anu dama si anu bole sa anu dɛ la.

⁸E, Mari Alla Sɛnbɛ-Bɛɛ-Tigi, sɛnbɛ ye yon bolo iko ile? Ile Mari si koe bɛɛ ladan lanayɛ rɔ.

⁹Ila sɛnbɛ ye kɔgɔ-yi kuma. A ye tugu min kɛla-a-rɔ a yisi ma, i si wo rade don!

¹⁰Ninkinankɛ min tɔgɛ Rehabi, i ya wo gbesi a rɔ ka a faga. I ya i yogenu tanyɛnsɛn i kɔɛn-sɛnbɛmɛ la.

¹¹Ile letan ye san-kole anubɛ dugu-kole la. Ile le ya duninya anubɛ fan bɛɛ dan a rɔ.

¹²Ka a bi nyamanɛ kɛ kantɔɛ ma ha dugulɛ, ile le ya wo dan. Tebɔ kɔnkɛ anubɛ Hɛrɔman kɔnkɛ ye sigi sala i ye sewɛ bolo iko mɔgɛnu.

¹³I fanka kolo kati! Sɛnbɛ ye i kɔɛn rɔ dɔgɔma-ma-de!

¹⁴Ila mansaya-kuri kɛnɛ tonyɛ anubɛ telenbagayɛ le la. I ye koe min bɛɛsi ladanna, ma ye ila hinɛ anubɛ lanayɛ yenna wonu tɔ.

¹⁵Minnu bi i bato-bɛti bɔla, wonu sewanɛ kati! Anu bi ila nyimayɛ le kɔrɔ tolon!

¹⁶Anu kɛnɛna[14] i matɔgɔla ila telenbagayɛla ko la bawo anu bi sewɛ rɔ tun tun!

¹⁷I wara nɔ-ko-sɔrɔn-sɛnbɛ di ma ma. Ita keninteyɛ le ya a ma, ma ara nɔ-ko sɔrɔn.

¹⁸E, Mari, ile le ya mansɛ yabɔ ma ye. Ile Isirɛlata Alla-sɛnimɛ le ya mala mansɛ di ma ma.

¹⁹I ya a fɔ ila wɔli-kɛla-nyimɛnu ye ko-rayen rɔ ko i wara dɛnbɛnɛ di kɛlɛ-kurugba-yabɔnɛ do ma. I wara wo ma mansa-yabɔnɛ la ila mɔgɛnu ye.

²⁰ I ko i wara ila wɔli-kɛla Dawuda ma mansɛ la, ado i wara dantɛgɛ-tuli kɛ wo salɛ rɔ.

²¹Ita sɛnbɛ ti bɔ a fɛ mumɛ! Ita sɛnbɛ le ye a ragbɛlɛyala.

²²A yogo-wo-yogo ti a nɔ. Karagbɛlɛnu ti ke a nɔla.

²³I si a yoge bɛɛ rabunden iko kɔrɛ. Dawuda gbo minnu ye, i si wo bɛɛ faga.

²⁴I si a keni ka i lanaya a ye. I si a ma, a ni to nɔ-ko sɔrɔnna.

²⁵I si a ma, ata mansayɛ ni dabira Mɛdetereniyan kɔgɔ-yi ma ha ka ke Yufereti bɛ ma.

²⁶Dawuda si a fɔ ile Alla ye ko, “N fa anubɛ nta Alla le ile la. N natankalɛ anubɛ nna kisilɛ le ile la.”

²⁷ Ile Alla si a fɔ worɔ ko, “Nna sarɛ le ile la. I kolo mansɛ bɛɛ ko.”

²⁸Ile Alla si ila lanyiri latɔnbagaya a ye habadan! I si ila sarama-kan to a gbɛ rɔ ala ko la tɛban!

²⁹Fananta san-kole ye nyɔ, mansayɛ ti bɔ ala bɔn la. Tuma-wo-tuma, a kegeyɛ do si to mala mansɛ la.

³⁰Kɔnɔ ni a kegeyɛnu ya ila tɔn tinya, anu ma ita kilɛ tagama,

³¹ni anu ma ita kumɛ to a gbɛ rɔ fɔ ka ila tɔn tinya,

³²i si anu tɔrɔ worɔ anu hakɛla ko la. I si anu natɛn anu sɔn-yogomɛla ko la kɔrr!

³³Kɔnɔ hali wo, ale Dawuda ti gboya i ye, ado i si ila lanyiri latɔnbagaya a ye.

³⁴I ti ila sarama-kan tinya a wara la mumɛ! Hali i kuman-kan kelan, i ti a bɔ a gbɛ rɔ.

³⁵Iko i wara ban i kelila i tɔgɔ-sɛninyanɛ rɔ nya min, i ti foninyɛ fɔ ale Dawuda ye.

³⁶A ti foo a kegeyɛ la. Fananta tele ye bɔla, i kolan bɛnnɛ ata mansayɛ ma.

³⁷Fananta karɛ ye gbɛla, ata mansayɛ ti bɔ a gbɛ rɔ, ado ko-wo-ko ti dogon karɛ ma.

³⁸Ile Mari, i fonde bɔnɛ ita mansa-yabɔnɛ kan ma. I wara a boloka ka i ban a la.

³⁹I wara ila sarama-kan tinya ila wɔli-kɛlɛ wara la. I wara ala mansaya-fulɛ gbesi dugi la gbangban rɔ.

⁴⁰I wara ala so-tarɛ rakeri ka ala kan-tina-latankanɛnu tinya.

⁴¹Min tenbi tenbila nyɔ la, wonu kɛnɛna[15] a bolo-fannu kankanna. A sigi-nyɔgɛ bɛɛ ye yɛlɛnna a ma.

⁴²I wara a ma, a yogenu bara a nɔ. I wara a ma, a yoge dama ara sewa.

⁴³I wara ala kɛlɛ-mirannu tinya ha a ma ke nɔ-ko sɔrɔnna kɛlɛ rɔ.

⁴⁴I wara ala sɛnɛ-kɔlɔma bi a bolo. I wara ala mansaya-waganɛ gbesi dugu la.

⁴⁵I wara a lakɔrɔya a pose rɔ ka a to yarabiyi tɛma pɔɛ!

⁴⁶Mari, i kan-kɔ sɔnɛ si to n na ha muntuma? Ita fondo-bɔɛ si to mintannɛ kɛla iko tɛ ha tumɛ nyamintan?

⁴⁷N siyi-fɛ wuruyanɛ ye nya min, i fonde lamiri wo ma. Fenfen ma male, hadama-dannu na iko i ya ma ladan nya min.

⁴⁸Mɔgɔ yon si to, a ma faga? Mɔgɛ si ke a nyɛrɛ lakananna kanbɛ ma kama?

⁴⁹E, n tigi, i wara ila keninteyɛ min fɔlɔn yira ma la, wo ye mi? I ya lanyiri minnu kiri Dawuda ye, wonu bi mi?

⁵⁰E, n tigi, i ma a yen, anu bi nde, ila wɔli-kɛlɛ rasɛla nya min? N bi mɔgɛnuna fɛyɛ labirala n ma.

⁵¹E, Mari, i yogenu bi nde, ita mansa-yabɔnɛ lafɛyala. N ba ta kan-bo-kan, anu bi n manyinina le.

⁵²Tantolɛ ni to dila Mari ma tolon! Amina! Amina!