Read Kuranko Yaburi 9 Bible Online

Yaburi 9 - Kuranko bible

Yaburi 9

¹Mari, n si baraka bira i ye n sɔndɔmɛ bɛɛ la. N si ila wɔli-nyimɛ rakaran mɔgɛ bɛɛ ye.

²N si sewa-bɛtinu bɔ ilela ko la. E, Mari min bi fan bɛɛ kun na, n si i matɔgɔ-siginu sa.

³N yogenu ba i yen tumɛ min, anu si sɛgi anu kɔma. Anu si tɔnbɔn anu kin kun na ka bui. Anu si faga.

⁴I telennɛ min kɛ, i wara n kiti ka yo di n ma.

⁵I wara sibolo-gbɛrɛnu yiliki ka ko-yogoma-kɛlɛnu kasara ka anu tɔgɛ latunu yen!

⁶I wara anuna soenu wurun ka anu tinya ka anu ma habadan-tonbɔnnu na. Mɔgɛ bɛɛ si nyina anu wara-koe la don!

⁷Habadan-mansɛ le Mari la min bara ala mansaya-waganɛ rabɛn mɔgɛnu kiti-koe la.

⁸A ya duninya mara telenbagayɛ la. A ya sibolenu kiti a kilɛ fɛ, hali lafisayali sa a rɔ.

⁹Mɔgɔ-tɔrɔnɛnu dogon tinɛ le Mari warɛ la. Anu tenbi kɔndɔfili rɔ, i si anu natanka.

¹⁰Mari, minnu ya i lɔn, wonu lara i la kosɛbɛ! Min bi nala ile ma, i ti wonu boloka.

¹¹Mata Mari min bi mansayɛ kɛla Yerusalɛm ata kɔnkɔ-sɛnimɛ kuma, ma ni a tanto-bɛtinu bɔ. A ara koe minnu ma, ma ni wo fɔ sibole bɛɛ ye duninya rɔ.

¹²Alla fonde ye mɔgɔ-tɔrɔnɛnu ko. A si a wɔlɔ matɔlɔ anu di-kɛ-kan la ka wonu tɔrɔ minnu bi ata mɔgɔ-tɔrɔnɛnu yakɔrɔ-mamɔla.

¹³Mari, kinikini n ma. I kolan lana ka a yen, n yogenu bi n tɔrɔla nya min. E, Mari, n nakanan saya-kilɛ ma

¹⁴woletɔ n si ke sɔla mɔgɛ bɛɛ yakɔrɔ Yerusalɛm soe burɔ ka i matɔgɔ-koenu fɔ anu ye. N si sewa bawo i wara n nakisi.

¹⁵Kafirinu bi gbɛrɛ min nasigila mɔgɛnu ye, anu denu denu bi birala wo la.

¹⁶Mari ye a kɛ-nya yirala ala mɔgɛnu na iko a ye kiti tɛgɛla a kilɛ fɛ nya min. Karagbɛlɛnu fanan si bira anu nyɛrɛta yili-lasiginɛ la.

¹⁷Karagbɛlɛ bɛɛ si a laban kanbɛ rɔ hali minnu bi Alla bɔrɔbɔla.

¹⁸Lunyɛ do, Alla si a fonde lamiri bolo-kolɔnnu ma, ado anu ti to yigi-tɛgɛ wo kun na.

¹⁹E, Mari, i lakɔɛnma. I kana sɔn, hadama-dan ni i nɔ. I ni kafiri wonu nana i yakɔrɔ ka anu yiliki.

²⁰A ma, anu ni kilan. Anu ni a lɔn yati, ko hadama-dan le anu na dɔrɔn!