Read Kuranko Yaburi 90 Bible Online

Yaburi 90 - Kuranko bible

Yaburi 90

¹E, n tigi, ka a bi fɔlɔ ma, ha duninya si ban, ma sulen tinɛ le ile la.

²Yanni i ni duninya dan anubɛ kɔnkɛ minnu bi a rɔ, ile ye habadan-Allayɛ la, ado habadan-Alla le ile la.

³Ile le ya a fɔ hadama-dan ma ko a bɔra kan min, a ye sɛgila nyɔ le. I si a yɛlɛma gbangban la a bɔra min tɔ.

⁴ San waga kelan mani de ile yala iko tele kelan. A manɛ iko kunu min bara belen, ado a mani de fanan i yala iko kinɔgɔ-kun-kelan.

⁵Wati ye a burila iko gboron-gboronna yi. Mala wati mani de iko kiyo. Ma mani de iko binyɛ min bi fɛrɛnna sɔgɔma,

⁶tele rɔ, a ni fere kɔnɔ wurɛ la, a ni gbala nyawo!

⁷Ita diminyɛ si ma ban. Ni i fonde bɔra, ma kun ma si kɔ.

⁸I ye ma hakɛnu nabɔla gbɛ ma i yakɔrɔ. Hali ma hakɛ minnu dogonnɛ, i ye wonu yenna.

⁹Ma siyi-fɛ si wuruya ila diminyɛ bolo ha ma ni faga. Ma niyi mani de iko ni-lafɛ-kelan.

¹⁰Ma siyi si san bi-wɔrɔnfila le bɔ dɔrɔn. Ni ma kɔgɔra, ma si san bi-segin bɔ. Kɔnɔ hali ma ye ma diya wati min, yakɔrɔ-mamɔɛ ye ma kuma tolon, ado ma siyi ti mɛ banna.

¹¹Yon si ke ita fondo-bɔ-fanka lɔnna? Ma si kilan i la iko a bɛnnɛ ka kilan ita fondo-bɔɛ la nya min.

¹²Ma karan alako ma ni a lɔn ko ma siyi-fɛ ma yan, ado wo si a ma, ma ni a ma ma fɛrɛma ka ma hɛnkili sɔ.

¹³E, Mari, kinikini ma ma. I si i ya-lamunun male, ita wɔli-kɛlɛnu na muntuma?

¹⁴Ila hinɛ yira ma la subaga ma. Wo si a ma, ma siyi-tele-bɛɛ kɔrɔ, ma si sigi sa sewɛ rɔ.

¹⁵I ya tɔrɔyɛ min nyɔgɔn di ma ma gbɛlɛyɛ rɔ, wo nyɔgɔn sufa sewɛ di ma ma kaka.

¹⁶I ni a ma, ma ni ita kabana-koenu yen ma yɛ la. Ma kegeyɛnu ni ita gbiliya-makawanɛnu yen.

¹⁷Alamɛ ma diyara n tigi, mata Alla ye. Ni ma ya ma bole don ko-wo-ko rɔ, alamɛ wo sabatira.