Read Kuranko Hɛnkilimaya-Kumɛnu 1 Bible Online

Hɛnkilimaya-Kumɛnu 1 - Kuranko bible

Hɛnkilimaya-Kumɛnu 1

¹ Hɛnkilimaya-kumɛ le kɛnu na Mansa Dawudala den Isirɛlata Mansa Silamɛni ya minnu sɛbɛ.

²Kumɛ kɛnu si wo dɛnbɛ alako wo ni hɛnkili sɔrɔn ka kɛ wo nyɛrɛ marala anubɛ ka ko-kɔrɔ-lɔn-kumɛ kɛnu kɔrɛ lɔn.

³Kumɛ kɛnu si wo karan alako wo ni to hɛnkilimaya-koenu nadanna. A si wo karan fanan alako wo ni to ko-latelennɛ kɛla, min si a ma, wo ti lafisayalɛ kɛ.

⁴Mɔgɛ minnu hɛnkili sa bɛrɛkɛ, kumɛ kɛnu si wonu nahalliya. Kumɛ kɛnu si a ma, fonikenu ni yarɔmata-hɛnkili sɔrɔn.

⁵Wole hɛnkilimɛnu, wo ni wo tole masɔ. Kumɛ kɛnu si do kofu wo hɛnkilinu ma. A si kilɛ yira mɔgɔ-karannɛnu na.

⁶Woletɔ anu si ko-dogonnɛnu kɔrɛ lɔn ka sɔsɔlima-tilinu kɔrɛ yira hɛnkilimɛnu na.

⁷ Hɛnkilimayɛ dabira fɔlɔtɛ, wo le ka kilan Mari la. Hɛnkilibɔnɛnu si tɛgɛ hɛnkilimayɛ rɔ ka anu ban ata kuma-bira-koe ma.

⁸Nna den, i ni i fa anubɛ i nala kumɛ bira.

⁹Ni i ya wo ma, anuna karan si ila kɛ-nya-nyimɛ yira duninya la iko kun-yili anubɛ kan-na-fan si musi lakinya nya min.

¹⁰Nna den, ko-yogoma-kɛlɛnu ba anu taya i saganna anuna ko-yogomɛnu tɔ, i kana sɔn kofula anu ma.

¹¹Ni anu ya a fɔ i ye ko, “Na, ma ni ta baga mɔgɛ do ma ka a faga alako ma ni ma nyɛrɛ ladiya. Ma si a kɛndɛ taran kɔnɔ ma bɔmatoe si a suyi to nyɔ.” I kana sɔn wo ma.

¹³Anu ba a fɔ i ye ko, “Bila ma fɛ, ma ni ta nɔnfulu nyini tinɛ alako ma ni mala bɔnnu nafa kankanya-fannu na. Ma wa fan minnu sɔrɔn, ma si wonu tala.” Ni anu ya wo fɔ i ye, i ni i ban bilala wonu fɛ.

¹⁵Nna den, i masɛgi mɔgɔ-sufa wonu na. I kana bila anu kurun tɔ

¹⁶bawo ko-yogoma-kɛ di anu ye. Tuma-wo-tuma, anu denu yili ye mɔgɔ-faga-koe le ko.

¹⁷Ni kona ya i yen kose lasigila a ye, a ti a gbɛrɛn nyɔ ma tun!

¹⁸Kɔnɔ mɔgɔ-yogomɛ kɛnu bi gbɛrɛ lasigila anu nyɛrɛ ye, anu ya sa a la, ado anu si faga anu nyɛrɛta gbɛrɛ-lasiginɛ la.

¹⁹Kankan tɔgɔ si to kankanyɛ le la. Karagbɛlɛnu fanan si ban wo nya na le.

²⁰Wo ni wo tole masɔ! Hɛnkilimayɛ[1] ye wo rakelela soe tɛma anubɛ fere mayira tinɛnu tɔ.

²¹ A ye wo kelela ladɛn tinɛ anubɛ kiti fɔ tinɛnu tɔ.

²²A ye a fɔla ko, “Wole kun-takolɔnnu! Wole si hɛnkili sɔrɔn muntuma ka wo bɔ wo gba-yogomɛnu dala? Wole si wo fara lɔnnɛ lafɛyala muntuma?

²³N tenbi wo makumala, wo ni wo tole masɔ n na. N bi nyɔ ka wo dɛnbɛ ka hɛnkili di wo ma. N bi wo makawandi-nyimɛ-kɛla alako wo ni ko-siyaman nya-yen n bolo.

²⁴N bara wo rakele-siyamɛ kɛ kɔnɔ wo sa wo tole masɔla n na. N bɔrɔ sa wo ye.

²⁵Wo ara wo ban nna makawandili-nyimɛ kɛnu na. A ma di wo ye, n ni wo latelen mumɛ!

²⁶Woletɔ ni wo ye yakɔrɔ-mamɔɛ rɔ, fɔ ni n tora yɛlɛnna wo ma.

²⁷Hali tɔrɔyɛ ya wo bi iko fɔn-belebele si min ma ka wo yigi tɛgɛ, n si wo mayɛlɛn. Hali wo ye dumɛ rɔ, n si wo mayɛlɛn.

²⁸“Wo wa nde, hɛnkilimayɛ rakele wo tumɛ rɔ, n ti wo denkun. Hali wo ya n nyini furr, wo ti n yen

²⁹bawo wo ko wo mako sa ko-lɔn la, ado wo sa sɔnna Mari gbiliyala.

³⁰Tele-kelen-bɛrɛni, wo ma nna makawandili-nyimɛ manyinika. N ba wo latelen wati min, wo ti wo tole masɔ n na muk!

³¹Woletɔ wo ara yili min sɔ wo nyɛrɛ la, wo ye saganna wo le la. Wo si wola ko-yogomɛnu gberela-yi min.

³²Mɔgɔ-rakolɔnnu bi fagala bawo anu bi anu banna hɛnkilimayɛ la. Hɛnkilimayɛ bɔrɔ sa kun-takolɔnnu ye min kɛ, anu bi anu nyɛrɛ kasarala wo le ma.

³³Ni mɔgɛ min ya a tole masɔ nna hɛnkilimaya-kumɛ kɛ la ka a bira, wo tigi la si feri. Hɔn ti taran wo la. Wo ko-wo-ko sa nyɔ a si kilan min na.”