Read Kuranko Hɛnkilimaya-Kumɛnu 10 Bible Online

Hɛnkilimaya-Kumɛnu 10 - Kuranko bible

Hɛnkilimaya-Kumɛnu 10

¹Den-hɛnkilimɛ si a ma, a sɔrɔnbagɛnu ni sewa kɔnɔ den-hɛnkilibɔnɛ si a ma, a sɔrɔnbagɛnu yisi ma ni gboya.

²Mɔgɔ ye nɔnfuli minnu sɔrɔnna kensunyɛ rɔ, wo ti a munanfaga kɔnɔ ko-latelennɛ si mɔgɛ matanka siyi-matɛn ma.

³Mari ti sɔn mɔgɔ-telennɛ ni ki-a-la kɔnɔ mɔgɔ-yogomɛ ye nyinina min ma, a si a ma, wo ti wo sɔrɔn.

⁴Tinyabagayɛ si bolo-kolonyɛ lana mɔgɛ kuma kɔnɔ sɛbɛ-don-belebele si mɔgɛ ma fen na.

⁵Min bi ala dɔn-fan kundɛnna dɔn-fen-tɛgɛ-wati la, hɛnkilimɛ le wo la. Kɔnɔ min ti sɔn atɛ tɛgɛ-koe ma fɔ ka kinɔgɔ, yuwɛ le wo la. A ara milibɛlitaya-koe le ladan wo la.

⁶Mɔgɔ-nyimɛ si duwɛ sɔrɔn kɔnɔ mɔgɔ-karagbɛlɛ si belenna karagbɛlɛya-kumɛnu fɔla.

⁷Mɔgɔ-nyimɛnu tɔgɛ si ta wuu! Kɔnɔ mɔgɔ-karagbɛlɛnu tɔgɔ si tunu yen!

⁸Hɛnkili ye mɔgɛ min bolo, wo si makawandili-kuma-nyimɛnu bira. Kɔnɔ min bi kuntanya-kumɛnu fɔla, wo si to fu!

⁹Minnu natelennɛ, wonu nafɛrɛni de! Kɔnɔ minnu natelenni ma, wonu si bira mɔrɔtɔ!

¹⁰Minnu bi anu yɛ makerila foninyɛ kuma, wonu si nanparan lana anu na-kelen-nyɔgɛnu kuma, ado minnu bi kuntanya-kumɛnu fɔla, wonu si kasara.

¹¹Mɔgɔ-nyimɛnu darɔ-kan si ma niyi-tenke la, kɔnɔ karagbɛlɛya-kumɛnu si to bɔla mɔgɔ-yogomɛ dɛ rɔ.

¹² Gboyanayɛ si bɛnbɛlitayɛ lawuli kɔnɔ keninteyɛ si ko-yogomɛ damasi yamatogon.

¹³Hɛnkilimaya-kumɛ ye hɛnkilimɛnu denu da rɔ kɔnɔ bosɛ ye hɛnkilibɔnɛnu kan ma.

¹⁴Hɛnkilimɛ si to lɔnnɛ ladɛnna a kunyɛ rɔ kɔnɔ kasarɛ ti mɛ bɔla hɛnkilibɔnɛla kumɛ fɛ.

¹⁵Nɔnfuli si fen-tigi kandan kɔnɔ bolo-kolonyɛ si bolo-kolɔn kasara.

¹⁶Ko-nyima-kɛ-sarɛ le simayɛ la kɔnɔ ko-yogoma-kɛ-sarɛ si na tɔrɔyɛ la.

¹⁷Minnu si sɔn anu natelennɛnu bolo, wonu siyi-fɛ si yanya. Kɔnɔ minnu ti anu nyɛrɛla ko-tinya-gba yen makawandilɛ bolo, wonubɛ gbalo ti fara.

¹⁸Mɔgɔ-wo-mɔgɔ min si a ta-nyɔgɛla koninteyɛ sigi a burɔ, foninya-fɔlɛ le wo tigi la, ado mɔgɔ-wo-mɔgɔ min si a ta-nyɔgɛ tɔgɔ tinya, yuwɛ le wo la.

¹⁹Kuma-pɔrɔtɔ-parata-fɔɛ si mɔgɛ don hakɛ rɔ kɔnɔ ni min kunta a dɛ ma, hɛnkilimɛ le wo la.

²⁰Mɔgɔ-nyimɛta kumɛ mani de iko wodi-gbɛ kɔnɔ tɔnɔ sa mɔgɔ-karagbɛlɛ-miriya la.

²¹Mɔgɔ-nyimɛta kumɛnu si tɔnɛ di mɔgɛnu ma kɔnɔ kun-takolɔnnu-tɔgɔ si to anuna kuntanyɛ la.

²²Marita duwɛ, wo le kelen pe si mɔgɛ ma nɔnfulu-tigi la, ado mɔgɔ ti ke fen sala wo kuma a nyɛrɛta sɛnbɛ la.

²³Kuntan si nyagalen ko-yogoma-kɛ-tinɛ nya min, hɛnkilimɛ fanan si nyagalen hɛnkilimayɛ la wo nya na le.

²⁴Mɔgɔ-telennɛ nyinita fenfen ma, fɔ a wa wo sɔrɔn kɔnɔ mɔgɔ-karagbɛlɛ kilanta fenfen na, wo le ye a birala.

²⁵Gbɛlɛyɛ si ta karagbɛlɛnu na iko fɔnyɔ si ta fen-gbalɛnu na nya min kɔnɔ mɔgɔ-latelenni-banbannɛ si to iko fara-kole.

²⁶I kana tinya-mansɛ sɔ ila wɔlɛ la. Ni i ya wo ma, a si i tɔrɔ iko i wa kotuli sa i nagan ma. A si ma fanan iko ta-sisi tenbi i yɛ la.

²⁷Ni i ya Marila kumɛ bira, i si simayɛ sɔrɔn kɔnɔ karagbɛlɛ si faga yanni ala wati ni ban.

²⁸Yigi min bi mɔgɔ-telennɛnu ma, wo le nyagalan la kɔnɔ yigi sa karagbɛlɛnu ma muk!

²⁹Mari si mɔgɔ-telennɛnu natanka kɔnɔ minnu bi ko-yogomɛ kɛla, a si wonu kasara.

³⁰Mɔgɔ-telennɛnu yisi-kimanɛ lafɛrɛ rɔ kɔnɔ karagbɛlɛnu ti simayɛ sɔrɔn dugu-kole kɛ kuma.

³¹Mɔgɔ-telennɛnu si hɛnkilimaya-kumɛ fɔ kɔnɔ karagbɛlɛnu nagan si wurun a dɛ rɔ.

³²Mɔgɔ-telennɛnu ti mɔgɔ-gboyana-kuma fɔ kɔnɔ karagbɛlɛnu darɔ-kan ti bɛn mɔgɛnu ma.