Read Kuranko Hɛnkilimaya-Kumɛnu 11 Bible Online

Hɛnkilimaya-Kumɛnu 11 - Kuranko bible

Hɛnkilimaya-Kumɛnu 11

¹Mari ko mɔgɛ min bi kensunyɛ kɛla fen-suman-fan la, wo ma di a ye. Kɔnɔ mɔgɛ min bi fan sumanna a kilɛ fɛ, Mari ko wo di a ye.

²Mɔgɔ-wasinɛ ti mɛ yarabila kɔnɔ hɛnkilimayɛ ye mɔgɔ-mafaganɛ bolo.

³Telenbagayɛ si kila-nyimɛ yira mɔgɔ-telennɛ la kɔnɔ ko-yogomɛ si kasara-kilɛ yira mɔgɔ-yogomɛ la.

⁴Mari wa wuli mɔgɔ kitila, nɔnfuli ti a dɛnbɛ wulɔn kɔnɔ ko-telenni-kɛ si mɔgɔ kisi sayɛ ma.

⁵Telenbagayɛ si mɔgɔ-telennɛ-niyi lafulen a ma kɔnɔ karagbɛlɛyɛ si karagbɛlɛ wo bondan.

⁶Telenbagayɛ si mɔgɔ-telennɛ bɔ yakɔrɔ-mamɔɛ rɔ kɔnɔ mɔgɔ-telenbɛlɛta nata si ma gbɛrɛ la a ye.

⁷Mɔgɔ-yogomɛ wa faga, a yigi si tinya. Mɔgɔ-yogomɛ ye fan min nyinina duninya rɔ, fenfen ma wo la. Wo tinyani de!

⁸Telenbagayɛ si mɔgɔ-telennɛnu bɔ nanparan rɔ, ado mɔgɔ-karagbɛlɛnu si don wo dɛ la.

⁹Alla-lɔnbɛlɛnu si anu sigi-nyɔgɛ tinya anu dɛ la. Mɔgɔ-telennɛla hɛnkilimayɛ si a bɔ tɔrɔyɛ rɔ.

¹⁰Ni mɔgɔ-telennɛ fɛ-koe ye tala yarɔ soe burɔ, so-burɔ-mɔgɛ bɛɛ si sewa. Kɔnɔ ni mɔgɔ-yoge fagara soe burɔ, mɔgɛnu si sewa ka tolɔn kɛ a rɔ.

¹¹Mɔgɔ-telennɛ si ala soe munanfaga ka a lata yarɔ kɔnɔ karagbɛlɛnuta-kumɛ si a ma, soe ni tinya pɔ!

¹²Mɔgɔ-dan-tinyanɛ hɛnkili sa kɔnɔ ni hɛnkili ye min bolo, wo si kun a dɛ ma le.

¹³Mɔgɔ ti gbundu-koe fɔ damɛ ye kɔnɔ mɔgɔ-telennɛ si gbundu mara.

¹⁴Ni hɛnkili-kɔla sa mɔgɛ minnu kuma, anu ti anu yogenu nɔ. Kɔnɔ ni hɛnkili-kɔla-siyamɛ ye kan min, nyɔ-mɔgɛnu si nɔ-ko sɔrɔn.

¹⁵Ni i ya i nyɛrɛ ma yili-bolomɛ la, i si nimisa yarɔ kɔnɔ ni i ya i kan-kɔ sɔ yili-bolomayɛ la, a si fisaya i ma.

¹⁶Musu sɔn-nyima-tigi si gbiliyɛ sɔrɔn kɔnɔ mɔgɛ min sɔn ma kin,[2] wo si nɔnfuli le gbansan sɔrɔn.

¹⁷Mɔgɛ min si hina mɔgɛ la, a si tɔnɛ sɔrɔn ala hinanteyɛ rɔ kɔnɔ kinikinibɛlɛ si bɔnɔ ala karagbɛlɛyɛ rɔ.

¹⁸Karagbɛlɛnu si sarɛ min sɔrɔn, wo si a baya kɔnɔ mɔgɔ-telennɛta barayi bɛnta a ma.

¹⁹Ni-kole le telenbagayɛ la kɔnɔ sayɛ siginɛ telenbɛlɛnuna bonda-dɛ la.

²⁰Minnu miri bɛnnɛ ko-yogomɛ ma, wonu ma di Mari ye kɔnɔ mɔgɔ-telennɛnu di Mari ye.

²¹Wo ni la a la serr, ko mɔgɔ-yogomɛ si ata tɔrɔyɛ sɔrɔn kɔnɔ mɔgɔ-telennɛ kunyɛ si bɔ tɔrɔyɛ rɔ.

²²Musi-kinyɛ min hɛnkili sa, wola kinyɛ mani de iko sɛnɛ-dɛɛn-kɔlɔnɛ tenbi kɔsɔ-mɛlan-sunyɛ la.

²³Ni mɔgɔ-nyimɛ nyinita ko-nyimɛ ma, a si wo sɔrɔn. Kɔnɔ ni mɔgɔ-karagbɛlɛ ye nyinina fan do ma, fenfen ti bɔ a rɔ Allata fondo-bɔɛ bolo.

²⁴Mɔgɛ ye fan nila nya min, a si a sɔrɔn ka tenbi wo la. Kɔnɔ mɔgɛ min kɔrɔndi, wo si don bolo-kolonyɛ rɔ.

²⁵Hinante si to fan sɔrɔnna tuma-wo-tuma, ado mɔgɛ min si a ta-nyɔgɛ dɛnbɛ, wo fanan si a sɔrɔn duk!

²⁶Mɔgɛ min si dɔn-fan lamara, a ti a mayira fɔ a dɛ wa gbɛlɛya, mɔgɛnu si wo tigi danka. Kɔnɔ hinɛ ye mɔgɛ min tɔ, wo ti atɛ lamara fɔ ka a mayira kɔnkɔtoenu ma.

²⁷Mɔgɛ min bi ko-nyimɛ nyinina, wo ye tɔgɔ-nyimɛ le sɔrɔnna mɔgɛnu bolo. Kɔnɔ ni mɔgɔ-sigi-kunya bɛnta ko-yogomɛ ma, ala ko-yogomɛ wo si sɛgi a kɔgɔ rɔ.

²⁸Ni min lara ata nɔnfuli la, ala wodi wo si a baya. Kɔnɔ mɔgɔ-latelennɛ si to sabatila iko yanba-kun-kuran si sabati nya min.

²⁹Ni mɔgɔ-wo-mɔgɔ ya nanparan sanba a kebilɛ ma, wo kɛɛ si ma fufafuyi la. Kuntan ti bɔ hɛnkilimɛ kɔrɔ muk!

³⁰Mɔgɔ-telennɛnu si gbɔ nimayɛ la iko kɔlɔmanu si gbɔ nya min. Hɛnkilimɛnu si mɔgɛnu sagan telenbagayɛ wara.

³¹ Ni telenbagɛnu ya tɔrɔyɛ sɔrɔn duninya kɛ rɔ karagbɛlɛ anubɛ hakɛ-tiginu bi tola mintɔ worɔ?