Read Kuranko Hɛnkilimaya-Kumɛnu 13 Bible Online

Hɛnkilimaya-Kumɛnu 13 - Kuranko bible

Hɛnkilimaya-Kumɛnu 13

¹Den-hɛnkilimɛ si a fala kawandili-kan bira kɔnɔ mɔgɛ min si mɔgɔ mayɛlɛn, wo ti kawandili-kan bira.

²Mɔgɔ-nyimɛ si barayi sɔrɔn a darɔ-kan fɛ kɔnɔ karagbɛlɛ sigi-kunya le ko-yogoma-kɛ la.

³A ma i fɛrɛma kuma-tinɛ woletɔ i niyi la si tanka. Kɔnɔ mɔgɛ min ti a miri kuma-tinɛ, a si a nyɛrɛ kasara yona.

⁴Fan-sɔgɛ ya tinya-mansɛ bira nya-wo-nya, a ti a sɔrɔn kɔnɔ sɛbɛ-donnɛ nyinita fenfen ma, a si wo sɔrɔn.

⁵Foninyɛ ma di mɔgɔ-latelennɛ ye kɔnɔ karagbɛlɛla kumɛ si na miliyɛ anubɛ yarabiyi la a ma.

⁶Ko-telenni-kɛ si mɔgɔ-latelennɛ kandan kɔnɔ karagbɛlɛyɛ si hakɛ-tigi labui fugbu!

⁷Mɔgɛ donu bi anu nyɛrɛ mala iko fen bi anu bolo kɔnɔ i si na a taran gbɛ, anu bolo-kolɔn gbɛ perr! Mɔgɛ donu bi anu nyɛrɛ mala bolo-kolɔn la kɔnɔ yaga, fen bi anu bolo duk!

⁸Fen-tigi si a nyɛrɛ kunka wodi la kɔnɔ bolo-kolɔn ti yakɔrɔ-mamɔɛ sɔrɔn wo ko-sunu tɔ.

⁹Mɔgɔ-telennɛnu bi malanna le iko kuru-lɛnpu kɔnɔ karagbɛlɛnu manɛ iko lɛnpu min dufennɛ.

¹⁰Wasinteyɛ si na kɛlɛ-nyɔgɔnyɛ le la kɔnɔ min si a tole masɔ kawandili-kan la, hɛnkilimɛ le wo tigi la.

¹¹Mɔgɛ ye wodi min sɔrɔnna yanfanteyɛ la, fɔnyɔ le ye sigila wodi wo kɔrɔ. kɔnɔ min bi wodi ladɛnna doni-doninyɛ ma, wola nɔnfuli si siyaya a bolo ka sabati.

¹²Ni i yili-madiyanɛ fan do la kɔnɔ i ma a sɔrɔn, i yisi si tinya. kɔnɔ ni i yili-madiyanɛ fan do la, i ni wo sɔrɔn, i niyi ra si diya i ma.

¹³Ni mɔgɛ tɛgɛra kawandili-nyimɛ rɔ, wo si a ma, a ni bui kɔnɔ min bi lala kawandili-kan la, a ye ko-nyinyala wo le ma.

¹⁴Hɛnkilimɛta karan mani de iko tenke-hakikɛ, ado karan wo si mɔgɛ dɛnbɛ ka a bɔ sayɛ da la.

¹⁵Mɔgɛ si hɛnkilimɛ gbiliya kɔnɔ lanayɛ sa min tɔ, wola ban-bole si gbɛlɛya.

¹⁶Yanni hɛnkilimɛ ni ko-wo-ko ma, fɔ a wa a miri kɔnɔ bɛɛ si kun-takolɔnla kuntanyɛ lɔn.

¹⁷Kilaya-lakɛla-yogomɛ si yakɔrɔ-mamɔɛ lana mɔgɛnu kuma kɔnɔ kilaya-lakɛla-nyimɛ si yisi-kimɛ di mɔgɛnu ma.

¹⁸Mɔgɛ min bi a kan-kɔ sɔla kawandili-kan la, wo si to yarabiyi anubɛ bolo-kolonyɛ rɔ. Min si a tole sigi kawandili-kan kɔrɔ, wo si to gbiliyɛ rɔ.

¹⁹Ni mɔgɔ yili-madiyanɛ fan do la, a wa a sɔrɔn, a si sewa. Kuntan ti sɔn a sɔn-yogomɛ boloka-koe ma.

²⁰Ni mɔgɛ tora a gbɛrɛnna hɛnkilimɛnu ma, ale fanan si ma hɛnkilimɛ la kɔnɔ ni mɔgɛ tora a gbɛrɛnna kun-takolɔnnu ma, ale fanan si tɔrɔ anu fɛ.

²¹Kasarɛ si bila ko-yogoma-kɛlɛnu fɛ kɔnɔ mɔgɔ-latelennɛ si hɛrɛ sɔrɔn.

²²Mɔgɔ-nyimɛ mamanɛnu si do sɔrɔn a kɛɛ rɔ kɔnɔ hakɛ-tiginu bolo-fannu bi tola mɔgɔ-latelennɛ denu ye.

²³Bolo-kolɔnnu si ke fen sɔrɔnna le anuna sɛnɛnu tɔ kɔnɔ ni anu ma anu tanka telenbɛlɛnu ma, wonu si wonu bɔ anu bolo.

²⁴Ni i ma ila dan kolo, ila dan ma di i ye. Ni minna dan di a ye, a si a kolo a kin na!

²⁵Kɔnkɛ ti mɔgɔ-telennɛ bira kɔnɔ karagbɛlɛ ti a buyi lafa mumɛ!