Read Kuranko Hɛnkilimaya-Kumɛnu 16 Bible Online

Hɛnkilimaya-Kumɛnu 16 - Kuranko bible

Hɛnkilimaya-Kumɛnu 16

¹Mɔgɔ si kuma kɔnɔ Mari, wo ye a mala le.

²Mɔgɔ kɛ-nya kin a nyɛrɛ ya la kɔnɔ Mari wo ma fili ma sɔndɔmɛ ma.

³I ni i fɛ-koe bɛɛ dantɛgɛ Mari ma, woletɔ ni i ya i bole don ko-wo-ko rɔ, wo si ta yarɔ.

⁴Mari ya ko-wo-ko ma, wo ma-kɔrɛ ye nyɔ. Hali karagbɛlɛnu, a ye wonu namarala kiti-tɛgɛ-telela ko la.

⁵Mɔgɔ-wasinɛ wo fenfen ma di Mari ye. Wo ni la a la serr, ko anu bi tɔrɔla le, yɔ!

⁶Keninteyɛ anubɛ tonyɛ si a ma, mɔgɔ hakɛ ma si koto. Mɔgɛ min bi kilanna Mari la, wo si fara le ko-yogoma-kɛ la.

⁷Ni i kɛ-nya ya Mari hɛnɛ, hali i yoge, Mari si wo ma i diyana-mɔgɛ la.

⁸Yanni i ni nɔnfulu ladɛn kensunteyɛ la, a fisa, hali i ya doni de sɔrɔn telenbagayɛ rɔ, wo kin.

⁹Mɔgɔni-gbuyi si ke a mirila koe ma a burɔ kɔnɔ Mari wo ye a latɛgɛla le.

¹⁰Mansɛta kumɛ mani de iko Maritɛ. A wa kiti-wo-kiti tɛgɛ, tonyɛ le wo la.

¹¹Ka fan suman telenbagayɛ la, wo ye bɔla Mari le bolo, ado Mari ti sɔn kensunteyɛ ma.

¹²A ma bɛn, karagbɛlɛyɛ ni diya mansɛ ye bawo telenbagayɛ le ye a mala, mansayɛ ni to sɛnbɛ rɔ.

¹³Tonya-fɔlɛnu di mansɛ ye, ado min bi tonyɛ fɔla a ye, wonu denu si a hɛnɛ.

¹⁴Ni mansɛ diminyara, tumado, mɔgɛ do si na faga kɔnɔ hɛnkilimɛ si mansɛ wota fondo-bɔɛ makima.

¹⁵Ni mansɛ sewara i la, i niyi ra si diya i ma. Ala sewɛ wo si diya mɔgɛ ye iko banda-kun-fɔlɛ wa bui dugi ma.

¹⁶Yanni i ni sɛnɛ-siyamɛ sɔrɔn, a fisa, i ni hɛnkili sɔrɔn. Yanni i ni wodi-gbɛ-siyaman sɔrɔn, a fisa, i ni lɔnnɛ sɔrɔn.

¹⁷Mɔgɔ-nyimɛ ye bilala kila-telennɛ min fɛ, wo kanɛ le ko-yogoma-kilɛ ma. Ni min ya a tagama-tinɛ yabɔ, wo si simayɛ sɔrɔn.

¹⁸Mɔgɔ-wasinɛ ti mɛ buila. Wasinteyɛ si mɔgɛ kasara.

¹⁹Yanni wobɛ mɔgɔ-wasinɛnu ni nɔnfuli tala wo nyɔgɔn tɛma, a fisa, i ni to sigini bolo-kolonyɛ rɔ mɔgɔ-famayiginɛnu tɛma.

²⁰Ni i ya i tole masɔ i labilalɛ la, i wara-koe si ta yarɔ. Mɔgɛ min lara Mari la, wo si sewa.

²¹Mɔgɛnu bi a kalama ko hɛnkilimɛ si koenu nakɔrɔsi ka ko-latelennɛ kɛ a kilɛ fɛ. A kuma-nya si a ma, ala karan-den ni ta yarɔ.

²²Hɛnkilimayɛ si simayɛ di a tigi ma kɔnɔ kuntanyɛ si kuntannu tɔrɔ.

²³Yanni hɛnkilimɛ ni kuma, a si a miri. Ni a ya kuma-wo-kuma fɔ, hɛnkilimaya-kuma-bɛrɛbɛrɛ le wo la min si mɔgɛ karan a kilɛ fɛ.

²⁴Kuma-nyimɛ mani de mɔgɔ da rɔ iko liyi. A si a ma, mɔgɛ ni sewa, ado a si mɔgɔ fɛrɛ-bɔnkɛ dɛnbɛ.

²⁵ Mɔgɛ ye a mirila ko ala kilɛ kin ale nyɛrɛ yala kɔnɔ tɔ-a-la, wo si ma a bolo saya-kilɛ la.

²⁶Fen-dɔn-sɔgɛ ye mɔgɛ min na, wo le ye a rayala wɔlɛ ma, ado kɔnkɛ min bi a birala, wo fanan si a ma, a ni a sɛbɛ don.

²⁷Yanfante si to ko-yogomɛ mala mɔgɛnu na. Hali a ye kumɛ min nabɔla a dɛ rɔ, wo si mɔgɛ mamintan.

²⁸Karagbɛlɛ si to kɛlɛ lawulila. Nafigi si diyana-mɔgɔ filɛ fara anu nyɔgɔn na feu!

²⁹Karagbɛlɛ si a ta-nyɔgɛ bɔ kila-nyimɛ fɛ. A si a lasama kilɛ ma.

³⁰Karagbɛlɛ si yanfɛ don a ya-lakalan-bole fɛ ko-yogomɛ rabɛn-tinɛ. A tenbi ko-yogomɛ mala, a si a dɛ don a kɔrɔ.

³¹Simayɛ le telenbagɛ sarɛ la, ado a kun-gbɛ si ma a gbiliya-fan la.

³²Yanni i ni sɛnbɛ sɔrɔn ka so-kun kelan gbesi, a fisa, i ni kun i nyɛrɛ ma ka i nyɛrɛ mara.

³³Mɔgɛ si hɛnkili nyini koron-nakɛ fɛ kɔnɔ a ye koe min nadanna wo la, Mari le ye wo kɔrɛ yirala a la.