Read Kuranko Hɛnkilimaya-Kumɛnu 19 Bible Online

Hɛnkilimaya-Kumɛnu 19 - Kuranko bible

Hɛnkilimaya-Kumɛnu 19

¹Yanni i ni to kumala iko kun-takolɔn, a fisa, i latelennɛ ni to bolo-kolonyɛ rɔ.

²A ma kin, koe do ladan-sɔgɛ ni mɔgɛ do bira min nadan-hɛnkili sa a bolo. A ma kin, mɔgɛ ni gbaran a nyɛrɛ la ko-ladan tinɛ.

³Mɔgɛ si a nyɛrɛ tinya ala kuntanyɛ la kɔnɔ hali wo, a si a tɛgɛ sigi Mari ma.

⁴Nɔnfuli si a ma, mɔgɛ diyana-mɔgɛnu ni siyaya kɔnɔ bolo-kolonyɛ si a ma, mɔgɛ diyana-mɔgɛnu ni a boloka.

⁵Sereya-bɔla-yogomɛ-makolɔn ti to wo nya fu, fɔ a wa tɔrɔyɛ sɔrɔn. Foninya-fɔla-gbɛlɛ-makolɔn ti to wo nya fu, fɔ a wa atɛ sɔrɔn.

⁶A sɔgɛ ye mɔgɔ-siyaman na, anubɛ mɔgɔ-banu ni to diyanayɛ rɔ. A sɔgɛ si mɔgɔ-siyaman bira fanan, anubɛ mɔgɔ-kɔlɛnu ni to kirabɔla.

⁷Bolo-kolɔn ma di a na-kelen-nyɔgɛ ye kan min, a si na diya mɔgɔ-gbɛrɛkɛ le ye wo rɔ, wa? Hali a ya diyanayɛ nyini mɔgɛ yakɔrɔ, a ti a diyana-mɔgɛ sɔrɔn.

⁸Hɛnkili-nyinɛ di mɔgɔ-wo-mɔgɔ ye, wo di a nyɛrɛ ye. A sɔgɛ ye mɔgɛ min na ka ko-siyaman kɔrɛ lɔn, wo si sabati.

⁹Sereya-bɔla-yogomɛ ti to wo nya fufafu fɔ a wa tɔrɔyɛ sɔrɔn. Mɔgɔ-wo-mɔgɔ ye foninyɛ fɔla, fɔ a wa kasara tɔrɔyɛ rɔ.

¹⁰A ma kin, kun-takolɔn ni taran a diya. A ma kin fanan, mansɛnu ni to yɔɔnnu kɔrɔ.

¹¹Hɛnkili ye mɔgɛ min na, wo le ye a yisi birala. Min bi a yɛ lagbanna mɔgɔ sɔn-yogomɛ kun na, wo tigi ara gbiliyɛ di a nyɛrɛ ma.

¹²Ni mansɛ diminyara i ma, wo mani de iko yarɛ tenbi bɔrɔndɔ-bɔrɔndɔla kɔnɔ ni a sewara i la, wo mani de i ye iko banda-kun-fɔlɛ.

¹³Den-kun-takolɔn si a fa rabunden. Musi min bi gbɛngbɛrɛnna ala kei dala tuma-wo-tuma, wo mani de iko serende tenbi tintila tisili la.

¹⁴Mɔgɛ si bɔn anubɛ nɔnfuli sɔrɔn a na anubɛ a fa kɛɛ rɔ kɔnɔ musu-nyima-sɔrɔn, wo ye bɔla Mari le bolo.

¹⁵Tinya-mansɛ si to sani bɔn la, kɔnkɛ ye a fisikanna.

¹⁶Ni min ya Allala tɔnnu bira, wo si simayɛ sɔrɔn kɔnɔ ni min ya a kan-kɔ sɔ tɔn wonu na, wo ti siyi labɔ.

¹⁷Ni mɔgɛ ya fen di bolo-kolɔn ma, a si ma iko a ara Mari le dɔndɔ bawo wo le ye fen-dilɛ sarala.

¹⁸Yanni ila dan ni kenkeriya, i ni a kolo. Ni i ma wo ma, i wara a dɛnbɛ a nyɛrɛ-kasara-koe ma.

¹⁹Mɔgɛ min yisi lakala, a si nanparan lana a nyɛrɛ kuma tiriya! I tenbi a bɔla nanparan do rɔ, a ye tala nanparan do ratɛgɛla tun.

²⁰Ni i tara i tole masɔ kawandili-kan la ka a bira, lunyɛ do, fɔ i wa ma hɛnkilimɛ la.

²¹Mɔgɛ si a miri le kɔnɔ Mari, wo le ye a latɛgɛla le.

²²Yanni mɔgɛ ni ma kɔrɔnditore la ka a bolo-fan kumagbesi, a fisa worɔ, a ni ma bolo-kolɔn la bawo miliya-koe le foninya-fɔɛ la.

²³Ni min ya Mari gbiliya, wo si simayɛ sɔrɔn ka taran a fanbolo.

²⁴Tinya-mansɛ donu bi nyɔ, hali a wa a dɔgɔma bi kɔnɔ ka a ladon a nyɛrɛ dɛ rɔ, a ti ke wo mala.

²⁵Ni min si mɔgɛ mayɛlɛn, mɔgɛ wa wo tigi gbesi, wo si a ma, ale kun-takolɔn ni hɛnkili sɔrɔn. Ni i ya hɛnkilimɛ labila, a si lɔnnɛ sɔrɔn.

²⁶Mɔgɛ min si a na anubɛ a fa gben bɔn la, wo ara a na anubɛ a fa lamiliya ka anu nayarabi pɔ!

²⁷Nna den, ni i ya i ban karan la, i ya min lɔn kɔrɔma la, i si na nyina wo ko.

²⁸Sereya-yogoma-bɔlɛnu si yɛlɛn telenbagayɛ ma. Ko-yogoma-kɛ-sɔgɛ si to karagbɛlɛ birala.

²⁹Mɔgɛ min si to mɔgɛ mayɛlɛnna, tɔrɔyɛ ye wo makɔnɔna. Gbesili fanan bi kun-takolɔn makɔnɔna.