Read Kuranko Hɛnkilimaya-Kumɛnu 20 Bible Online

Hɛnkilimaya-Kumɛnu 20 - Kuranko bible

Hɛnkilimaya-Kumɛnu 20

¹Baan-minyɛ si mɔgɛ ma yuwɛ anubɛ sɔnkɔtoe la. Min bi a nyɛrɛ donna wo ko-sufa rɔ, hɛnkilima ma wo tigi la.

²Mansa-diminyanɛ si ma iko yarɛ tenbi bɔrɔndɔ-bɔrɔndɔla. Mɔgɛ min bi mansɛ ladiminyala, wo tigi ara a niyi fili a rɔ.

³Kun-takolɔn si sɔnkɛ tɛgɛ tiriya kɔnɔ ni i ko i ni gbiliyɛ sɔrɔn, fɔ i ni i masɛgi wo ko-sufanu na.

⁴Wɔli-kɛ-wati wa ke, tinya-mansɛ ti sɔn wɔlila, ado dɔn-fen-tɛgɛ-wati wa ke, a ti fenfen sɔrɔn.

⁵Mɔgɔ-burɛ lɔn-koe gbɛlɛ iko yi-suri-koe kɔlɔn-yanma-wɛ rɔ kɔnɔ hɛnkilimɛ si ke mɔgɔ-burɛ surila le.

⁶Mɔgɔ-siyaman si a fɔ ko, “Mɔgɔ-nyimɛ le nde la” kɔnɔ mɔgɔ-latelennɛ yen-koe gbɛlɛ.

⁷Mɔgɔ-latelennɛla dan si sewa bawo a fa tagamanta telenbagayɛ rɔ.

⁸Mansa-mayiginɛ tenbi mɔgɛnu kitila, a si a lɔn min ya ko-yogomɛ ma.

⁹Ka a fɔ ko, “N yisi gbɛni de! Sɔn sa n na.” Yon si ke wo fɔla?

¹⁰Min si mɔgɔ kensunya anuna fen-suman-fannu na, wo tigi ma di Mari ye mumɛ!

¹¹Dennɛ si lɔn a kɛ-nya ma, ni a latelenta.

¹²Mari ya tole di ma ma alako ma ni ko lamɔɛn. A ya yɛ fanan di ma ma alako ma ni fen yen.

¹³I kana kinɔgɛ keni ka to kinɔgɔla, ni wo ma, i si to bolo-kolonyɛ le tɔ. I yɛ maka woletɔ i si dɔn-fen-siyaman sɔrɔn.

¹⁴Mɔgɛ tenbi fan do sanna, a si a fɔ ko, “A dɛ gbɛlɛ” kɔnɔ a wa ban a sanna tumɛ min, a sewanɛ si ta a fɔ ko, “Kɛ dɛ diyara n na.”

¹⁵Dugu-kɔrɔ-nɔnfuli siya kɔnɔ hɛnkilimaya-kuma-fɔlɛnu ma siya.

¹⁶Ni mɔgɛ ya a nyɛrɛ ma yili-bolomɛ[4] la sundan anubɛ duguran tɛma, a fisa, fen-tigi-bole ni taran ale yili-bolomɛ la.

¹⁷Ni mɔgɛ ya dɔn-fan sɔrɔn kensunyɛ rɔ, wo si diya a da rɔ kɔnɔ wati wa tenbi, a si ma a da rɔ iko wasakɔrɛ.

¹⁸Yanni mɔgɛ ni ko ladan, a ni mɔgɛ do nyini min si hɛnkili di a ma. Hali mɔgɛ ye kɛlɛ-belebele do kɛla, fɔ a ni mɔgɛ donu sɔrɔn minnu si hɛnkili di a ma.

¹⁹Ko-rafɔlɛ ti ke gbundi marala. I masɛgi kuma-pɔrɔtɔparata-fɔlɛ la.

²⁰Mɔgɛ min bi a na anubɛ a fa mɔɛnna, wo wara-koe ra si de dogbe iko lɛnpu si dufen pinpi rɔ nya min dɔi!

²¹Mɔgɛ ye nɔnfuli min sɔrɔnna tiriya, a ma tɔrɔ a nyini tinɛ, nɔnfuli wo ti a laban a bolo bawo duwa sa nɔnfuli wo rɔ.

²²Mɔgɔ kana a tayili sara. I ni dinya Mari kɔma, ale si ila koe bɛɛ latelen i ye.

²³Minnu si kensunyɛ kɛ fen-suman-fannu na, wonu ma di Mari ye.

²⁴Mari le si mɔgɔ wara-koe latɛgɛ. Mɔgɔ si a nyɛrɛ-fɛ-koe lɔn kama worɔ?

²⁵Ni mɔgɛ ma a miri a dakan-don-tinɛ Mari wara la, wo si ma a ye iko gbɛrɛ.

²⁶Mansa-hɛnkilimɛ si ala mɔgɛnu tafɛ anu tɔrɔ tinɛ ka mɔgɔ-radunɛnu bɔ mɔgɔ-latelennɛnu yala.

²⁷Iko mɔgɛ si lɛnpu sigi pinpi rɔ nya min, a ni waan raka, ma burɛ siginɛ gbɛ rɔ Mari yala wo nya na le.

²⁸Ni mansɛ ko a ni kun ala mɔgɛnu ma, fɔ a ni keninteyɛ anubɛ latelan bira a bolo tɔ ala mɔgɛnu bara la.

²⁹Mɔgɛ yɛ si bɔ keminɛ-mɛsɛ la bawo fanka-siyaman bi a bolo kɔnɔ mɔgɛ si kɛmɔgɛ gbiliya bawo a kunyɛ ara gbɛ.

³⁰Min si karagbɛlɛyɛ bɔ mɔgɔ bolo ma, fɔ gbesili anubɛ tanban. Wo si a ma, a ni ko-yogomɛ boloka ka sɔn-nyimɛ bi.