Read Kuranko Hɛnkilimaya-Kumɛnu 28 Bible Online

Hɛnkilimaya-Kumɛnu 28 - Kuranko bible

Hɛnkilimaya-Kumɛnu 28

¹Karagbɛlɛ si a buri hali mɔgɔ sa a kɔma kɔnɔ mɔgɔ-latelennɛ kerinte iko yarɛ.

²Ni nyamanita-mɔgɛnu murutiyanɛ, anu si to anuna kun-tiginu mayɛlɛmana. Kɔnɔ ni hɛnkilimɛ ye nyamanɛ kun na, ala mansayɛ si sɛnbɛ sɔrɔn ka mɛ.

³Kun-tigi bolo-kolɔn min bi a ta-nyɔgɛ bolo-kolɔn yakɔrɔ-mamɔla, wo mani de iko bandɛ min bi nala ka ki-fannu tinya.

⁴Mɔgɛ min ti sɔn tɔn-bira-koe ma, wonu si karagbɛlɛnu matɔgɔ. Kɔnɔ mɔgɛ minnu si tɔn bira, wonubɛ karagbɛlɛnu ti bɛn.

⁵Karagbɛlɛnu ma telenbagayɛ lɔn. Kɔnɔ mɔgɛ minnu bi Mari batola, wonu ya telenbagayɛ lɔn.

⁶Yanni i ni ma nɔnfulu-tigi la, i la ma telen, a fisa, i ni to bolo-kolonyɛ rɔ, i latelennɛ.

⁷Den-hɛnkilimɛ si tɔn bira. Kɔnɔ dan min bi mɔgɔ-rakolɔn mala a diyana-mɔgɛ la, wo si ma a fa miliya-koe la.

⁸Ni mɔgɛ ya tɔnɛ nyini a ta-nyɔgɛnu kuma ka ma nɔnfulu-tigi la, ala nɔnfuli wo si to mɔgɔ-hakikɛnu ye minnu bi hinala bolo-kolɔnnu na.

⁹Tɔn-birɛ ma di mɔgɛ min ye, hali wo ya Alla madiya, a ti a wɔlɔ matɔlɔ a la.

¹⁰Mɔgɛ min bi mɔgɔ-latelennɛ labuila hakɛ rɔ, wo tigi si bira a nyɛrɛta gbɛrɛ-lasiginɛ la. Kɔnɔ fɛɛ sa mɔgɛ min na, wo si sabati.

¹¹Fen-tigi ya a lɔn ko hɛnkili ye ale le la. Kɔnɔ bolo-kolɔn min ya ko lɔn, wo ma fen-tigi lɔn hɛnkilimɛ la.

¹²Ni mɔgɔ-nyimɛ ya sɛnbɛ sɔrɔn, mɔgɛ bɛɛ si sewa. Kɔnɔ ni wunduyoge ya sɛnbɛ sɔrɔn, mɔgɛ bɛɛ si anu dogon a kɔrɔ.

¹³Mɔgɛ min si a hakɛ dogon, wo tigi ti ta yarɔ. Kɔnɔ mɔgɛ min bi a hakɛ bɛɛ labɔla gbɛ ma ka anu boloka, Mari si kinikini wo tigi ma.

¹⁴Mɔgɛ min bi tola Mari gbiliyala, wo tigi si sewa. Kɔnɔ min bi tola a yisi gbɛlɛyala, wo tigi si tinya pɔ!

¹⁵Minnu kuma-kuma-fɔla sa, ni karagbɛlɛ mara mansɛ la wonu kuma, a si a lagbɛlɛya anu kuma iko yara-kɔnkɔtoe wa a labɔ sogenu ma.

¹⁶Kun-takolɔn wa kun-tigiyɛ sɔrɔn, a si wunduyogoyɛ sigi mɔgɛnu ma. Kɔnɔ ni mɔgɛ ya a kan-kɔ sɔ kensunya-fannu na, a si simayɛ sɔrɔn.

¹⁷Mɔgɔ-fagalɛ-yisi ti sa. A yisi si to a tɔrɔla ha a si faga, ado mɔgɔ-wo-mɔgɔ kana a dɛnbɛ.

¹⁸Mɔgɔ-latelennɛ si taran a diya kɔnɔ telenbɛlɛ si bui fugbu!

¹⁹Mɔgɛ min bi ala sɛnɛ fɛ-birala a kilɛ fɛ, dɔn-fan ti ban wo warɛ. Kɔnɔ mɔgɛ min bi yabatoyɛ ladanna tuma-wo-tuma, bolo-kolonyɛ si wara wo ma.

²⁰Lanaya-mɔgɛ si duwɛ sɔrɔn boi, kɔnɔ wodi-kalama-nyininɛ anubɛ tɔrɔyɛ ti fara.

²¹Ka lafisayalɛ kɛ, wo ma kin, ado kiti-tɛgɛla-su wo si a nyɛrɛ kuman-kan yɛlɛma dɔgɔma-kundu kelan fɛ.

²²Mɔgɛ min bi hɔnna a nyɛrɛ la alako a ni wodi sɔrɔn tiriya, a ma a lɔn ko bolo-kolonyɛ ye a makɔnɔna yarɔ.

²³Mɔgɛ min bi ila fɛɛ yirala i la, wo ye i dɛnbɛn-koe le tɔ ka tenbi i matɔgɔlɛ la.

²⁴Mɔgɛ min bi a sɔrɔnbagɛnu kankanna, a ni a fɔ ko, “Tana ma kɛ la,” wonubɛ kasarantenu takɛn de!

²⁵Mɔgɛ min si hɔn a nyɛrɛ la, wo si kɛlɛ-nyɔgɔnyɛ lawuli le. Kɔnɔ mɔgɛ min bi lala Mari la, wo wara-koe si to tala yarɔ.

²⁶Mɔgɔ-wo-mɔgɔ lara a nyɛrɛ la ha, kun-takolɔn le wo tigi la. Mɔgɛ min bi tagamana hɛnkilimayɛ rɔ, wo tigi si simayɛ sɔrɔn.

²⁷Mɔgɛ min bi hinala bolo-kolɔn la ka anu kɔ, fenfen ti dasa wo tigi la. Kɔnɔ mɔgɛ min bi a yɛ firindila bolo-kolɔnnu ma, wo tigi anubɛ danka ti fara.

²⁸Mɔgɔ-yoge wa kun-tigiyɛ sɔrɔn, mɔgɛ bɛɛ si a dogon a kɔrɔ. Kɔnɔ a wa kasara, mɔgɔ-latelennɛnu si wara.