Read Kuranko Hɛnkilimaya-Kumɛnu 8 Bible Online

Hɛnkilimaya-Kumɛnu 8 - Kuranko bible

Hɛnkilimaya-Kumɛnu 8

¹ Wo ye kan-bo-kan, wo ni wo tole masɔ. Hɛnkilimayɛ ye wo rakelela. Wo taranta kila la wo, wo taranta kɔnkɔ kuma wo, wo taranta kiti-fɔ-tina wo, wo tole masɔnɛ ni to.

⁴A ko, “Hadama-dan min bɛɛsi ye dugu-kole kuma, n bi wo damasi rakelela.

⁵Ni denniya-koe le i bolo ma, i fara wonu na. I ni don kinaya-ko-ladan rɔ. Ni i ye yuwaya-ko-ladan le la, i fara wo la. I ni don hɛnkilimaya-ko-ladan rɔ.

⁶I tole masɔ nna kuma-hakikɛnu na. N bi min bɛɛ fɔla i ye, tonyɛ le wonu na, ado anu bɛnta. A ma di n ye, n ni n dɛ bila karagbɛlɛya-kumɛ rɔ.

⁸N ba kuma-wo-kuma fɔ, tonyɛ le wo la. Hali foninya kelen, a basanni ma a la.

⁹Nna kumɛ kɛnu, hɛnkilimɛnu denu bi anu kɔrɛ lɔnna. Minnu bara karan, wonu denu bi nna kumɛ kɛnu lɔnna tonyɛ la.

¹⁰Yanni wo ni sɛnɛ anubɛ wodi-gbɛ bi, wo ni nta karan bi.

¹¹Nde hɛnkilimayɛ tenbira dugu-kɔrɔ-nɔnfuli la. I ye fan min nyinina duninya-latɛgɛ kɛ rɔ, nde tenbira wo dama la tɛrr!

¹²“Nde hɛnkilimayɛ, ko-kɔrɔ-lɔn ye nde le tɔ. Karan ye nde le tɔ. Ka ko latɛgɛ n nyɛrɛ ma, wo fanan bi nde le tɔ.

¹³Ni i ko i ni Mari gbiliya, fɔ i ni i ban ko-yogomɛ la. Wasinteyɛ anubɛ foninya-fɔɛ anubɛ ko-yogoma-kɛ, wonu ma di nde ye.

¹⁴Kɔnɔ miriya-nyimɛ anubɛ hɛnkilimayɛ ye nde bolo, ado n sɛnbɛ kolo de!

¹⁵N bi mansɛnu anubɛ kun-tiginu dɛnbɛna ka kun-tigiya-nyimɛ kɛ.

¹⁶Kun-tigi-telennɛ min bɛɛ ye duninya rɔ, anu makoe ye nde leta dɛnbɛnɛ la.

¹⁷Ni min ya n keni, wo tigi si diya n ye. Ni min ya n nyini, wo tigi si n yen.

¹⁸N si a ma, mɔgɛnu ni gbiliyɛ anubɛ fen-kolomɛnu sɔrɔn. Nde si anu nasabati ka nɔnfuli di anu ma.

¹⁹Mɔgɛnu bi tɔnɛ min sɔrɔnna nde rɔ, wo tenbira sɛnɛ anubɛ wodi-gbɛ la.

²⁰N bi tagamana telenbagɛnuna kilɛ le fɛ. N bi lafisaya-kilɛ le ma.

²¹N di mɔgɛ minnu ye, n si wonuna bɔnnu nafa fen-kolomɛnu anubɛ nɔnfuli la.

²² “Yanni duninya da ni bira, nde, hɛnkilimayɛ ye nyɔ nun. Yanni Mari ni duninya dan tumɛ min, a ya nde, hɛnkilimayɛ ma dali-fen-kunyɛ la.

²⁴Yanni kɔgɔ-yi anubɛ tenke ni sa anu worɔn la, n bi nyɔ nun.

²⁵Yanni kɔnkɛnu ni dan duninya rɔ, wo ya a taran, n bi nyɔ nun.

²⁶Yanni Alla ni dugu-kole kɛ ladan, hali a bolo-fa-kelan bɔnkɛ la, wo la ma dan n kɔma.

²⁷Alla ye san-kole rafulenna kɔgɔ-yi kuma tumɛ min, n bi nyɔ nun.

²⁸A ya banda-finyɛ sa san-kole ma n yala le. Yinu tugura a rɔ n yala le ka ma kɔgɔ-yi la.

²⁹Alla ya kɔgɔ-yi-dan sa n yala le. Alla ya duninya kurukɛ n yala le.

³⁰A ye kɛ damasi ladanna tumɛ min, n bi a fɛ iko boloma-wɔli-kɛlɛ. A sewanɛ n na tuma-wo-tuma. Nde bɛrɛni sewanɛ a la wo nya na le.

³¹Duninya ladanta nya min, n nyagalenta wo la. N nyagalenta hadama-dannuna dan-bole la fanan.

³²“Kɔnɔ fonikenu, wo ni wo tole masɔ n na kaka. Ni wo ya nna kumɛ bira, wo si sewa.

³³N bara wo karan min na, wo ni to wo mirila wo ma. Wo kana wo ban nde, hɛnkilimayɛ la.

³⁴Mɔgɛ min si to nala tuma-wo-tuma ka a tole masɔ n na, wo tigi si sewa. Wo si to n makɔnɔna ka a yɛ bɛn kilɛ ma.

³⁵Mɔgɛ min si to n nyinina tuma-wo-tuma, wo le ye simayɛ sɔrɔnna, ado a wara-koe si Mari hɛnɛ.

³⁶Kɔnɔ mɔgɛ min sa sɔnna n nyinina, wo ara a nyɛrɛ tanban, ado a ara sayɛ keni.”