Read Kuranko Makawandili Kumɛnu 12 Bible Online

Makawandili Kumɛnu 12 - Kuranko bible

Makawandili Kumɛnu 12

¹I tenbi fonikeyɛ rɔ, i miri i Dali-Mari ma. Wati-gbɛlɛyanɛnu bi nala i si a fɔ ko, “Koe bɛɛ bɔrɔ ara bɔ n ye.”

²Lunyɛ do, tele anubɛ karɛ anubɛ lolenu, i ti ban wonu waan ragbɛla, ado tele-wo-tele, a si ma iko bandɛ le finna ile yala.

³I bole minnu bi i lakandanna nun, wonu si to yɛrɛyɛrɛnna. I sɛnbɛ ye i kian minnu tɔ, wonu ta si yɔpɔ. I dɛ ra si kolonya, hali dɔn-fan, i ti ke a nunkula. I yɛ ti ke ko ragbɛla tun.[3]

⁴I tole si gberen, woletɔ i ti mɔgɛnu sɔnkɔ-kan lamɔɛn. Hali muru-da-lasa-kan, i ti a lamɔɛn.[4] Wo wati rɔ, koni-mɛsɛn-kan si i lakunden kɔnɔ i ti mɔgɛnu sigi-sa-kan namɔɛn tun.

⁵I si kilan kan-tina-layan-bɛnu na. Hali ka tagama, a si gbɛlɛya i kuma. I kunyɛ si gbɛ iko bandan-fere. I si bandan i nyɛrɛ kɔrɔ. Musu-ko-miriya ti na i burɔ.[5] Ma dama ye a labanna sayɛ le ma. Min ba ta, anu ni to dila wo kɔma.

⁶I miri i Dali-Mari ma, yanni i niyi la ni ban. Ila wodi-gbɛ-yɔlɔkɛ ra ni tɛgɛ min si a ma, ila sɛnɛ-lɛnpu ni tinya. I miri a ma yanni ila yi-layɛlɛ-yili ni tɛgɛ, ila yi-layɛlɛ-bɔnku-dagɛ ra ni tii.[6]

⁷Ma fɛrɛ si sɛgi bɔnkɛ rɔ. Ma niyi wo si sɛgi Alla ma a bɔra kan min.

⁸Nde, karan-mɔgɔ ko duninya kɛ ragbɛlɛ. A nya ti yen hali!

⁹Kɔnɔ hɛnkili ye nde, karan-mɔgɔ bolo min kɛ, woletɔ n tora mɔgɛnu karanna. N ya hɛnkilimaya-kumɛnu nakɔrɔsi ka a lɔn ni tonyɛ ye anu tɔ.

¹⁰N ya n taya ka kuma-kolomɛnu sɛbɛ, ado n ya min bɛɛ sɛbɛ, wo bɛɛ telenta, wo bɛɛ tonya.

¹¹Saga-kandannɛla saga-lagbengben-kɔlɔma mani de iko hɛnkilimaya-kumɛ minnu si mɔgɛnu to kilɛ la. Mɔgɛ ye lɔntuma min gbangbanna gben, wo mani de iko hɛnkilimaya-kumɛ minnu si mɔgɛnu sɔ yiri! Alla le ya kumɛ kɛnu don ma bolo, Alla, bɛɛta saga-kandannɛ, kɔni.

¹²Nna den, a ma i fɛrɛma fanan koe dola ko la. Kɛdi-sɛbɛ ti ban, ado karan-ba-dɛgbɛ si mɔgɛ rabɔ le.

¹³N bara ban kɛ bɛɛ fɔla nkɛkuna, kuma kelen de tonɛ n bolo gbɛ! I ni kilan Alla la ka to ala tɔnnu birala bawo Alla ya ma ladan wo lela ko la.

¹⁴Ma ya ko-wo-ko ma, Alla si ma kiti wola ko la. A yogoma wo, a nyima wo, hali a dogonta koenu, a si ma kiti wo bɛɛla ko la.