Read Kuranko Makawandili Kumɛnu 3 Bible Online

Makawandili Kumɛnu 3 - Kuranko bible

Makawandili Kumɛnu 3

¹Koe min bɛɛsi ye mala duninya kɛ rɔ, anu bi mala a tumɛ le tɔ Alla ara min natɛgɛ.

²Mɔgɛ ye sɔrɔnna a wati le ma, mɔgɛ ye sayala a wati le ma. Fen-fui-wati ye nyɔ, a tɛgɛ-wati ye nyɔ.

³Mɔgɔ-faga-wati ye nyɔ, a dandan-wati ye nyɔ. Fen-wayan-wati ye nyɔ, a sɔ-wati ye nyɔ.

⁴Di-kɛ-wati ye nyɔ, yɛlɛn-wati ye nyɔ. Nimisa wati ye nyɔ, dɔn-kɛ wati ye nyɔ.

⁵Ki-n-bara-wati ye nyɔ, fara-wati ye nyɔ. Bolo-don-kɛɛ-kɔrɔ-wati ye nyɔ, nyɛnsɛn-wati ye nyɔ.

⁶Fen-nyini-wati ye nyɔ, a boloka-wati ye nyɔ. Fen-namara-wati ye nyɔ, a lakɛ-a-rɔ-wati ye nyɔ.

⁷Fen-tafara-wati ye nyɔ, fen-takara-wati ye nyɔ. Made-wati ye nyɔ, kuma-wati ye nyɔ.

⁸Diya-wati ye nyɔ, gboya-wati ye nyɔ. Kɛlɛ-wati ye nyɔ, yisi-kima-wati ye nyɔ.

⁹Mɔgɛ ye wɔlɛ min bɛɛsi kɛla, a si nfen tɔnɛ sɔrɔn wo rɔ?

¹⁰Alla ara dunu-belebele minnu sigi male hadama-dannu kuma, nde ya wonu nakɔrɔsi.

¹¹A ara koe bɛɛ wati latɛgɛ a kilɛ fɛ. Alla ara habadan-ko-lɔn-koe sigi hadama-dan yisi rɔ kɔnɔ hali wo, ka a bi duninya dabirɛ ma ha duninyala ban, mɔgɔ ti ban Alla wara-koe lɔnna dɛnkɛninyɛ kɔma.

¹²Nba, min fisa, mɔgɔ tenbi a niyi la, a ni to a nyɛrɛ ladiyala a siyi-tele-bɛɛ kɔrɔ.

¹³Woletɔ mɔgɛ bɛɛ ni fen dɔn ka a min ka a nyɛrɛ ladiya a halala-fan rɔ. Allata kɔ-fan le wo dama la.

¹⁴Alla ara min nadan, wo si to burubukai! N bara wo yen. Fen ti bɔ a la, fen ti sa a kuma. Ni i ya a yen, Alla ye kɛ mala, a ya wo ma alako mɔgɛ ni kilan a la ka a gbiliya.

¹⁵Ko ti ma tun min nyɔgɔn ma ma wɛ. Koe minnu bi ma-tinɛ kaka, wo bɛɛ nyɔgɔn ara ma nun, ado Alla ye a mala, wo ko kelen penu ti to mala tun tun.

¹⁶N sigira ka duninya lakɔrɔsi. N ya a yen ko a fisa, telenbagayɛ ni taran kan min, yaga, telenbɛlitayɛ ye nyɔ le!

¹⁷N ya n miri n nyɛrɛ ma ko Alla si telenbɛlɛnu anubɛ telenbagɛnu kiti bawo koe bɛɛ ani a wati le.

¹⁸Woletɔ n ya a yen ko Alla ye ma rasuman tinɛ le ka a yira ma la ko male hadama-dannu niyi ma tenbi sogenutɛ la.

¹⁹Kɛ bɛɛ rɔ, ko kelen pe le ma dama yarɔ. Wo le sayɛ la. Mɔgɔni-fin wo, sogo wo, bɛɛ ye fagala le. Ni-kelen de ma dama rɔ. Hadama-dan ma tenbi soge la fenfen tɔ. Kɛ bɛɛ ragbɛlɛ.

²⁰Bɛɛ ye sɛgila le bɔnkɛ le tɔ bawo bɛɛ bɔra nyɔ le tɔ.

²¹Yon si ke a lɔnna ko hadama-dan-niyi ye yɛlɛla san le ma? Yon si ke a lɔnna ko soge-niyi ye yigila dugi kɔrɔ le?

²²N ya wo damasi lakɔrɔsi. N ya min yen a rɔ, a fisa, mɔgɛ ni a nyɛrɛ ladiya a bolo-fannu tɔ bawo duninya damɛ le wo la. Koe min bi nala mala male la lakira, mɔgɔ-wo-mɔgɔ ti ke wo rakaranna i ye.