Read Kuranko Makawandili Kumɛnu 8 Bible Online

Makawandili Kumɛnu 8 - Kuranko bible

Makawandili Kumɛnu 8

¹Hɛnkilimɛ si lɔn kama? Yon si ko-kɔrɛ lɔn? Hɛnkilimɛ si lɔn a yakɔrɛ ma. Hɛnkilimayɛ si mɔgɔ-yakɔrɛ yɛlɛma ka a ma waran!

²Mansɛta kumɛnu to a gbɛ rɔ ka a tɛgɛ wo ara lanyiri min kiri ale mansɛ ye Alla yala.

³I sɔnɛ kana to mansɛ fɛ wati-yan kɔrɔ. Wo kana murutiya a ma fanan bawo ko-wo-ko diyara a ye, a si wo sigi mɔgɛnu ma.

⁴Ale letan ala sɛnbɛ la. Yon si a nyinika?

⁵Fananta i ye mansɛla tɔnnu tola a gbɛ rɔ, i ti nanparan sɔrɔn a bolo. Hɛnkilimɛ le ya a lɔn a si mansɛla tɔnnu to a gbɛ rɔ nya min anubɛ a wati ma.

⁶Hali a gbɛlɛ mɔgɛ kuma, koe-bɛɛ-ladan-nya ye nyɔ anubɛ a wati.

⁷Koe min bi nala mala mɔgɛ la yarɔ ma, mɔgɔ ti ke a lɔnna, ado mɔgɔ sa nyɔ min si ke wo fɔla a ye.

⁸Ni mɔgɛ si ke tɔn sigila fɔnyɔ ma, nba mani, mɔgɛ si ke sayɛ masɛgila a nyɛrɛ la. Kɛlɛ do le wo la mɔgɔ ti ke a burila min kɔrɔ, ado wunduyogoya sa nyɔ min si mɔgɔ-kunyɛ bɔ sayɛ wo rɔ.

⁹N ya n hɛnkili lamiri duninya-koenu kɔrɛ-lɔn-koe ma wati min, n ya ko kelen de yen. Wo le, sɛnbɛ ye mɔgɛ do bolo, a kɔrɔ-mɔgɛnu tɔrɔnɛ a bolo.

¹⁰Karagbɛlɛ wa faga, anu ni ta a togon. Mɔgɛnu tenbi bɔla kan-tina-sɛnimɛ rɔ, anu bi a tɔgɔ nyinyala soe wo burɔ a ya karagbɛlɛyɛ kɛ kan min. Wo fanan tagbɛlɛ.

¹¹Mɔgɛnu bi tola karagbɛlɛyɛ kɛla bawo anu sa anuna tɔrɔyɛ sɔrɔnna yona.

¹²Hali mɔgɛ ya ko-yogomɛ kɛ iko kɛmɛ, a ni to a niyi la kɔnɔ n lanɛ a la ko min bi Alla gbiliyala, wo wara-koe si tenbi karagbɛlɛtɛ la.

¹³Karagbɛlɛnu sa Alla gbiliyala min kɛ, anu bara-koe ti ta a kilɛ fɛ. Anu siyi-tele ti yanya iko ninɛ.

¹⁴Ko kelen de ye duninya rɔ min tagbɛlɛ. A bɛnta, karagbɛlɛ ni tɔrɔyɛ min sɔrɔn, wo ye sigila telenbagɛ ma. A bɛnta, telenbagɛ ni min sɔrɔn, karagbɛlɛ ye wo nyɔgɔn sɔrɔnna. N ma koe kɛnu kɔrɔ yen a la. A ragbɛlɛ.

¹⁵Woletɔ a ma to fenfen ma duninya kɛ rɔ fɔ ladiyɛtɛ. Fenfen sa fen-dɔn anubɛ minni anubɛ sewɛ kɔma. Hali i ma fen-bo-fen sɔrɔn i siyi-tele kɔrɔ Alla ye min dila i ma kɔnɔ i tenbi wɔlila, ni i ye kɛ kun na, i ye i diya.

¹⁶N ya n taya tuma-wo-tuma ka hɛnkili sɔrɔn duninya lakɔrɔsi tinɛ, hali n tora n mirila a ma su-ni-tele,

¹⁷n ti a lɔn Alla ye min kun na. Hali mɔgɛ ya a raya nya-wo-nya, a ti ban Alla wara-koe nya-yenna. Hali hɛnkilimɛ donu si a fɔ ko anu ya Alla wara-koe lɔn kɔnɔ anu foni.