Read Kuranko Keninteya-Siginu 4 Bible Online

Keninteya-Siginu 4 - Kuranko bible

Keninteya-Siginu 4

¹N diyana-musi, i kin dɔgɔma-ma-de! I yɛ kɛlɛlɛ i yakɔrɔ-masansan-kurɛ kɔma. I kun-sigi mɔlɔlɛ iko baa minnu yigimatoe ye bɔla Kaliyadi kɔnkɛnu tɔ.

²I nyin gbɛnɛ wass iko sagɛ minnu gbɛnɛ perr, wonu ku-san tenbi. A rakɛnyanɛ i dɛ rɔ bɛrɛtɛ, kelen bɛrɛn bɔni sa a la.

³I da-gbole wulennɛ beretete! I tenbi kumala, i da-gbole mafɛlɛn di. I gban manunkunɛ iko wura-tɛran-burɛ i yakɔrɔ-masansan-kurɛ kɔma.

⁴I kan kin, ado a makirinɛ kan-na-fan la iko Mansa Dawudata nyamanɛ kumafɛlɛn-bɛndɛ-layan-bɛ makirinɛ kɛlɛ-kurugbaya nɛgɛ-lufɛ waga kelen min na.

⁵I kinyɛ monɛ iko minan-den fɛrɛn filɛ tenbi a de-nyinina baga-ferenu tɔ.

⁶N ti n bɔ fen-suma-diyamɛ-kɔnkɛ kɛnu tɔ ha banda-ka-dɛ ma, sɔgɔma kimɛ-na-wati, kɔni.

⁷N kɔntɔ-mɔgɛ, i kin dɔgɔma-ma-de, ado fɛɛ-wo-fɛɛ sa i la mumɛ!

⁸N sisirɔ-musi, na, ma ni bɔ Lɛbanan kɔnkɛnu kɔrɔ yan. Ma ni bɔ Amana anubɛ Hɛrɔman[1] kɔnkɛnu kɔrɔ yarɛnu anubɛ kulinu bi kan min.

⁹N kɔntɔ-nyaganɛ, i ye i yɛ makerila n mafɛlɛn tinɛ nya min hali n ba ila kan-na-fen kelan yen i kan la n yisi si murumuru n burɔ ila ko la.

¹⁰N takeri-gbasu, i di n ye. Ila keninteyɛ di n ye baan-diyamɛ ko. Ila tulu-suma-diyamɛ tenbinɛ tuli bɛɛ la.

¹¹N yarabiyi, i da-gbole tuninyanɛ iko liyi. I nagan-kɔrɛ manɛ iko nono-kɛndɛ. Ila fɛrɛya-bɔɛnu suma-diyamɛ ye bɔla iko tulu-suma-diyamɛ min bi bɔla Lɛbanan kɔlɔma rɔ.

¹²I manɛ iko sansan mininɛ nakɔɛ min ma nna ko la, ado n halala-tenke le ile la nyɔ.

¹³Fan bɛɛ ye nanfala a kin na nyɔ. Ile, nna nakɔɛ, i lafanɛ kɔlɔma anubɛ baga-fere suma-diyamɛnu na. Fen-suma-diyamɛ bɛɛ daganɛ nyɔ le.

¹⁴I yala-yen ara n hɛnɛ feu! Ile nna nakɔɛ, i gbɔɛ dɔn di. Nyɔ-sumɛ ara a diya don n tɔ.

¹⁵Ile mani de iko tenke minnu bi bɔla Lɛbanan kɔnkɛnu tɔ. I wara n hɛnɛ iko kɔnkɔrɔ-yi wonu si mɔgɔ-kan lakimɛ nya min.

¹⁶Fɔnyɔ, bɔ nna nako-suma-diyamɛ kɛ rɔ. Anu sumɛ ra ni tii pu! Nna kei ni na ala nakɔɛ rɔ. A ni ala kɔn-gbɔ-diyamɛ diya bɔ.