Read Kuranko Aiseya 1 Bible Online

Aiseya 1 - Kuranko bible

Aiseya 1

¹ Alla ya sarakanɛ minnu don Emɔsila den Aiseya bolo ka a tɛgɛ Yuda nyamanɛ anubɛ Yerusalɛm soela ko ma, wonu denu sɛbɛnɛ buku kɛ rɔ. Kɛnu fɔra Mansa Yusaya anubɛ Mansa Yotam anubɛ Mansa Ehasi anubɛ Mansa Hɛsakayanuta wati le tɔ, anu bi Yuda nyamanɛ kun na wati min.

²Dugu-kole anubɛ san-kolo-Mari ye nala min fɔla wo ye, a ko wo ni wo tole masɔ wo la. A ko a ara ala dan minnu nabɔ a rɔ, wonu bara murutiya a ma.

³Ninkinu ya anu tigi lɔn, sofɛlɛ fanan ya anu de-nyininɛ lɔn kɔnɔ a ko wonu tenbira wole Isirɛla mɔgɛ kɛnu na. A ko wole, ata mɔgɛnu ma wo tigi lɔn.

⁴Wole Isirɛla mɔgɛnu, hakɛ-tigi anubɛ ko-yogoma-kɛlɛnu le wole la. Gbalo ye wo kuma. Wola hakɛ ye tala wo lasɛgila wo kɔma. Wo ara wo ban Mari la, Isirɛlata Alla-sɛnimɛ, kɔni. Wo ara wo kan-kɔ sɔ a la.

⁵Nfenna wo wakilanɛ murutiya-koe ma? Ha ka, wo ye tɔrɔyɛ nyinina wo nyɛrɛ kan ma? Ile Isirɛla kunyɛ matanban-tanbannɛ le tɛrr! I hɛnkili ara pirinkan.

⁶Ka a bi i kunyɛ ma ha ka yigi i kian ma, kɛndɛya-tina-wo-tina sa i rɔ. I fɛrɛ magboro-gboronɛ, ado tɛlɛ anubɛ da gbansan le ye i ma. Ila tɛlɛnu kubɛlɛ, bɛsi sa anu na, ado anu makirini ma.

⁷Wole Isirɛla mɔgɛnu, wola nyamanɛ kasaranɛ. Wola soenu bara mintan gburr! Sibolo-gbɛrɛnu bi wola sɛnita-fannu dɔnna wo yala ka wo kasaranɛ to.

⁸Yerusalɛm kelen pe ara to sɔni iko soe min bi kurɔn rɔ a yogenu bolo. A latankabɛlɛ iko bɛndɛ min sɔnɛ sɛnɛ tɛma.

⁹ Ni Mari Sɛnbɛ-Bɛɛ-Tigi ma mɔgɛ donu to anu kɛndɛ la nun, fɔ Yerusalɛm soe wa kasara nun pɔ! A ni ma iko Sɔdɔm anubɛ Kɔmɔra soenu mara nya min nun.

¹⁰Ile Yerusalɛm soe, ila kun-tiginu anubɛ ila mɔgɛnu mani de iko Sɔdɔm anubɛ Kɔmɔratɛnu bi nya min nun. Mari ye min fɔla wo ye, wo ni wo tole masɔ wo la. Mata Allata karan kɛ ye nala min fɔla ma ye, wo ni wo hɛnkili to wo ko.

¹¹ A ko wo ye saraka-siyamɛ minnu dila a ma kɛ, wo miri ye a ma ko a ye nyinina wonu ma le, wa? Wo ye saga-sarakɛ minnu bɔla wo, wo ye kolo-fen-hakikɛ minnu kɛɛn bɔla sarakayɛ la wo, wonu sɔgɛ la ara bɔ a la lass! A ko a ara bandan wola kolo-fen-yelenu kɔrɔ, a tura wo, a saga wo, anubɛ a baa.

¹²A ko wo tenbi nala a bato tinɛ, yon ya a fɔ wo ye ko fɔ wo wa na saraka-sufa wonubɛ wo hakɛnu na wo bolo? Yon ya wo sɔ tagama-tagamana a Bato-Bɔn kata burɔ?

¹³Wola kɔ-fen di-bole kɛ ti ko-wo-ko nyinya wo ma. Wo ye isɛnti min mintanna, a ko wo sumɛ ma di a ye tun hali! Wola Karɛ-Kura-Ladiyɛnu wo, wola Sulen-Tele-Ladiyɛnu wo, anubɛ wola ladiya-gbɛrɛkɛnu wo, a ko wo bɛɛ sɔgɛ la ara bɔ a la bawo wo ara wo hakɛ basan wonu na.

¹⁴Wola Karɛ-Kurɛ-Ladiyɛ anubɛ wola ladiya-gbɛrɛkɛnu, a ko wonu ma di a ye tun mumɛ, bawo a ara bandan wonu na.

¹⁵Wo tenbi wo bolenu sigila a tɛrɛna madiyali-kɛ-tinɛ tumɛ min, Mari ko a ti wo mafɛlɛn defan! A ti a wɔlɔ matɔlɔ wo la bawo mɔgɔ-yele ye wo bole ma.

¹⁶A ko wo ni wo nyɛrɛ ku ka wo sɛninya. A ya wo yen karagbɛlɛyɛ minnu kɛla, a ko wo ni wo bole bɔ wonu tɔ. Wo fara ko-yogoma-kɛ la

¹⁷ka wo degen ko-telenni-kɛ ma. Mɔgɛnu bira anu bira-nya la. Wo ni mɔgɔ-ragbɛrɛnnɛnu dɛnbɛ. Wo ni kelennɛnuna yoe di anu ma ka kɛɛ-musinu kumafunfan.

¹⁸Mari ko, “Wole Isirɛla mɔgɛnu, wo na, ma ni kumɛ kɛ ban.” Hali wo ara wo kɔsɔ hakɛ la, a ko a si wo ku ka wo gbɛ feu! Hali wo ara wo nyɛrɛ mafin hakɛ la, a ko a si wo gbɛ iko kɔlɔli-munke.

¹⁹A ko ni wo ya ala tɔnnu bira dɔrɔn, a si a ma, wo ni to wola sɛnita-fannu dɔnna wo fanbolo.

²⁰Kɔnɔ ni wo bilara a la, fɔ wo kunyɛ wa to kɛlɛ rɔ serr! Ale Mari kan le kɛ la.

²¹Yerusalɛm soe min telennɛ nun fɔlɔ, wo ara wo nyɛrɛ ma iko yɛlan. Fɔlɔ nun, a lafanɛ wole mɔgɔ-telennɛ gbansan denu na kɔnɔ kaka, wole mɔgɔ-fagalɛnu denu bi a rɔ.

²²Fɔlɔ nun, Yerusalɛm mani de iko wodi-gbɛ kɔnɔ a manɛ fufafuyi la kaka. Fɔlɔ nun, wo mani de iko baan-kɛndɛ kɔnɔ kaka wo ara ma iko yi-gbansan!

²³Mɔgɔ-murutiyanɛ le wola mɔgɔ-banu na anubɛ kankannu diyana-mɔgɛnu. Tuma-wo-tuma, wo ye dogonta-fannu birala. Kelennɛnu ti yo-wo-yo sɔrɔn anuna kiti tɛgɛ tinɛnu tɔ. Wola kun-tiginu ti anu tole masɔ kɛɛ-musinuna yasere-masa-kan la fanan.

²⁴Woletɔ Isirɛlata Mari Alla Sɛnbɛ-Bɛɛ-Tigi ye nala min fɔla, wo ni wo tole masɔ wo la. A ko a si a tayili sara wo la, wole, a yogenu, kɔni. A ko wo ti nanparan-wo-nanparan di a ma tun!

²⁵A ko fɔ a wa maga wo la. A ko a si wo lalee iko mɔgɛ wa sɛnɛ sa tɛ rɔ, a ye wo boe bɔla a kɛndɛ yala nya min.

²⁶A ko a si mɔgɔ-banu anubɛ hɛnkili-kɔlɛnu di wo ma iko fɔlɔ. Wo kɔma, bɛɛ si Yerusalɛm lɔn telenbaga-soe anubɛ lanaya-soe la.

²⁷Bawo Mari telennɛ, a si Yerusalɛm kisi anubɛ wole minnu bara wo kan-kɔ sɔ wo hakɛ la.

²⁸Kɔnɔ mɔgɔ-wo-mɔgɔ wa hakɛ kɛ ka murutiya a ma, a ko a si wo tigi bunden. Min bɛɛ bannɛ a la, a si wo bɛɛ faga.

²⁹Wole makinikininɛ si wo kan-kɔ sɔ wo hakɛ la bawo wo ara kɔlɔmanu kɔ nun ka nakɔɛnu nadan bɛsɛnu ye.

³⁰Wo ye gbalala le iko yi sa kɔlɔma min kɔrɔ. Wo wɔnwɔlinyɔ si to iko nakɔɛ min yi sa kɛla.

³¹Wola kun-tigi-makawanɛnu si ma sɔgɔ-gbalɛ la. Anu kɛ-nya si ma iko ta-kundi. Anu ba bira anu nyɔgɔn na, tɛ si wuli anu tɔ, ado anuna dufenna ti taran.