Read Kuranko Aiseya 13 Bible Online

Aiseya 13 - Kuranko bible

Aiseya 13

¹ Alla ya sarakanɛ don nde, Emɔsila den Aiseya bolo. Sarakanɛ wo tɛgɛnɛ Babilɔn kɛnu denu wara-koe ma.

²Wo ni kɛlɛ-kura-falafalɛ layɛlɛ san ma kɔnkɔ-manunkunɛ kuma. Wo ni seren-seren wola kɛlɛ-dannu ye. Wo ni wo bole keri anu ye alako anu ni ta bui mɔgɔ-wasinɛnu ma Babilɔn soe burɔ.

³Mari ara ala kɛlɛ-kɛla-wɛnu yabɔ ka ta kɛlɛ-sɛnimɛ kɛ alako a diminyanɛ minnu ma, a ni wonu tɔrɔ.

⁴Wo ni wo tole masɔ sɔnkɔ-sɔnkɔ-kan la kɔnkɛnu kuma, ado nyama-bɛrɛ-sɔnkɔ-kan le wo la. Nyamani-siyaman mɔgɛnu sɔnkɔ-kan le wo la. Kɛlɛ-dan bɛɛta Mari ye ala kɛlɛ-dannu mabɛnna kɛlɛ-kɛ-koe la.

⁵Anu bi bɔla nyamani-yan le tɔ pon! Mari si na nyamanɛ wo fi-koro-tiyi-kɛ ka a daga-koro-tiyi-kɛ ata fondo-bɔɛ la.

⁶ Wo ni kurun dumɛ bolo. Marita lɔgɔ-latɛgɛnɛ ara gbɛrɛn. Mari Sɛnbɛ-Bɛɛ-Tigi si kasarɛ lana tele wo ma.

⁷Mɔgɛ bɛɛ bolo dunnɛ si to a la lɔsɔrɛ! Mɔgɛ bɛɛ yigi si tɛgɛ gbat!

⁸Bɛɛ kun ma si kɔ. Anu si taran dumɛ rɔ iko musu-den-sɔrɔnmatoe. A bɛɛ yɛ si wuya-a-rɔ kilan bolo. Anu ti ke anu kunyɛ kɔrɔbila yisi-tinyɛ bolo.

⁹Marita lɔgɔ-latɛgɛnɛ ara gbɛrɛn. Wo wati si a taran, Mari yakɔrɛ sisinɛ dɔgɔma-ma-de! Duninya mumɛ bɛɛ ra si kolonya filili! Hakɛ-tigi bɛɛ si halaki.

¹⁰ Tɔn si sigi lolenuna malan la. Tele si fin banda-ka-dɛ ma. Karɛ si gbɛ.

¹¹Mari ya a fɔ ko a si duninya mumɛ kasara ka wunduyogenu tɔrɔ anu hakɛla ko la. A ko min bɛɛ wasinɛ, a si wonu famayigi. A ko karagbɛlɛ bɛɛ si tɔrɔ tɛrr!

¹²A toe minnu bi tola, wonu yen-koe si gbɛlɛya iko sɛnɛ ka bɔ Ɔfiri nyamanɛ rɔ.

¹³A ko ale Mari Sɛnbɛ-Bɛɛ-Tigi wa diminya lunyɛ min, san-kole ra si maga. Dugi si bɔ a gbɛ rɔ.

¹⁴Wo wati rɔ, sundan minnu siginɛ Babilɔn, wonu burumatoe si sɛgi anu barɛnu tɔ. Anu ta si nyɛnsɛn iko woyan wa donso-keminɛ yen. Anu si ma iko saga-fɛ-birala sa sagɛ minnu kuma.

¹⁵Anu ba min bira, anu si wo rasɔgɔsɔgɔ.

¹⁶Mari ko anu si to anuna dannu tapɔsikɛnna anu ya la. Anu si anu wasakara maka anuna bɔnnu na. Anu si digin anuna musinu ma anu ya la.

¹⁷Mari ko a ye Midi kɛnu nakɛla Babilɔn kɛnu ma. Anuna sɛnɛ anubɛ anuna wodi-gbɛ miriya fenfen sa anu yoge wonu na

¹⁸fɔ ka anu denu wara-koe ka-a-la kalabɛn la. Dennɛnuna hina sa donna anu tɔ mumɛ!

¹⁹ Hali Babilɔn kɛ kin so-siyaman ko, a mɔgɛnu wasinɛ wola ko la, Mari ko a si Babilɔn tii mɛmɛ, iko a ya Sɔdɔm anubɛ Kɔmɔra tii nya min.

²⁰Nyɔ si ma tonbɔn la. Hali Arabu minnu bi yilan-yilanna, anu ti anu daga makɛ nyɔ. Hali saga-fɛ-biralɛnu ti ta anuna sagɛnu na nyɔ.

²¹ Mɔgɔ ti fenfen yen nyɔ rɔ fɔ selekona anubɛ gbingbinnyagan anubɛ wularɔ-sogenu. Firala-baanu si to gberenya bɔla bon-gba-kɔrɛ wonu tɔ.

²²Mɔgɔ ti fenfen namɔɛn anuna bon-nayan-bɛnu tɛma fɔ sulukinu di-kan. Babilɔntɛ ye nala banna kɛ la feu! A ara to se, ata wati ni ban.