Read Kuranko Aiseya 14 Bible Online

Aiseya 14 - Kuranko bible

Aiseya 14

¹Mari si kinikini Isirɛla mɔgɛnu ma tun ka anu ma atɛ la. A si a ma, anu ni sigi anu halala-nyamanɛ rɔ tun baff! Sibolo-gbɛrɛnu si sigi anu tɛma.

²Mɔgɔ-siyaman si Isirɛla mɔgɛnu dɛnbɛ alako Mari ya anu barɛ min di anu ma nun, anu ni sɛgi nyɔ tun. Mɔgɔ-sibolo-siyaman si taran Isirɛla mɔgɛnu bolo yɔɔnyɛ la. Minnu bi Isirɛla mɔgɛnu birala kɔrɔma la nun, anu denu fanan si wonu bira. Minnu bara Isirɛla mɔgɛnu niyi ragbɛrɛn anu ma nun, Isirɛla mɔgɛnu fanan si wonu mara.

³Mari si Isirɛla mɔgɛnu bɔ dumɛ anubɛ tɔrɛ rɔ ka lafɛrɛ di anu ma. Anu bi anu fɔrɔsɛla wɔli-gbɛlɛmɛ minnu ma nun, a si anu kunyɛ bɔ wo kɔrɔ.

⁴Mari wa wo ma tumɛ min, anu si Babilɔn mansɛ mayɛlɛn ko, “Mansa-karagbɛlɛ ara faga. A ti mɔgɔ-wo-mɔgɔ niyi ragbɛrɛn a ma tun!

⁵Kun-tigi-wunduyogenu bara mɔgɛ minnu tɔrɔ, Mari si ale kun-tigi wonuna fanka-dɛ makeri. Sibole minnu bi Babilɔn mansɛ fanka kɔrɔ nun, a tora wonu tɔrɔla wati wo rɔ.

⁷Kɔnɔ tɔ-a-la, duninya mumɛ si taran a diya yisi-kimɛ bolo. Bɛɛ si sigi sa sewɛla ko la.

⁸Hali Lɛbanan kɔlɔma-hakikɛnu, wonu si sewa mansɛ kɛ faga-koe la bawo ni mansɛ ara so-sɛgi-kɛ, mɔgɔ-wo-mɔgɔ sa nyɔ tun minnu si ale kɔlɔmanu tɛgɛ.

⁹“Lakira ara fɔlɔla a bole sala Babilɔn mansɛ kɛ bolo tɔ. Mɔgɛ minnu sɛnbɛ kolo duninya rɔ nun, wonu yiyɛ ye ale mansɛ labɛnna. A mansɛnu yiyɛ si sɔ anuna mansaya-waganɛ rɔ.

¹⁰Anu bi anu kan nabɔla a ma ko a rafaganɛ iko anu denu. Anu ko fen kelen de anu dama la.

¹¹Fɔlɔ nun, anu bi ale Babilɔn mansɛ gbiliyala bɔlon-kan la kɔnɔ a ye lakira le gbɛ! A sa-fan manɛ tunbinu denu na. Ala burun-kurɛ ye tɔnɔkɛnu denu na.

¹² “Ile Babilɔn mansɛ, ile min manɛ nun iko banda-ka-da-lole, i wara bɔ san-kole ma ka bui dugi ma. Fɔlɔ nun, i ya sibolenu nɔ kɔnɔ kaka, i wara fili dugi ma gbɛ!

¹³I wara ban a latɛgɛla nun ko fɔ i wa ta ila mansaya-waganɛ sigi lolenu kuma san-kole rɔ pon! I miri nun ko i si i sigi kantɔ-kɔnkɛ wo kuma pon ladɛn si kɛ kan min bɛsɛnu ye.

¹⁴I ko i si yɛlɛ san-kole kuma pon ka ma iko Alla Sɛnbɛ-Bɛɛ-Tigi.

¹⁵Kɔnɔ yaga, ile yigira fɔ dugi kuri-dan la lakira.

¹⁶“Furinu si anu yɛ wuya-a-rɔ. Anu si nyinikalɛ kɛ ko, ‘Kei kɛ le sa mɔgɛnu nabiri-barala nun ka anu takilan?

¹⁷Kei kelan kɛ le ma so-karantannu tii mɛmɛ, ka duninya rakolonya, wa? Kei kɛ le ma a ban mɔgɔ-biranɛnu boloka-koe ma?’

¹⁸“Mansa doinu sa-bole rabɛnnɛ kaburu-hakikɛnu tɔ

¹⁹kɔnɔ ile Babilɔn mansɛ ma sa kaburu tɔ fɔ anu ya i furi lakɛ-a-rɔ le alako a ni tuli. Anu ya a lakɛ-a-rɔ fole burɔ ka ila kɛlɛ-dannu furi lakɛ i kuma. Mɔgɛnu ya i furi ratɛntɛn anu kian kɔrɔ.

²⁰Anu ma i togon iko mansɛ doinu bara togon nya min bawo i ya ila nyamanɛ kasara ka ila nyamanita-mɔgɛnu faga. I sɔn ye ila denbayɛ bɛɛsi bolo ma. Wo fenfen ti to a niyi la.

²¹Kan natɛgɛ da ni bira kaka! Ni i ya a yen ile mansɛla dannu bi fagala, wo tɛgɛnɛ anu benbanu denu sɔn ma. Anu do-wo-do ti ma mansa la dugu-kole kuma tun. Anu ti soe datɛgɛ anu nyɛrɛ ma.”

²²Mari Sɛnbɛ-Bɛɛ-Tigi ye a fɔla ko a si Babilɔn nyamanɛ kɛlɛ ka a kasara pɔ! A ko a ti mɔgɔ-wo-mɔgɔ to a niyi la hali dennɛnu.

²³ A si nyɔ bɛɛ ma iko boro-sumabɔnɛ la. Nyɔ si ma gbingbin-nyagannu barɛ la. A ko a si sɛɛrɛ bi ka Babilɔn nyamanɛ firan dugu-kole kuma. Mari Sɛnbɛ-Bɛɛ-Tigi kan le kɛ la.

²⁴ Mari Sɛnbɛ-Bɛɛ-Tigi ara a keli ko a ara ban min miriya la fɔ wo wa ma le serr!

²⁵A ko a si Asiriyanu nunku ata kɔnkɛnu ma a tontɛ kɔrɔ Isirɛla nyamanɛ rɔ. A si ata mɔgɛnu bɔ kun-gbaran rɔ Asiriyanu bolo. Anu kunyɛ si bɔ dunu madunɛ kɔrɔ.

²⁶A ko miriya kɛ le a bolo duninyala ko la. A ara a kɔɛn kɔrɔbi sibole mumɛ tɔrɔ-koe la.

²⁷Ale Mari Sɛnbɛ-Bɛɛ-Tigi ara ban kɛ latɛgɛla. A ara a kɔɛn kɔrɔbi duninya mumɛ tɔrɔ-koe la, ado mɔgɔ-wo-mɔgɔ ti ke a lakalala wo ma.

²⁸ Mansa Ehasi ya so-sɛgi-kɛ san min na, Alla ya kilayɛ kɛ sɔ san wo le la.

²⁹ A ko, “Wole Filisitinu, hali wo gbesinɛ gbeleka-kundi min na, wo ra ara keri, wo kana ma wo sewa-kunya la. Ni duguma-fen-yogomɛ do fagara, do si bɔ a gbɛ rɔ min yogo ale ko. Mansa-kurɛ min bi sigila, wo marɛ si tenbi doi kɛtɛ la.

³⁰Nde, Marita mɔgɛ minnu bi bolo-kolonyɛ rɔ, n si wonu kumafunfan iko saga-fɛ-biralɛ si sagɛnu kumafunfan nya min. N si kɔnkɔ-fitinɛ lana Filisitinu ma, min ti anu do-wo-do to anu niyi la.

³¹“Wole Filisiti so-burɔ-mɔgɛnu, wo ni wo dɛ sa-a-rɔ wo dɛnbɛn-koe la. Wo kun ma ni kɔ. Kirindinu bi nala gbangban tugula ka bɔ bolo-maran wara la, ado kɛlɛ-dan minnu bi nala wonu na, yuto-wo-yuto sa wonu tɔ.”

³²Ma si Filisitinuna kilayɛ yabi kama? Ma si anu yabi ko Mari ara ban Yerusalɛm kian banbanna. Ata mɔgɔ-tɔrɔnɛ si sigi lafɛrɛ rɔ nyɔ.