Read Kuranko Aiseya 17 Bible Online

Aiseya 17 - Kuranko bible

Aiseya 17

¹ Mari ko Damasika soe si ma tonbɔn la,

²ado a ko Siriyanuna so-mɛsɛnu si to tonbonyɛ la tolon! A ko anu si ma ninki anubɛ sagɛnu de-nyini-tinɛnu na, ado anu gbenna fenfen ti taran.

³A ko Isirɛla mɔgɛ minnu bi so-latankanɛnu tɔ, wonu ti ke anu nyɛrɛ kumafunfanna tun. Damasika kɛnu ti to anu nyɛrɛ la tun. A ko Siriya-toe minnu tonɛ, wonu si to miliyɛ kɔrɔ iko Isirɛla mɔgɛnu. Mari Sɛnbɛ-Bɛɛ-Tigi kan le kɛ la.

⁴Mari ko wati ye nala, tɔn si sigi Isirɛla nyamanɛla makawɛ la. Anuna fen-tigiyɛ si a laban anu bolo bolo-kolonyɛ ma.

⁵Isirɛla nyamanɛ si ma iko nyɔ-sangban. A ra si kolonya iko mɔgɛnu tara dɔn-fannu torondo nya min Rɛfayim lɛɛ rɔ.

⁶Mɔgɔ-dande le ye tola a niyi la. Isirɛla si ma iko toro-kuri min gbɔɛ ara fɔlɔla banna a la fɔ a gbɔ sawɛ min bi a sore la. Isirɛlata Mari Alla kan le kɛ la.

⁷Ni kɛ-watinu bara ke tumɛ min, mɔgɛnu burumatoe ye anu Dali-Mari magbenna, Isirɛlata Alla-sɛnimɛ, kɔni.

⁸Anu ya saraka-mintan-tinɛ minnu nadan anu bole la, anu si tɛgɛ wonu tɔ kasikasi! Anuna bɛsi-musi min tɔgɛ Asɛra anubɛ wola isɛnti mintan tinɛnu, anu hayu ti taran wonu na tun!

⁹Wo wati wa ke, tara-hakikɛ mininɛ soe minnu ma nun, wo bɛɛ si ma tonbɔn la tɛrr, iko Hɛfanu anubɛ Amoranu ya anu buri Isirɛla kɛlɛ-dannu kɔrɔ nya min ka anuna soenu boloka.

¹⁰Wole Isirɛla mɔgɛnu, Alla min bi iko mɔgɛ si dogon farɛ min kɔma, a ye wo lakananna ka wo kumafunfan, wole ara nyina wo ko salon! Yanni wo ni sɛgi Alla ma, fɔ wo ye nako-nyimɛnu nadanna sibolo-gbɛrɛnuna bɛsɛnu ye.

¹¹Hali bagɛ[5] wonu gbusura yona ka anu fere-nyimɛ labɔ, fenfen ti ma-a-la nyɔ. Fɔ tɔrɔyɛ anubɛ duma-dandanbɛlɛ tolon!

¹²Sibolo-gbɛrɛ fanka-tiginu si tugun anu nyɔgɛnu na iko kɔgɔ-yi ye sɔnkɔla a rɔ nya min.

¹³Hali sibolenu bi tugula a rɔ Isirɛla kan ma wo nya, Alla wa anu makuma, anu si sɛgi anu kɔma iko fɔnyɔ wa gbangban kɔ, ni wo ma, iko tɔnkɔlɔn wa bin-gbalɛ fɔrɔn.

¹⁴Wurala-tumɛ wa ke, mɔgɛnu kumakɔnɛ si to kɔnɔ yanni bandɛ ni ka, wo si a taran, anu bara tunu iko munku-gbu kelan. Mɔgɔ-wo-mɔgɔ wa na ma kɛlɛ tinɛ, a ye mala wonu na wo nya na le.