Read Kuranko Aiseya 19 Bible Online

Aiseya 19 - Kuranko bible

Aiseya 19

¹ Kilayɛ le kɛ la Iyipiti kɛnuna ko la. Mari si a mayigi banda-finyɛ rɔ, a ni ta tiriya Iyipiti nyamanɛ rɔ. Bɛsɛ min bɛɛ ye nyɔ, wonu si yɛrɛyɛrɛn a kɔrɔ, ado nyɔ-mɔgɛnu yisi si tɛgɛ gbat!

²Mari ko a si na-kelen-nyɔgɛnu nakɛ anu nyɔgɔn ma ka sigi-nyɔgɔma-gbansan fanan nakɛ anu nyɔgɔn ma. A ko a si soenu natugu anu nyɔgɔn ma. Nyamanɛnu si anu nyɔgɔn kɛlɛ.

³Koe min bɛɛ rabɛnnɛ Iyipiti kɛnu bolo, a si wonu tinya anu ma pɔ! A si kumakɔɛ ladon anu tɛma. Anu si anuna bɛsɛnu madiya alako wonu ni anu dɛnbɛ. Anu si ta bolo-tafɛlɛnna-su bɛɛ wara alako wonu ni hɛnkili di anu ma.

⁴A ko a si Iyipiti kɛnu don mansa-karagbɛlɛ do bolo. Ale Mari Sɛnbɛ-Bɛɛ-Tigi ara ban kɛ fɔla.

⁵Nayɛli bɛ si to gbalala a worɔn la.

⁶A bolɔnnu ba wuli gbalala tumɛ min, wonu sumɛ si bɔ titi! Nyɔ-binyɛnu ma si fɔsɔkɔrɔya!

⁷Mɔgɛnu ya fui-fan min fui Nayɛli bɛ wo dafɛ nyɔ, wo si gbala ha fɔnyɔ ni ta a la. Wo ti yen tun!

⁸Minnu bara anu to yɛgɛ-birɛ ma Nayɛli bɛ rɔ nyɔ, wonu si kurun ka di. Anuna yalɛnu anubɛ anuna lunyɛnu ti ko-wo-ko nyinya anu ma tun.

⁹Minnu bi kurɛ ladanna bɛ wo gbamɛnu na, wonu yigi si tɛgɛ.

¹⁰A yese tɛntɛnna wo, a boloma-wɔli-kɛla wo, wonu dama yisi si tɛgɛ gbat!

¹¹Kun-takolɔn le Sowan so-burɔ mɔgɔ-banu na. Kun-takolonya-hɛnkili le ye Iyipiti mansɛla mɔgɔ-ba-hɛnkilimɛnu bolo. Anu bi a fɔɛ min kɛla Iyipiti mansɛ ye ko anu denu benba le fɔlɔ-mɔgɔ-ba-hɛnkilimɛnu na, yabatoya-kumɛ le wo la anu bolo.

¹²Ile Iyipiti mansɛ, i makawandila hɛnkilimɛnu bi mintɔ? Miriya min bi Mari Sɛnbɛ-Bɛɛ-Tigi la ka a bɛn Iyipiti ma, tumado anu denu si wo yira i la.

¹³Mɔgɔ-ba minnu bi Sowa soe burɔ, kun-takolɔn le wonu na. Minnu bi Mɛmfisi soe burɔ, wonu bara baya. Wonu bɛnta ka mɔgɛnu sɔ kila-latelennɛ rɔ kɔnɔ anu ma wo ma de fɔ ka mɔgɛnu bila kila-radunɛ fɛ.

¹⁴Mari ara anuna makawandili-kumɛ yabasan anu bolo. Ka a tɛgɛ wo ma, Iyipiti mɔgɛnu si ma iko gbɛɛtoe wa nama ala teseri rɔ.

¹⁵A fen-tigi wo, a bolo-kolɔn wo, a mɔgɔ-ba wo, a mɔgɔ-ni wo, wonu do-wo-do ti ke Iyipiti dɛnbɛna.

¹⁶Wati ye nala, Iyipiti kɛnu si anu famayigi iko musinu. Anu ba a yen ko Mari Sɛnbɛ-Bɛɛ-Tigi ara a kɔɛn kɔrɔbi anu kan ma, anu si yɛrɛyɛrɛn kilan bolo.

¹⁷Mari Sɛnbɛ-Bɛɛ-Tigi ara ban min natɛgɛla Iyipiti kɛnu kan ma, ni anu ya anu hɛnkili bila wo la, anu si kilan Yuda kɛnu na.

¹⁸Wo wati wa ke, anu si Hiburu-kan fɔ Iyipiti so-kunba loli tɔ, ado mɔgɛnu si anu gboro Mari Sɛnbɛ-Bɛɛ-Tigi tɔgɛ rɔ. Anu si a fɔ so loli wo kelen ma ko, “Teleta Soe.”[6]

¹⁹Wo wati wa na, Marita saraka-mintan-tinɛ do si taran Iyipiti nyamanɛ tɛma. Anu si kuru-lɛsɛnɛ dantɛgɛ Mari ma. Wo si taran anuna nyamani-dan la.

²⁰Fen filɛ wonu si ma Mari Sɛnbɛ-Bɛɛ-Tigita tamasere la Iyipiti nyamanɛ rɔ. Mɔgɛ wonu tenbi tɔrɔyɛ rɔ tumɛ min, anu ba Mari kele anu dɛnbɛn-koe la, a si kinikini anu ma ka anu nakanan.

²¹Mari si a nyɛrɛ yira Iyipiti mɔgɛnu na. Wo si a ma, anu ni a bato ka sarakɛ bɔ a ye ka kɔ-fannu di ale Mari ma. Anu si lanyirinu kiri a ye ka wonu natɔnbagaya.

²²Mari si Iyipiti kɛnu tɔrɔ. Wo kɔma, a ni anu dandan. Anu si anu kɔ-sɛgi a ma, wo kɔma, Mari si a wɔlɔ matɔlɔ anu na ka anu dandan.

²³Wo wati wa na, kila-gbonkan-bɛ si sa Iyipiti anubɛ Asiriyanu tɛma. Nyamani filɛ kɛnu si to ta-ni-sɛgi kɛla anu nyɔgɔn tɛma. Nyamani filɛ kɛnu si to batoli kɛla anu nyɔgɔn fɛ.

²⁴Wo wati wa ke, Iyipiti wo, Asiriya wo, Isirɛla wo, anu dama ra si kɛnya bɛrɛtɛ! Bɔnsɔn sawɛ kɛnu si ma duninya-dɛnbɛnɛ anubɛ duninya-kɔntɔ-diyalɛ la.

²⁵Mari Sɛnbɛ-Bɛɛ-Tigi si duwa anu ye ka a fɔ ko, “N bara duwa wole nta mɔgɛnu Iyipiti kɛnu ye, anubɛ Asiriya kɛnu n ya minnu nadan anubɛ Isirɛla mɔgɛnu, nta mɔgɔ-yabɔnɛnu, kɔni.”