Read Kuranko Aiseya 2 Bible Online

Aiseya 2 - Kuranko bible

Aiseya 2

¹Alla ya sarakanɛ min don nde, Emɔsila den Aiseya bolo ka a tɛgɛ Yuda nyamanɛ anubɛ Yerusalɛm soela ko ma, wo le kɛ la.

²“Wati si na, Marita Bon-Sɛnimɛ sɔnɛ kɔnkɛ min kuma kɛ la, wo si ma kɔnkɔ-layan-bɛ la ka tenbi kɔnkɛ bɛɛsi la mɔgɛ bɛɛ yala. Sibolo-gbɛrɛ bɛɛ si na ke nyɔ.

³Anu si na a fɔ ko, ‘Ma ni Marita kɔnkɛ yɛlɛ wona ka ta ke Marita Bon-Sɛnimɛ ma, Isirɛla mɔgɛnuta Alla, kɔni. Ma si tagama nya min, Mari si wo yira ma la iko a ye nyinina a ma nya min. Marita karan si bɔ Yerusalɛm. A si kuma ata mɔgɛnu ye nyɔ le.’

⁴ “Mari si kɛlɛ-nyɔgɔnyɛ ban duninya-sibolenu tɛma. Mari si yisi-kimɛ lana anu tɛma ha anu si anuna faannu yɛlɛma sɛnɛ-kɛ-dɛɛnu na. Anu si tanbɛnu yɛlɛma wɔrɔtɛnu na. Woletɔ duninya-mɔgɛnu ti anu tabɛn kɛlɛ-kɛ-koe ma anu nyɔgɔn kan ma. Anu ti anu nyɔgɔn kɛlɛ tun.”

⁵Nba, wole Yakoba kegeyɛnu, Mari ye wan-takanɛ min dila ma ma, ma ni tagama wo rɔ.

⁶E, Alla, i wara i ban ila mɔgɛnu na, Yakoba kegeyɛnu, kɔni. Nyamanɛ kɛ lafanɛ nya-nyini-kɛlɛnu na ka bɔ tele-bɔɛ wara la anubɛ Filisiti nyamanɛ rɔ. Ila mɔgɛnu bi sibolo-gbɛrɛnuna namunyɛ bila.

⁷Ila mɔgɛnuna nyamanɛ lafanɛ sɛnɛ anubɛ wodi-gbɛ la, ado fen-kolomɛnu ti ban anu bolo. Soeenubɛ kirindinu fanan ti ban anu bolo.

⁸Anuna nyamanɛ lafanɛ bɛsɛnu na, anu ya min nadan anu bole la, kɔni. Anu bi wonu kɔla.

⁹Hadama-dan damasi si miliya ka yarabi. Mari, i kana anu makoto mumɛ!

¹⁰ Wole Isirɛla mɔgɛnu, wo ni wo dogon farannu na kɔnkɛnu tɔ. Wo ni dugu-kɔrɔ-kilɛnu sa alako wo si bɔ Marita fondo-bɔɛ kɔrɔ nya min. Wo ni wo dogon ala sɛnbɛ anubɛ ala gbiliyɛ kɔrɔ.

¹¹Wati ye nala, hadama-dannuna wasinteyɛ si ban. Anuna nyɛrɛ-kɔrɔtɛ si kasara. A ye tola Marita gbiliyɛ kelen pe le ma.

¹²Wo tele wa ke, wasintenu wo, nyɛrɛ-kɔrɔtanɛnu wo, anubɛ sɛnbɛ-tiginu, Mari Sɛnbɛ-Bɛɛ-Tigi si wonu famayigi.

¹³A si Lɛbanan kɔlɔma-layan-bɛnu nabui anubɛ ka Basan nyamanɛ kɔlɔma-kunbɛnu bunden.

¹⁴Kɔnkɔ-layan-bɛnu anubɛ gburukulinu, a si wonu tii mɛmɛ, ka anu takɛnya.

¹⁵San-bɔnnu anubɛ so-latankanɛnuna tara-belebelenu, a si wonu nabui fugbu!

¹⁶Hali anuna kulun-belebele-hakikɛnu, a si wonu natunu yi kɔrɔ.

¹⁷A si hadama-dannuna wasinteyɛ ban ka anuna nyɛrɛ-kɔrɔta-fan wonu kasara. Anuna bɛsɛ wonu si tunu yen! Mari kelen pe si to gbiliyɛ rɔ wo wulun tele.

¹⁹Mari wa na dugu layɛrɛyɛrɛn tinɛ tumɛ min, mɔgɛnu si na anu dogon farannu na kɔnkɛnu tɔ. Anu bi dugu-kɔrɔ-kilɛnu sala alako anu ni bɔ Marita fondo-bɔɛ kɔrɔ. Anu bi anu dogonna ala sɛnbɛ anubɛ ala gbiliyɛ kɔrɔ.

²⁰Tele wo wa ke tumɛ min, anuna bɛsɛ minnu nadannɛ sɛnɛ anubɛ wodi-gbɛ la, mɔgɛnu si wonu nakɛ a rɔ. Anu si wonu to tula-gbɛnu anubɛ tosɛnu ye.

²¹Mari wa na dugu layɛrɛyɛrɛn tinɛ tumɛ min, mɔgɛnu si na anu dogon farannu na kɔnkɛnu tɔ. Anu bi dugu-kɔrɔ-kilɛnu sala alako anu ni bɔ Marita fondo-bɔɛ kɔrɔ. Anu sɛbɛ donnɛ ka anu dogon Marita sɛnbɛ anubɛ gbiliyɛ kɔrɔ.

²²Wo kana lanaya sa hadama-dan rɔ tun! Tɔnɔ-wo-tɔnɔ sa wo la.