Read Kuranko Aiseya 26 Bible Online

Aiseya 26 - Kuranko bible

Aiseya 26

¹Wati ye nala, mɔgɛnu si to bɛti kɛ bɔla Yuda nyamanɛ rɔ. Mala soe ragbɛlɛ. Alla nyɛrɛ-nyɛrɛ ye ala tarɛ kumafunfanna.

²Wo ni soe tarɛ-don-dɛ laka. I ni a ma, sibolo-telennɛ ni don, sibole minnuna mɔgɛnu bi ko-latelennɛ kɛla, kɔni.

³Mari biranɛ minnu bolo gben, ka a ma anu yigi la, a ye yisi-kima-bɛrɛbɛrɛ dila wonu ma.

⁴La Mari la tolon! A si to ma lakananna burubukai!

⁵Minnu wasinɛ, a si wonu makimɛ. Anu siginɛ so-latankanɛ minnu tɔ, a si wonu kasara. A si wola tara-layan-bɛ labui gbangban rɔ.

⁶Minnu tɔrɔnɛ, wonu si tenbi so-labuinɛ wo kuma ka ta tagamana a kuma dafi-dafi!

⁷Mari ya kilɛ rakɛnya ala mɔgɔ-nyimɛ ye! I ya a ma, anuna kilɛ latelenta.

⁸Ma ye i sako kɛla ka ma yigi sa ile rɔ. Ma ye nyinina fan min bɛɛsi ma, ile le wonu kun-bira-yili la ma ye.

⁹A la wa fin, i sɔgɛ si n tabɔ dɔgɔma-ma-de! Banda wa ka, a ni ma iko ma ni taran ma nyɔgɔn fɛ. Ni ile ya duninya-mɔgɛ bɛɛ kiti, anu si a lɔn telenbagayɛ ye nya min.

¹⁰Hali i ye ko-nyimɛ kɛla karagbɛlɛnu ye, anu ti anu degen ko-telenni-kɛ ma. Hali mɔgɔ-telennɛnu taranta nyamanɛ kɛ rɔ, anu bi karagbɛlɛyɛ kɛla. Anu ma ila kabana-koe lɔn fenfen na.

¹¹ Mari, i yogenu ma a lɔn mumɛ, ko i si anu tɔrɔ dɛɛ! Anu namiliya le serr, anu ni tɔrɔ. I ya tɔrɔ-dagɛ min namara anu ye, i ni wo rawuya anu kunyɛ ma. Ita mɔgɛnu di i ye nya min, i ni wo yira anu na.

¹²Mari, i wara ma lama-a-la. Ma ara fan bɛɛ sɔrɔn i baraka le tɔ.

¹³Mata Mari Alla, ma taranta sibolo-gbɛrɛnu kɔrɔ nun kɔnɔ hali wo, ma Mari kelen pe le ile la.

¹⁴Kɔnɔ ma ye minnu kɔrɔ nun, wonu bara faga. Wonu ti beli tun. Hali anu pulan ti bɔ bawo i wara ban anu kasarala nun. Mɔgɔ-wo-mɔgɔ miri sa anu ma tun.

¹⁵Mari, i wara ma makofu kosɛbɛ! I wara mala nyamanɛ da lasa belenna, ado wo ara a ma, i wara gbiliya-belebele sɔrɔn.

¹⁶Mari, i wara ita mɔgɛnu tɔrɔ nun, anu kɔndɔfilinɛ wati min, anu ya i matara wɛwɛ rɔ.

¹⁷Kɔnɔ Mari, i wara a ma, ma ara ma dɛ sa-a-rɔ iko musi bui wa a lamaga.

¹⁸Hali ma ye dumɛ wo rɔ, ma ma fenfen sɔrɔn nyɔ fɔ fɔnyɔ. Ma ma ke mala nyamani-kunyɛ bɔla gbaran rɔ. Fenfen ma ma munanfaga nyɔ.

¹⁹ Mala mɔgɛ minnu bara faga nun kɔrɔma la, wonu niyi si sɛgi anu tɔ tun. Anu niyi si bila anu bagbuyi rɔ. Minnu bɛɛ ye kinɔgɔla kaburu rɔ, wonu si kunden ka sewa-sigi sa. Iko duri ye a diya donna gbangban rɔ nya min, Mari fanan bi niyi lasɛgila mɔgɔ-fagani-kɔrɛnu tɔ wo nya na le.

²⁰E, nta mɔgɛnu, wo don wola bɔnnu na ka don-dɛ balan wo nyɛrɛ ma wati-kundu-ni kɔrɔ. Wo ni wo dogon sogbe, ha Allata fondo-bɔɛ ni ban.

²¹Mari ye nala bɔla ata kan-tina-sɛnimɛ rɔ san-kole rɔ. A ye nala mɔgɛnu tɔrɔla dugu-kole kuma anuta hakɛla ko la. Anu ya mɔgɛ min bɛɛsi faga dogɔn tɔ, wo bɛɛ si bɔ gbɛ ma wulɔn. Minnu bara faga nun, bɔnkɛ ti a sansan wonu ya ma tun mumɛ!