Read Kuranko Aiseya 28 Bible Online

Aiseya 28 - Kuranko bible

Aiseya 28

¹Isirɛla kantɔ-nyamanɛ ye nala kasarala. Anuna gbiliyɛ ye nala fɔsɔla iko kɔn-fere minnu bi anuna mɔgɔ-ba-gbɛɛtoenu kunyɛ rɔ. Hali sɛnti-suma-diyamɛ kɛnɛ anu kunyɛ rɔ, ado anu wasinɛ, anu malɔfɔkɔrɔyanɛ sanɛ gbɛɛ bolo.

²Mari ara ban sibole do yisi-kɔrɔ tugula anu kɛlɛ-koe la. Wonu si na anu magbenna iko fɔn-belebele-wɛ, ado wonu si nyamanɛ mumɛ makɔ iko gboron-gboronna-yi.

³Mɔgɔ-ba-gbɛɛtoe wonuna wasinteyɛ si taran anu yogenu denu kin kɔrɔ.

⁴Anuna gbiliyɛ si sama anu ma iko kɔn-gbɔ-mɔ-fɔlɔtɛ ye banna a la nya min tiriya! Min tenbi mɔla anu bi wo bɔla a la.

⁵Wati ye nala, Mari Sɛnbɛ-Bɛɛ-Tigi nyɛrɛ-nyɛrɛ si ma iko mansaya-fulɛ min nadannɛ kɔn-fere la. Ala mɔgɔ-dande minnu bi tola, ale si to wonu ye.

⁶A si kiti-tɛgɛ-hɛnkili di kiti-tɛgɛlɛnu ma. Minnu bi soe tarɛ don-dɛnu kandanna, a si wonu yisi kerinteya alako anu yogenu kana na don.

⁷A nɛbi wo, a saraka-masɔla wo, wo bɛɛ ye tonko-tankanna gbɛɛ-minyɛ bolo. Anu bara baan-su bɛɛ min ha anu bi tola anu nyɛrɛ mabondanna. Alla ye ko-rayirɛ minnu nanala, anu ti ke wonu nya-yenna gbɛɛ bolo. Saraka-masɔlɛnu ti ke kiti tɛgɛla yalafinyɛ bolo.

⁸Anu siginɛ tebulu min na, wo yamatogonnɛ teseri bolo. Kan-tina-sɛninyani fenfen ma to!

⁹Anu bi gbunyala nde, Aiseyata kumɛ kɔrɔ. Anu bi a fɔla ko, “Kei kɛ miri ko a ye yon karan tinɛ? Mɔgɔ-wo-mɔgɔ sa nyinina kɛta kawandili ma. Ala kumɛ kɛ bɛnnɛ denni da-ka-san denu ma.

¹⁰Kei kɛ ye ma karanna doni-doninyɛ le ma ka to ma gba kelan raforongbanna.”

¹¹ Ni wo sa wo tole masɔla nde la, Alla si sundannu nana wo karan tinɛ kan-yabasannɛ la.

¹²Mari ye lafɛrɛ anubɛ ko-nyimɛ dila wo ma nun kɔnɔ wo ya wo ban wo la a bolo.

¹³Wo le ya a to, Mari nyɛrɛ si to wo raforongbanna doni-doninyɛ ma. Wo wati rɔ, min ba kin-fa-kelen bi, wo si tonko-tanka. Wonu si wo tanban ka ta wo la pon!

¹⁴Woletɔ wole mɔgɔ-ba-wasinte minnu bi Yerusalɛm kɛnu kun na, wo ni wo tole masɔ Mari kan la.

¹⁵Wo ko wobɛ sayɛ ara sarama-kan kiri, ko wobɛ lakira ara sarama-kan kiri. Wole miri ko kasarɛ wa na wo kunyɛ si bɔ a rɔ. Wo lanɛ foninyɛ anubɛ yanfanteyɛ le la ko wonu si anu kankan wole ya ma.

¹⁶ Kɔnɔ Mari ye min fɔla wo ye, wo ni wo tole masɔ wo la. A ko a ye nala bɔn min sɔla ata kɔnkɔ-sɛnimɛ kuma, a si bɔn wo kurukɛ fanka rɔ. A ko a ye kuru fɔlɔtɛ min sigila, a kuru-toe bɛɛ ye sigila sɛbɛna-kuru-tɔnɔnamɛ wo le kuma, ado min bɛɛ lanɛ kuru fɔlɔtɛ kɛ la, a ko wonu yigi ti tɛgɛ muk!

¹⁷A ko telenbagayɛ si ma bon kurukɛ tinɛ wo suman-fan la. Telan-nyɛrɛ si ma a dandan telen-fan la. Wo bole lakinɛ foninyɛ minnu ma, banda-belebele si yigi wo la pon! Wo lanɛ wola kanan-koe min na, gboron-gboronna-yi si ta wo makuru-kurunna.

¹⁸Wobɛ sayɛ ya sarama-kan min kiri wo nyɔgɔn tɛma, a ko a ara wo tinya pɔ! Wobɛ lakira ya sarama-kan min kiri, a ko a ya tɔn sigi wo la. Kasarɛ wa yigi wo kuma, a si wo ratɛntɛn dugu la.

¹⁹Sɔgɔma-wo-sɔgɔma, kasarɛ si to nala wo kuma. Su-ni-tele, wo ye kasarɛ kɔrɔ. Wo ya sarakani-kura wo sarakani-kura sɔrɔn Alla bolo, wonu si na kilan kumɛ do la.

²⁰Wo si ma iko hɛnkilimaya-kumɛ ye kei minna ko fɔla ko kei kɛ yan ala sa-fan ko, ado ala burun-kurɛ ti a mabɔ.

²¹ Mari ko a si kɛlɛ kɛ iko a ya kɛlɛ kɛ Pɛrasim kɔnkɛ ma Kibiyon lɛɛ rɔ nya min alako ata miriyɛ ni ma, hali hadama-den ma wo nya-yen. Hali ata wɔli-nya makawara nya-wo-nya, a si a ma tun!

²²Wo kana yɛlɛn nna makawandili-kumɛnu ma. Ni wo ya wo ma, wo si dunɛ lawara wo nyɛrɛ kuma. Nyamanɛ kɛ mumɛ kasara-koe Mari Sɛnbɛ-Bɛɛ-Tigi bolo, n bara wo lamɔɛn feu!

²³Wo ni wo tole masɔ nde, Aiseyala kumɛ la. Wo ni wo yɛ lana.

²⁴Sɛni-salɛ ti to dugu wɔrɔla wo nya ni a sugu-fui-sɔgɔ sa a la.

²⁵Ni a ara ban yagɛnu layɛlɛla, a si bɛnikɛ ki nyɔ. A si nyɔɛ ki kelen-kelenyɛ ma. A si fui-fan fui ala sɛnɛ rɔ ka manfan ki ala minɛ rɔ tala.

²⁶A kusan wɔlɛ kɛla bawo Alla le ya a karan wo la.

²⁷A si poritɛ anubɛ kɛnɛ tugu kɔlɔn rɔ. A si fui-fan gbesi kɔlɔma la ka tigɛ sii walan ma.

²⁸Ka to fui-fan gbesila ha a ra ni kerikeri, a ti wo ma. A kusan a tɛnna alako a ti tinya nya min.

²⁹Hɛnkili kɛ bɛɛ ye bɔla Mari Sɛnbɛ-Bɛɛ-Tigi le bolo. Ata miriya makawara. Hadama-den wo hadama-den ti ke ala kabana-koe lɔnna.