Read Kuranko Aiseya 30 Bible Online

Aiseya 30 - Kuranko bible

Aiseya 30

¹Mari ara a fɔ ko Yuda kun-tiginu si halaki bawo anu bara murutiya a ma. A ko anu bi koenu natɛgɛla anu nyɛrɛ ma, hali ale Mari ma sɔn minnu ma. Anu bi yisi-kima-kɛdi sɛbɛla anubɛ nyamani-gbɛrɛkɛnu tɛma, hali Mari ma sɔn minnu ma. Anu bi hakɛ sala anu nyɔgɔn kuma tala.

²A ko anu bi anu burila tala Iyipiti anu dɛnbɛn-koe rɔ, anu ma ale Mari fɔlɔn manyinika. Anu bara anu wara-koe bɛɛ to Iyipiti mansɛ ma alako ata kɛlɛ-dannu si anu natanka nya min.

³Kɔnɔ hali wo, a ko sɛnbɛ ti taran mansɛ wo bolo anu dɛnbɛn-koe rɔ, ado Iyipiti kɛnu bi anu kumafunfan minnu kɛla, a ko wo si a laban anu bolo kasarɛ ma.

⁴Hali Yuda nyamanɛ-yɛnu bara ban kela Sowan anubɛ Hanasi soenu burɔ Iyipiti nyamanɛ rɔ,

⁵a ko anu yisi si tinya bawo anu lara nyamanɛ wo le dɔrɔn na anu kisi-koe rɔ, ado a ko anu miri anu dɛnbɛn-koe ma nyamanɛ wo min bolo, wo si anu baya.

⁶Marita sarakanɛ le kɛ la sogenu bara-koe rɔ dugula wula-da-rakolɔn ma. A ko Yuda nyamani-yɛnu bi tagamana nyamanɛ min tɔ, masiba tinɛ le nyɔ la. Yarɛnu bi nyɔ. Duguma-fen-maralamɛnu bi nyɔ anubɛ ninkinanka-kanbannamɛnu. Nyamani-yɛnu bi fen-kolomɛ dunɛnu sala anuna sofɛlɛ anubɛ nyomɛnu kɔ tɛma ka ta anu kun madiya sibolo-gbɛrɛnu na anu dɛnbɛn-koe rɔ.

⁷Iyipiti kɛnu bi wo dɛnban min kɛla, fufafuyi le wo la. Woletɔ Mari ko a ya anu kele ko, “Ninkinanka-rakolɔn.”

⁸Bawo mɔgɛnu sɔn yogo, Alla ko nde, Aiseya ni anu sɔn-yogomɛ wonu sɛbɛ alako wo la ni mara habadan!

⁹Foninya-fɔɛ wo, murutiyɛ wo, ka anu ban Marita kuma-birɛ ma wo, anu bi wonu kun na le tolon!

¹⁰Anu bi a fɔla nɛbinu ma ko, “Wo ni sigi-a-la don!” Anu bi a fɔla fanan ko, “Ma tole diyana-koenu denu fɔ ma ye. Ma sa nyinina ko-telenni ma fɔ ko-nyima-rayirɛ dɔrɔn.

¹¹I bɔ ma lagbaranna. Ma sa nyinina ita Isirɛla mɔgɛnuta Alla-sɛnimɛ wara-koe ma.”

¹²Isirɛlata Alla-sɛnimɛ ye a fɔla ko wo ye wo banna ata kumɛnu na ka la karagbɛlɛyɛ anubɛ yanfanteyɛ dɔrɔn na.

¹³A ko a ara wo yiliki. A ko wo manɛ iko dandan min tafaranɛ. A ti mɛ lefan, wo ara bui.

¹⁴A ko wo ra si tii iko bɔnku-dagɛ. Wo ra si nyɛnsɛn gbesenkirin, hali min si ma ta-kɔ-fan la, wo ti taran. Hali min-kɛ-fan ti sɔrɔn a rɔ.

¹⁵Ma Tigi Mari, Isirɛlata Alla-sɛnimɛ, kɔni, wo ye a fɔla mɔgɛnu ye ko wo ni wo gbɛrɛn ale ma ka la a la. A ko wo kɔma, wo si sɛnbɛ sɔrɔn ka sigi lafɛrɛ rɔ. Kɔnɔ wo ma sɔn lala a la.

¹⁶Yanni wo ni wo ma, wo miriya bɛnnɛ ma fenfen ma fɔ ka wo sigi wola so-latirimɛnu na, ado wo ma foni. A ye nala a labanna wo le ma gben! Wola soee wonu ya anu buri nya-wo-nya, wo gbennɛnu bi anu burila wonu ko.

¹⁷Wo wa kɛlɛ-den kelen yen, wole mɔgɔ waga kelen si a buri wo kɔrɔ. Kɛlɛ-dan mɔgɔ loli si a ma, wo dama ni a kɔ a rɔ. Wole kɛlɛ-den fenfen ti to nyɔ fɔ wola gbaran min sɔnɛ kɔnkɛ kuma.

¹⁸Hali wo, Mari ye wo makɔnɔna alako a ni kinikini wo ma. A rabɛnnɛ ka kinikini wo ma bawo a ye ko-telenni-gbansan le mala. Mɔgɔ-sewanɛ le wo tigi la min lanɛ Mari la.

¹⁹Wole minnu siginɛ Yerusalɛm soe burɔ, wo ti di tun! Hinante le Mari la. Wo wa di a dala, a si wo yabi.

²⁰Mari si a lagbɛlɛya wo kuma kɔnɔ ale nyɛrɛ-nyɛrɛ si to wo karanna wo bɛɛ rɔ. Wo ti to a nyinɛ kun na.

²¹Min ba kilɛ madasa doni bɛrɛn, wo si a lamɔɛn a kɔma ko, “Ta kila-telennɛ kɛ fɛ. Doi wo ma de!”

²²Wola bɛsɛ minnu makirinɛ sɛnɛ anubɛ wodi-gbɛ la, wo si wonu nafili a rɔ iko fen-gbalɛ ka a fɔ ko, “Bɔ n yakɔrɔ.”

²³Kɔnɔ wo wa wola fui-fannu fui tumɛ wo rɔ, Mari si bandɛ lana alako anu ni nanfa kubukubu! Binyɛ si boroko-baraka wola kolo-fannu ye.

²⁴Sara-ninki anubɛ sofɛlɛ minnu bi wɔlila wo ye, wonuna dɔn-fan ti dasa, ado wo kin dɔn-fenyɛ la.

²⁵Wo wa wo yogenuna kan-tina-latankanɛ wonu bira ka wo yogenu faga, wo kɔma, tenkenu si tugu-a-rɔ kɔnkɔ-wɛnu tɔ belenna.

²⁶Wulɔn karɛ si gbɛ iko tele, ado wulɔn tele, waan si ma iko tele wɔrɔnfila tele ye nya min. Mari sɔnta ala mɔgɛ minnu tanban-koe ma, a si wonu dandan wulɔn-tele rɔ.

²⁷Mɔgɛnu si Marita gbiliyɛ anubɛ sɛnbɛ yen nala wula-yan la. Tɛ anubɛ ta-sisi si ata diminyɛ mayira. Ala kumɛnu si mɔgɛnu mintan iko tɛ.

²⁸A si fɔn-digidigi-wɛ lana a yarɔ iko yi-fɛ min bi tala fan bɛɛ la. A si nyamanɛnu tafiran ka tɔn sigi anuta miriya-yogomɛnu na.

²⁹Kɔnɔ wole Allata mɔgɛnu, wo si sewa-siginu sa iko wo duruta a mala wola ladiya-sɛnimɛnu kuma nya min. Wo si nyagalen iko wo tenbi tala Mari Bato-Bɔn la fuli kɛnɛ a rɔ. Isirɛlata farɛ le ale Mari la.

³⁰Mari si a ma, bɛɛ ni a nyɛrɛ kuman-kan-makilannɛ lamɔɛn. Bɛɛ si ata diminya-sɛnbɛ lɔn. A ta-mɛlɛn wo, a fɔn-digidigi-wa wo, a banda-kolo-wa wo, a gbɔrɔndɔ-yi wo, bɛɛ si wo yen a yɛ la.

³¹Asiriyanu ba Mari kan lamɔɛn ka ata diminya-sɛnbɛ lɔn, anu kun ma si kɔ kilan bolo.

³²Marita bosɛ tenbi anu tagbesila tumɛ min, yonbo-kan anubɛ bɔlon-kan ye tala anu nyɔgɔn fɛ. A si anu kɛlɛ ata kɛlɛ-kɛ-miran-sɛnbɛmɛnu na.

³³Mari ara ta-bondɔn ladan Asiriya mansɛ ye, bi ko ma, a si mintan kan min gburr! Nyɔ rayan, a kolo, a lafanɛ sɔgɛ la pim. Mari si tɛ lafɛ alako tɛ ni bira ale mansɛ la kiribo!