Read Kuranko Aiseya 32 Bible Online

Aiseya 32 - Kuranko bible

Aiseya 32

¹Wati do ye nala, mansɛ si taran min si mɔgɛnu namara telenbagayɛ rɔ. Ata mɔgɔ-banu si to ko-telennɛ mala.

²Anu kelen-kelennamɛ-bɛɛ si ma iko toge min si mɔgɛnu tanka bandɛ anubɛ fɔnyɔ ma. Wonu si ma iko yi-kimɛ dugu-ragbalanɛ rɔ. Anu si ma iko fara-gbilɔn-bɛ-ninɛ dugu-fafanɛ rɔ.

³Mɔgɛnu bi nyinina min ma, anuna kun-tigi wonu yɛ bɛnnɛ si to wonu ma. Anu tole rabalannɛ a lamɔɛn-koe la fanan.

⁴Anu si anu muin mɔgɛnu kɔrɔ ka hɛnkilimaya-koenu nadan. Anu si kusanya kumɛ manunkula.

⁵Wo wati rɔ, mɔgɔ-wo-mɔgɔ ti a miri ko gbiliya-koe le kuntanyɛ la, ni wo ma, ko kensunte telenta.

⁶Kun-takolɔn si kuntanya-kumɛ le fɔ ka a miri ko-yogomɛnu ma. A kɛ-nya anubɛ a darɔ-kan, wo bɛɛ manɛ Alla manyini-fan le la. Mɔgɛ wo ti dɔgɔma di kɔnkɔtoe ma. A ti yi di kan-nagbalatoe ma.

⁷Hɛnkili-tinyanɛ si kuntanya-kumɛnu fɔ ka karagbɛlɛya-koenu nadan. Anu si yanfɛ ladan alako anu si bolo-kolɔnnu tabunden foninyɛ la nya min. A si a ma, bolo-kolɔn ni foo a yoe la.

⁸Kɔnɔ gbiliya-mɔgɛ si ko-telennɛ ladan. A si a sɔ gben, ko-telennɛla ko la.

⁹Wole musi minnu bi wo diya, hɔnya sa wo kan na, wo ni wo tole masɔ n kan la.

¹⁰Kaka di wo la kɔnɔ kɛ-nyɔgɔn-tumɛ yari, wo kɔndɔfilinɛ bawo kɔn-gbo fenfen ti taran wo si min nadɛn wo nyɛrɛ ye.

¹¹Wo siginɛ ladiyɛ rɔ, hɔn sa wo la kɔnɔ wo ni yɛrɛyɛrɛn kumakɔɛ bolo. Wo ni wo gbu-makolonya ka wo buta kiri kasa-kurɛ la.

¹²Wo ni wo kɔgɔ ragbesi yisi-tinya bolo bawo dɔn-fen wo dɔn-fen sa wola wɔli-kɛ-tinɛnu tɔ.

¹³Fenfen sa nyɔnu tɔ wɔnɛ kɔma. Minnu sewanɛ nun anuna bɔnnu na wo, minnu sewanɛ anuna soenu tɔ nun wo, wo ni di wonuna ko la.

¹⁴Hali mansɛla bolon-rakolonyanɛ si to, ado wola so-karantan fanan si ma wo nya. Mɔgɛnu siginɛ bɔn minnu na anubɛ anuna kila-mafɛlɛn-bɔnnu si ma tonbɔn la. Bintɔ-sofɛlɛnu anubɛ kolo-fannu dɔrɔn si to anu de-nyinina nyɔ.

¹⁵Kɔnɔ Alla si ata Sɛnbɛ layigi ma ma tun. Dugu-gbɛlɛmɛ si yɛlɛma dugu-lamonɛ la. Ki-fannu si nɔrɔn dugu-lamonɛ rɔ.

¹⁶Telenbagayɛ anubɛ latelan si taran kan tinɛ bɛɛ rɔ.

¹⁷Yisi kimɛ anubɛ lafɛrɛ si taran nyamanɛ wo tɛngbɛnya bɛɛ rɔ bawo mɔgɛnu bi ko-telennɛ mala.

¹⁸Hɔnyɛ si bɔ Allata mɔgɛnu kan la, bɛɛ si to yisi-kimɛ anubɛ lafɛrɛ rɔ.

¹⁹Hali banda-kole wa wola gbɔngbɔnnu takerikeri ka wola soenu tinya,

²⁰mɔgɛnu sewanɛ si to. Yi-siyaman si taran wola ki-fannu kɔrɔ. Wola kolo-fannu de-nyini-fan si siyaya.