Read Kuranko Aiseya 40 Bible Online

Aiseya 40 - Kuranko bible

Aiseya 40

¹Mari ya a fɔ nde, Aiseya ye ko n ni ata mɔgɛnu niyi radiya.

²N ni Yerusalɛm kɛnu manugu-nɛgɛ. Anu bara tɔrɛ min kɛ, wo da ra ara kolo, ado anu hakɛ ma ara koto le gbɛ! Mari ko a bɛnta, tɔrɔya sufa min ni sigi anu ma, a ara ban wo sigila anu ma.

³ Mɔgɛ do gbele-gbelen kan ye bɔla, a ko, “Wo ni kilɛ rabɛn Mari ye wula-da-rakolɔn rɔ. Wo ni tagama-kilɛ bɛɛ matelen mata Alla ye.

⁴Wo ni kɔnkɔ-gbɛran bɛɛ lafa ka kɔnkɔ-wɛnu tii a yarɔ mɛmɛ! Gburukulinu si ma lɛɛ la. Nyamani-gbɔgɔsa-gbagasɛ ma si nunku.

⁵Wo bɛɛ wa ka-a-la, Marita gbiliyɛ ni na to bɔla gbɛ rɔ, ado hadama-dan bɛɛ si kɛ rayen. Mari nyɛrɛ-nyɛrɛ le wara kɛ fɔ.”

⁶ Mɔgɛ do gbele-gbelen kan ye bɔla ko, “Nna kilayɛ lake!” N ya nyinikalɛ kɛ, n ko, “N bi nfen kilaya sufa lakela?” A fɔ ko, “Hadama-dan bɛɛ mani de dɔrɔn iko kalɛ. Anu ti mɛ iko kala-fere ti mɛ nya min.

⁷Mari wa fɔnyɔ latugu anu ma tumɛ min, binyɛnu na si fɔsɔ, kɔn-ferenu si bɔ anu su la, ado mɔgɛnu siyi-fɛ ti yanya binyɛtɛ ko.

⁸Ɔnde, binyɛ la si fɔsɔ, kɔn-fere si bɔ a su la kɔnɔ mata Allata kumɛ si to a gbɛ rɔ tolon!”

⁹Yerusalɛmta ko-mayonnɛ, i ni ta kibara-nyimɛ lake kɔnkɔ-layan-bɛ kuma! I ni i kan labɔ ka kibara-nyimɛ wara-koe lawanka. I ka kilan a mayonna. A fɔ soe bɛɛ rɔ Yuda nyamanɛ rɔ ko anuta Alla ye nala!

¹⁰ Ma Tigi Mari ye nala maralɛ-kɛla sɛnbɛ la. A ara mɔgɛ min kunyɛ bɔ birɛ rɔ, a si na wonu na.

¹¹ A si ala mɔgɛnu fɛ-bira iko saga-fɛ-biralɛ si ala sagɛnu fɛ-bira nya min. A si saga-dannu kundɛn kan-tina-kelen ka ta anu na a kɔnkɔn tɔ. Wonu nanu si bila anu fɛ fungban!

¹²Mɔgɛ si ke kɔgɔ-yi sumanna a bole tɔ? Mɔgɛ si ke san-kole sumanna a nunkan la? Mɔgɛ si ke duninya-bɔnkɛ kɛla kalamɛ rɔ? Mɔgɛ si ke fan do bila ka kɔnkɛnuna gbiliyɛ-yatɛ lɔn?

¹³ Mɔgɛ si ke Mari labilala koe do la, wa? Yon si ke Mari karanna ka a makawandi?

¹⁴Ka a ma, Mari ni ko nya-yen wo, ka a ma, a ni kusanya ko mala wo, Mari si yon manyinika wonu nadan tinɛ?

¹⁵Fenfen ma sibolenu na Mari yala. Anu mani de iko yi-tinti kelan. Yi-tɛma-duginu fɛyanɛ iko gbangban.

¹⁶Soge min bɛɛsi ye Lɛbanan gbɔngbɔn rɔ, wonu ti saraka bɔ, ado kɔn wonu ti saraka-mintan-sɔgɔ bɔ.

¹⁷Fenfen ma sibolenu na a yala. Anu ti ko-wo-ko nyinya ale ma.

¹⁸ Mɔgɛ si Alla sanka yon ma? Mɔgɛ si ke Alla faranfasɛ lɔnna kama?

¹⁹A mani ma iko boloma-wɔli-kɛlɛnu bi bɛsɛ min lɛsɛla anuta allayɛ la hali anu ya sɛnɛ latugu a ma ka a makiri wodi-gbɛnu yɔlɔkɛnu na.

²⁰Ni a ma ke sɛnɛ anubɛ wodi-gbɛ sɔrɔnna, a si kɔn-mele donu bi min ti tuli. A si boloma-wɔli-kɛlɛ do nyini min kɛwu kɔlɔmanu lɛsɛla alako ala fen-lɛsɛnɛ wo kana na bui.

²¹Wo ma a lɔn, ba? Min bara fɔ wo ye nun, bi ko ma wo la? Duninya dabirara nya min, wo ma wo lamɔɛn bɛ nun, ba?

²²Duninya-dannɛ le siginɛ ala mansaya-waganɛ rɔ. A ye san-kole kɔma duninya kuma pon! Mɔgɛ mani de a yala iko mɛnɛ-mɛnɛnɛnu. A ya san-kole rafulen de iko yorolan, ni wo ma, fani-bɔn.

²³A si mansa-makawanɛnuna fanka-dɛ makeri ka anu ma fufafuyi la.

²⁴Mansɛ wonu mani de iko ki-fan min bɔ-san anu suli labɔla. Mari wa fɔn-fɛlɛfɛlɛnɛ lana, anu si gbala iko bin-gbalɛ. Fɔnyɔ wo ni ta anu na pon!

²⁵Mɔgɛ si Alla-sɛnimɛ sanka fan mintan ma? A nyɔgɔn ye nyɔ?

²⁶I yɛ layɛlɛ san-kole ma. I yɛ ye lole minnu na wo la, yon ya wonu dan? Min bi anu tatalala iko kɛlɛ-dannu, wo le ya anu yirika lɔn, ado a bɛɛ kelen-kelennamɛ tɔgɛ ye a bolo. A fanka makawara, hali lolo kolo-kelen-bɛrɛn ti tantan sɔgɔ.

²⁷Kɛ dama rɔ, wole Isirɛla mɔgɛnu bi tola gbunyala ka a fɔ ko Mari ma wo tɔrɔ-koenu lɔn. Wo ko hali wo tora telenbɛlɛnu bolo la, Marita sa wo rɔ.

²⁸Wo ma a lɔn, ba? Wo ma a lamɔɛn nun, ba? Habadan-Alla le Mari la. Ale le ya duninya dan, yɔ! A ti bandan. A ti yunkun. Mɔgɔ-wo-mɔgɔ ti ke a miriya lɔnna.

²⁹Min tafaganɛ, ado anu munna ara tɛgɛ, a si wonu sɛnbɛ don.

³⁰Hali fonikenu, wonu mankulannɛ si to. Kemini-posenu si to tɛgɛla anu kin kun na.

³¹Kɔnɔ minnu bi anu yɛ bɛnna Mari ma anu dɛnbɛn-koe rɔ, wonu sɛnbɛ ma si to kofula. Anu wara-koe si to yɛlɛla iko kokɛ wa a kanban rafulen san ma. Anu si anu buri furr, kɔnɔ anu ti bandan. Anu si tagama ha, kɔnɔ anu ta ti kun.