Read Kuranko Aiseya 41 Bible Online

Aiseya 41 - Kuranko bible

Aiseya 41

¹Alla ko, “Wole wula-yanna-mɔgɛnu, wo ni wo tole masɔ n na. Wo ni wo rabɛn wola kitinu nata-koe la kiti-bɔn la. Wo si fɛrɛ sɔrɔn nyɔ le ka kuma. Ma ni ma ladɛn ka a lɔn ni yoe ye min bolo.

²“Yon nara nɔli-kɛlɛ la ka bɔ tele-bɔɛ wara la? A wa ta kan-bo-kan, yon ye nɔli-sɛnbɛ dila a ma? Yon bi nɔ-ko-sɛnbɛ dila wo ma mansɛnu anubɛ nyamanɛnu kuma? Nɔli-kɛlɛ wola faan ye mɔgɛnu murumurula iko gbangban. Wola kalabɛn ye anu tanyɛnsɛnna iko fɔnyɔ wa bin-gbalɛnu fɔrɔn.

³Ale si anu sagaran, ado yanba ti yalan a ma. A kin natiri, a mani de iko a kin sa tugula dugu la.

⁴Yon bi kɛ dama mala? Koe minnu bara tenbi nun kɔrɔma la, yon bi wonu kun na? Nde, Mari le nyɔ nun kebi hun, ado nde, Mari si taran nyɔ fanan ha wati-laban.

⁵“Nde, Mari ara minnu ma, wula-yanna-mɔgɛnu bara wo yen. Anu bara kilan furr, anu kun ma ara kɔ. Anu kun bara dɛn kan-tina-kelen.

⁶Boloma-wɔli-kɛlɛnu bi anu nyɔgɔn madɛnbɛna. Anu bi a fɔla anu nyɔgɔn ye ko, ‘Wo ni wo ragbɛlɛya.’

⁷Kɔlɔma-lɛsɛlɛ ye a fɔla siyaki ye ko, ‘Wo ara bɛn.’ Min bi sɛnɛ nɔrɔla bɛsɛ ma, wo ye a gbangbannɛ matɔgɔla. Kɔlɔma-lɛsɛlɛ ye a fɔla sɛnɛ-tatugulɛ ma ko, ‘Ila wɔlɛ wo ara bɛn gbetu!’ Wo kɔma, a si bɛsɛ wo gbangban kan tinɛ do rɔ anu dɛnbɛn-koe la a ti bui kan min.”

⁸ Kɔnɔ Marita wɔli-kɛlɛ ye Isirɛla mɔgɛ minnu na, a ara wonu denu yabɔ. A diyana-mɔgɛ Iburayima kebilɛ le wole la.

⁹A ko a ya wo ladɛn ka wo bɔ dugi-tonko nanɛ bɛɛ rɔ. A ya a fɔ wo ye ko ala wɔli-kɛlɛ le wole la. A ko a ma a ban wo la fɔ ka wo yabɔ.

¹⁰Wo kana kilan bawo a ye wo fɛ. Bawo wota Alla le ale la, wo kana kilan fenfen na. A si wo ragbɛlɛya ka wo dɛnbɛ. A si wo latanka ka wo kisi.

¹¹Minnu kɔrɔtɔnɛ wo ma, a ko wonu si a lɔn miliyɛ ye min na. Mɔgɔ-wo-mɔgɔ ya wo kɛlɛ, wo si faga.

¹²Anu bara-koe si ka-a-la duninya rɔ. Wo si wo yɛ lakalan wo yogenu ma kɔnɔ wo ti anu yen.

¹³Wo Mari Alla le ale la. A ye sɛnbɛ dila wo ma ka a fɔ wo ye ko hali wo ma kilan. A si wo dɛnbɛ.

¹⁴Mari ko wole a Isirɛla mɔgɛ toenu, hali wo ma siya, wo rafaganɛ. Wo kana kilan bawo a ye wo dɛnbɛna.

¹⁵Wo si ma iko fui-fen-gbesi-fan, a da lasulennɛ, ado a si wɔli a kin na! Wo si kɔnkɛnu tii mɛmɛ! Gburukulinu si ma iko fui-fen-fofe.

¹⁶Anu ta si fɛ. Fɔnyɔ si ta fofe wonu na pon! Fɔnyɔ si a ranyɛnsɛn. Kɔnɔ wole si sewa Mari la. Wo si Isirɛlata Mari-sɛnimɛ matɔgɔ.

¹⁷Fugarɛnu anubɛ bolo-kolɔnnu ya yi nyini, anu ma ke a sɔrɔnna. Mari ko wo kan la wa gbala todo, a si na to wola madiyalɛ yabila. Ale Isirɛlata Mari ti wo boloka.

¹⁸A ko a si bɛnu natugu a rɔ ka tenkenu sigi a rɔ fara-kɔnkɛnu ma. A ko a si a ma, kɛnkɛn-tagbalɛ ni yɛlɛma dalɛ la. Yinu si belenna dugu-gbalanɛnu punsɔgɔla.

¹⁹Kɛn min gbalanɛ nun kɔrɔma la, pɔpɛnu si ta fɛrɛnna nyɔ rɔ. Nyɔ bɛɛ si ma pogorɔ-gbɔngbɔn la. I ya gbɔngbɔn yen kan-bo-kan, binyɛ ara bɔ nyɔ nun. Anu dama si yɛlɛma gbɔngbɔn-belebele la.

²⁰Mɔgɛnu ba wo yen, anu si a fɔ ko fɔ Mari le wara kɛ ma. Anu si na a lɔn wo rɔ ko Isirɛlata Mari-sɛnimɛ le wara kɛ ma ka.

²¹Mari, Isirɛlata mansɛ, kɔni, wo le wara kɛ fɔ. “Wole sibolo-gbɛrɛ-bɛsɛnu, wo ni wo rabɛn kitila ko la. Wo na wola sɔsɔli-sala-dɛgbɛnu na wo bolo.

²²Wo ni na yan. Koe min bi nala mala, wo ni na wo fɔ ma ye. Ni wo ara ma, male ni na to a lɔnna. Koe min bara ma kɔrɔma la, wo ni wonu takaran kiti-salɛnu ye. Wo wa ban wo la, wo ni na to anu kɔrɛ faranfasila anu ye.

²³Min bi nala mala sina, wo ni wonu fɔ ma ye. Ni wo kera wo mala, nba, wobɛ Allatala mansa-gbu-wɛ rakɛn de wo rɔ. Wo ni kabana-koe do ma, ni wo ma, wo ni na kasarɛ do la. Wo ni a ma, ma kun ma ni kɔ kilan anubɛ gbiliyɛ la.

²⁴Fufafuyi le wobɛ wola wɔlɛ wonu na. Wo kɔlɛnu manyimani de!

²⁵“Nde, Mari ara mɔgɛ do tɔnbɔn tele-bɔɛ wara la. A si wo kɛlɛ dabira kantɔ-wara la. Wo wa na, a si kun-tiginu tatɛntɛn iko bore. A si wonu tatugutugu iko bɔnku-daga-sɔlɛ si bɔnkɛ ramaga nya min.

²⁶Yon si ke kɛ labɔla a kunyɛ rɔ ko kɛ ye mala le yarɔ? Ni wo si ke kɛ mala le nun, ma si wo yo sa nun. Kɔnɔ wo do-wo-do ma ke kɛ fenfen fɔla ma ye. Ma ma ke fenfen namɔɛnna wo la.

²⁷Nde, Mari le fɔlɔfɔlɔn ya kibara-nyimɛ lake Isirɛla mɔgɛnu ma. N ya kilayɛ lata Yerusalɛm kɛnu ma ko wola mɔgɛnu sɛgimatoe le wo warɛ.

²⁸Kɔnɔ bɛsɛnu mafɛlan n yarɔ anu do-wo-do ma ke punpɛn fɔla. N ba anu manyinika, anu ti ke kumala.

²⁹“Fufafuyi le bɛsɛ wonu na. Anu ti ko-wo-ko nyinya. Anu dama rafaganɛ, sɛ sa bɛsɛ wonu ye.”