Read Kuranko Aiseya 45 Bible Online

Aiseya 45 - Kuranko bible

Aiseya 45

¹Mari le wara Sairasi yabɔ ko a ni ma mansɛ la. A ya a yabɔ alako a ni sibolenu nɔ kɛlɛ rɔ. A ya ale Sairasi sɔ ko a ni sibole wonuna mansaya-sɛnbɛ dɛ makeri. Mari nyɛrɛ le ye soe wonu tarɛ-dɛnu nakala alako ale Sairasi ni don anu kuma. Mari ya a fɔ Sairasi ye ko

²ale nyɛrɛ-nyɛrɛ si kilɛ laka a ye ka kɔnkɛnu anubɛ gburukulinu tii a yarɔ. Tarɛ min don-dɛ ladannɛ silɛɛ la, Mari ko a si wonu keri ale Sairasi yarɔ. A balan-fan min nadannɛ nɛgɛ la, a si wonu takerikeri.

³Mari ko fen-kolomɛ minnu dogonnɛ pinpi rɔ, a si wonu di a ma. Wo kɔma, ale si a lɔn ko Mari le Mari la. A si a lɔn fanan ko Isirɛlata Alla ya a sereka-tɔgɛ rakele.

⁴Mari ko ale le ya ale Sairasi yabɔ ata wɔli-kɛla, Isirɛlila ko la bawo ata mɔgɔ-yabɔnɛ le mɔgɛ wonu na. Mari ko hali Sairasi ma a lɔn, a ara gbiliya-belebele di a ma wo la.

⁵Mari ko Mari le ale la. Alla-wo-alla sa nyɔ ale kɔma. A ko hali Sairasi ma a lɔn, a ye nyinina sɛnbɛ min bɛɛ ma, a si wo bɛɛ di a ma.

⁶A ko ni i ya a yen, a ye wo mala, wo manɛ alako duninya-tonko-nanɛ bɛɛ ni a lɔn ko ale le Mari la, ado Alla-gbɛrɛkɛ sa ale kɔma.

⁷A ko ale le ya pinpi ani fila waan dan. Ale le ye nala duwɛ anubɛ kasarɛ la. Ale Mari ko ale le wara kɛ dama ma.

⁸A ko a si nɔli-sɛnbɛ labɔ san ma ka a layigi iko gbɔrɔndɛ. Dugi fanan si a dɛ laka ka a lakunu. A si gbusu-dugi ma hɔrɔyɛ anubɛ telenbagayɛ la. Ale Mari ko a si a ma, kɛ dama ni ma.

⁹ Bɔnku-dagɛ si sisi a ladannɛ sɔsɔla, wa? Ado nfan, dagɛ wonubɛ doinu takɛn gbɛn! Bɔnkɛ wo nyɛrɛ si a ladannɛ manyinika ni a ye min kun na? Ale dagɛ si a fɔ a sɔlɛ ma ko a ma a bira-fannu to a ma.

¹⁰Dan si ke a fɔla a sɔrɔnnɛnu ma ko, “Nfenna ko la wo ya n nadan ka?”

¹¹Isirɛlata Mari Alla-sɛnimɛ, yarɔ-koenu mabɛnnɛ ale min bolo, kɔni, wo ko yo sa wole bolo ka a manyinika ala dannuna ko ma. A bɛnnɛ a ni min ma, a ma bɛn wo ni wo fɔ a ye.

¹²A ko ale le ya duninya dan anubɛ mɔgɛ minnu bi a rɔ. A ya san-kole rafulen ata fanka le la. Tele anubɛ karɛ anubɛ lolenu bi ata sɛnbɛ le kɔrɔ, ata kɛlɛ-dannu, kɔni.

¹³A ko ale le nyɛrɛ-nyɛrɛ ya Sairasi lawuli ko a ni ale Marita wɔlɛ kɛ anubɛ ka koenu natelen. Mari si kilɛnu matelen Sairasi yarɔ. A si sɔn Mansa Sairasi ni Yerusalɛm sɔ tun a kurɛ la. Wo kɔma, ale Sairasi ni ata mɔgɛnu kunyɛ bɔ birɛ rɔ. A ko mɔgɔ ma wodi di Sairasi ma wola ko la, mɔgɔ ma dogonta-fan di a ma. Mari Sɛnbɛ-Bɛɛ-Tigi kan le kɛ la.

¹⁴Mari ye a fɔla Isirɛla ye ko, “Iyipiti anubɛ Itiyopiya fen-kolomɛnu si ma wole Isirɛla halalɛ la. Sabiya kemini-ferengben-bɛnu si ma wola yɔɔnnu na. Anu kirinɛ si bila wo fɛ yɔlɔkɛ la. Anu si anu du wo ye ka a fɔ anu dɛ la ko, ‘Alla ye wo fɛ. Ale le kelen pe ye Alla la.’ ”

¹⁵Isirɛlata Alla min bi ata mɔgɛnu nakananna, anu si a fɔ ko Alla le ale la, hadama-dannu ti min yen anu yɛ la.

¹⁶Minnu bi bɛsɛ ladanna allayɛ la, wonu si miliya ka yarabi pɔ, ado anu si ta anu nyɔgɔn fɛ miliyɛ bolo.

¹⁷Kɔnɔ ale Mari le ye Isirɛla kisila, ado anu ko Isirɛla si to nɔlɛ kɛla burubukai! Anu ti yarabiyi sɔrɔn muk!

¹⁸Mari le ya san-kole mumɛ dan. Ale le kelen pe ye Allayɛ la. A ya dugu-kole kɛ dɛlɛkɛn ka a ladan a kin na! A ya a lagbɛlɛya gben, alako a ni mɛ. A ma di a ye a ra ni kolonya filili, fɔ ka a ma hadama-dannu sigi tinɛ la. A ko Mari le ale la, ado a ko Alla-gbɛrɛ fenfen sa ale kɔma.

¹⁹A ko a sa kumala dogɔn rɔ. A ma ala ko-ladan-nya to pinpi rɔ. A ko a ma a fɔ male Isirɛla mɔgɛnu ye ko ma ni a nyini kan-tina-rakolɔn tɔ. A ko Mari le ale la min si tonyɛ fɔ ma ye. A ye ko-telennɛnu sala gbɛ ma ma ye.

²⁰Mari ko, “Nyamanɛla buiyi kɔmɛ, wole sibolo-gbɛrɛ minnu tora wo niyi la, wo ni wo kundɛn kan-tina-kelen kiti kan ma. Wole minnu bi wo wasila wola bɛsɛnu na wo bolo ka bɛsɛ wonu madiya minnu ti ke wo kisila, hɛnkili-wo-hɛnkili sa wo bolo.

²¹Wo na kumɛ kɛ la kiti-bɔn la. Wo fɛkalɛnu ni anu nyɔgɔn kundɛn. Koe minnu bara ma kaka, yon bara wo fɔ wo ye nun kɔrɔma la? Ale Mari Alla le ya wo fɔ, min bi ala mɔgɛnu kisila, kɔni. Alla-wo-alla sa nyɔ ale kɔma.”

²²A ko wole duninyarɔ-mɔgɛnu, wo ni wo ya-lamunun a la, a ni wo kisi. A ko ale kelen pe le ye Allayɛ la.

²³ A ko tonyɛ le ata lanyiri la, a ti ma kuma-fila-fɔlɛ la. A ko a fotɛ a nyɛrɛ rɔ ko mɔgɛ bɛɛ si na anu nyɛnkin a kɔrɔ. Anu si lanyiri kiri ko anu ti bɔ a wara-ko rɔ.

²⁴Minnu ba na, wonu si a fɔ ko nɔlɛ anubɛ sɛnbɛ ye ale Mari kelen pe le bolo. A ko ale Mari wa gboya minnu ye, wonu si tɔrɔ yarabiyi bolo.

²⁵Ale Mari ko[18] a si Yakoba kebilɛ bɛɛsi kunyɛ bɔ gbaran rɔ, ado anu dama si tantolɛ di a ma.